ភ្នំពេញ – ក្នុងពិធីប្រគល់សញ្ញាបត្រ​ដល់​និស្សិតបច្ចេកទេស នៃវិទ្យាស្ថានជាតិបណ្តុះបណ្តាល​បច្ចេកទេស (NTTI) សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា បានលើក​ឡើងថា បច្ចុប្បន្ន​ការ​បណ្តុះបណ្តាលបច្ចេកទេស និងវិជ្ជាជីវៈ (TVET) ត្រូវគេហៅថា ជាជំនាញ​ត្រូវប៉ាន់ ។

សម្តេចតេជោបានបញ្ជាក់ថា បច្ចុប្បន្ន​ភូមិ​ប្រមាណ៩៩ភាគរយ​នៅទូទាំង​ប្រទេស​សុទ្ធសឹងតែមានអគ្គិសនីប្រើប្រាស់ ដូច្នេះប្រជាពលរដ្ឋមានតម្រូវការ​ប្រើប្រាស់បរិក្ខាអគ្គិសនី​​ក៏​កាន់តែច្រើន ដែលចាំបាច់​ណាស់​នឹង​មានតម្រូវការ​ជាង​ជួសជុល ។

“បងប្អូន​មួយ​ចំនួនធំ ពីដើមសម័យបក់ផ្លិត វាបានទៅកាន់តែឆ្ងាយហើយ សូម្បីតែប្រជាជន​នៅជនបទ ក៏គាត់ប្រើអគ្គិសនី គាត់ក៏​មានកង្ហារ ដើម្បីគាត់អាចសម្រាកបានស្រួលដែរ មានតិចណាស់ដែលគ្មានសព្វថ្ងៃនេះ ព្រោះ​ឥឡូវនេះ ៩៩ភាគរយនៃភូមិ ដែលយើង​មានអគ្គិសនីភ្ជាប់ដល់ អញ្ចឹងពួកគាត់អាចនឹងប្រើប្រាស់ នៅ​មានម៉ាស៊ីនត្រជាក់ នៅមានស្អីៗច្រើនណាស់ មានទូទឹកកកទៀត…”

សម្តេចតេជោ ហ៊ុន សែន នាយករដ្ឋមន្រ្តី

យោង​តាមទិន្នន័យ​​ បច្ចុប្បន្ននេះ ភ្លើងអគ្គិសនីត្រូវបានផ្គត់ផ្គង់ដល់ភូមិចំនួន ១៣ ៨១៨ ភូមិ និងមានអ្នកប្រើប្រាស់ដល់ទៅ ៣ ៤៨៣ ០៦១នាក់ ។ តែយ៉ាងណាកម្ពុជា​នៅ​មិនមានជាងអគ្គិសនីជំនាញច្រើនគ្រប់គ្រាន់ដើម្បីជួសជុល និងផ្គង់ផ្គង់សេវាថែទាំនៅគ្រប់តំបន់ទេ។ ចំពោះទឹកស្អាតវិញ យើងគ្រោងផ្គត់ផ្គង់ឱ្យបាន ១០០% ឬច្រើនជាង ៣លានគ្រួសារនៅទូទាំងប្រទេស ត្រឹមឆ្នាំ២០២៥ ខណៈជាងទឹកមិនទាន់មានច្រើន។ បន្ថែមពីលើនេះ យានយន្តនៅកម្ពុជាមានរាប់លានគ្រឿង តែអ្នក​ប្រើប្រាស់​យានយន្ត​នៅតែពិបាករកជាងស្តង់ដារដើម្បីជួសជុល។ ទាំងអស់នេះបង្ហាញថា ជំនាញបច្ចេកទេសមានទីផ្សារធំ ដោយ​បើ​ទោះពេលបច្ចុប្បន្ន ឬទៅថ្ងៃខាងមុខក៏មិនខ្វះទីផ្សារការងារ។

យ៉ាងណាក៏ដោយ សម្រាប់យុវជន​កម្ពុជា​ដែល​ចង់ស្វែង​រករៀន​ជំនាញទាំងអស់ខាងលើ គឺអាចស្វែងរកសាលាបណ្តុះបណ្តាលបច្ចេកទេស និងវិជ្ជាជីវៈ (TVET) នៅក្នុងខេត្តជិតផ្ទះបាន ។ បើតាម ឯកឧត្តម ថង សាម៉ុន អគ្គនាយករងនៃអគ្គនាយកដ្ឋានបណ្តុះបណ្តាលបច្ចេកទេស និងវិជ្ជាជីវៈ បានបញ្ជាក់ថា បច្ចុប្បន្ន​នេះសាលា TVET ទាំងអស់​នៅ​កម្ពុជាអាចមានសមត្ថភាពអភិវឌ្ឍធនធានមនុស្សរហូតដល់ទៅ ១០ម៉ឺននាក់ក្នុងមួយឆ្នាំ និងមាន​ផ្តល់អាហារូបករណ៍ជាច្រើនកន្លែងសម្រាប់​សិស្សថែមទៀត៕