ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មានកត្តាជាច្រើនដែលរុញឱ្យយើងទទួលនូវអារម្មណ៍ទទេស្អាតក្នុងខ្លួន ( empty inside) វាអាចកើតមាននៅពេលដែលភ្លេចរំលឹកអំពីគុណតម្លៃនៃខ្លួនឯង ការទទួលទានដំណេកមិនគ្រប់គ្រាន់ ទទួលបន្ទុកធ្ងន់ពេកលើសសមត្ថភាព មានរបួសផ្លូវចិត្ត កំពុងសោកសៅក្រោយបាត់បង់អ្វីមួយ កំពុងឯកោ ឬភាពឆកល្វែងក្នុងការថែទាំ និងការយកចិត្តទុកដាក់ជាមួយខ្លួនឯងមិនថាសុខភាពផ្លូវចិត្ត ឬផ្លូវកាយ។ មួយវិញទៀតអាចបណ្តាលមកពីមានអាការធុញថប់ និងកត្តាដទៃទៀតនៅជុំវិញខ្លួន។ តាមរយៈគេហទំព័រ Better Up បានបង្ហាញគន្លឹះមួយចំនួនក្នុងការដោះស្រាយ ឬក៏ទប់ទល់បែបវិជ្ជមានជាមួយអារម្មណ៍បែបនេះ ដោយមានរៀបរាប់ខាងក្រោម ៖
ផ្សារភ្ជាប់ពីគុណតម្លៃ និងវត្ថុបំណងផ្ទាល់ខ្លួន ៖ ការទទួលបាននូវអារម្មណ៍ទទេស្អាតក្នុងការរស់នៅពីមួយថ្ងៃ ទៅមួយថ្ងៃ អាចបណ្តាលមកពីសកម្មភាពដែលកំពុងប្រព្រឹត្តិប្រចាំថ្ងៃហាក់មិនសូវសំខាន់ចំពោះខ្លួនឯង និងមជ្ឈដ្ឋានជុំវិញខ្លួន ក៏ដូចជាតម្លៃផ្ទាល់ខ្លួន។ ហេតុដូចនេះ គឺជាពេលមួយដែលចាំបាច់ក្នុងការឆ្លុះបញ្ចាំងអំពីប្រភេទការងារដែលកំពុងធ្វើ អំពីទម្លាប់ប្រចាំថ្ងៃថា តើឆ្លើយតបនឹងការចង់បានហើយឬនៅ ឬមួយក៏ តើវាផ្តល់គុណតម្លៃបែបណាខ្លះចំពោះខ្លួនឯង និងសង្គម តាមរយៈការងារប្រចាំថ្ងៃដែលបានធ្វើទាំងអស់នោះ។
ផ្តល់តម្លៃលើគុណភាពដំណេក ៖ កាលដែលទទួលទានដំណេកឱ្យស្ងប់ ឬគ្រប់គ្រាន់ គឺជាកត្តារួមផ្សំដ៏សំខាន់ក្នុងការជំរុញឱ្យសុខភាពផ្លូវចិត្តរឹងមាំ និងរួមចំណែកទៅកាន់សុខុមាលភាពទាំងមូល។ គេងបានគ្រប់ធ្វើឱ្យខួរក្បាល និងរាងកាយបានសម្រាកព្រមជាមួយគ្នា ក៏ដូចជាការប៉ះប៉ូវនូវតម្រូវការថាមពលដែលបាត់បង់ រួមទាំងការត្រៀមខ្លួនសម្រាប់ចាប់ផ្តើមថ្ងៃថ្មីប្រកបដោយប្រសិទ្ធភាព។ នៅពេលដែលគេងមិនបានស្ងប់ ឬគ្រប់គ្រាន់ជាប់ថ្ងៃគ្នាជាបន្តបន្ទាប់ វាក៏ពិបាកក្នុងការបញ្ចេញថាមពល និងបង្កើនផលិតភាពឱ្យបានពេញលេញក្នុងពេលថ្ងៃដូចគ្នា។
សាកល្បងសកម្មភាពដែលខ្លួនចូលចិត្ត ៖ ស្ថិតក្នុងដំណាក់កាលនេះ ការនៅស្ងៀមទ្រឹងមិនបញ្ចេញសកម្មភាព អាចនឹងបង្កើនភាពច្របូបច្របល់ ដូច្នេះឆ្លៀតក្នុងឱកាសនេះគួរអនុញ្ញាតឱ្យខ្លួនឯងបានសាកល្បងសកម្មភាពប្លែកៗ ថ្មីៗ ឬក៏សកម្មភាពទាំងឡាយណាដែលបង្កើនទំនាក់ទំនងកាន់តែជិតស្និត ជាមួយនឹងខ្លួនឯង។ គួរជម្រាបជូនថា បន្តសកម្មភាពដែលខ្លួនចូលចិត្តជួយខ្លួនឯងឱ្យបន្ធូរភាពតានតឹងផង កាត់បន្ថយស្រេ្តសផង រួមទាំងការបង្កើតនូវអារម្មណ៍សុភមង្គលត្រឡប់មកវិញ។ សាកគិតទៅដល់សកម្មភាពដែលចង់ធ្វើពីមុនៗ ប៉ុន្តែពុំដែលមានពេលធ្វើ ឬពុំបានឆ្លៀតធ្វើ មួយវិញទៀតបើនៅតែនឹកមិនទាន់ឃើញទេ ធ្វើសកម្មភាពដែលខ្លួនឧស្សាហ៍ធ្វើលេងនៅផ្ទះ ដូចជាដាំស្លដែលមានរូបមន្តប្លែកៗ គូសរូបដោយមិនខ្វល់ពីច្បាប់ទម្លាប់ និងសកម្មភាពដទៃទៀត, ជារួមគឺការទុកចន្លោះឱ្យខ្លួនឯងបានអនុវត្តន៍សកម្មភាពបន្ថែម ហើយកុំបារម្ភអំពីការបង្កើតកំហុសបន្ថែម ឱ្យតែវាបង្កើតភាពរីករាយពេលកំពុងអនុវត្តន៍។
សរសេរគោលដៅដែលបង្កើតក្ដីរំភើប ៖ គោលដៅចាស់ៗមានហើយ និងបានអនុវត្តន៍ខ្លះហើយ ប៉ុន្តែនៅតែធ្វើឱ្យអារម្មណ៍ទទេស្អាតមែនទេ? សាកឆ្លៀតឱកាសនេះ ក្នុងការសាកល្បងបង្កើតបន្ថែមនូវគោលដៅថ្មីម្តង! ជាពិសេសគោលដៅដែលផ្តល់នូវអារម្មណ៍ពេញចិត្ត ប៉ុន្តែស្ថិតក្នុងដែនកំណត់មួយដែលអាចធ្វើបាន ដូចជាដើរឱ្យបាន៣០នាទីរាល់ព្រឹក ឬក៏ការសរសេរអត្ថបទប្រចាំខែដើម្បីបង្កើតផ្នត់គំនិតឱ្យកាន់តែទូលាយ និងការផ្សារភា្ជប់ទំនាក់ទំនងជាមួយមនុស្សដែលមានផ្នត់គំនិតទូលាយ។ មួយវិញទៀតគួរឆ្លៀតពេលប្រាំនាទី ក្នុងការសរសេរកំណត់ហេតុ ព្រោះនៅពេលដែលអនុវត្តន៍យូរៗទៅ បន្តិចម្តងៗ ហើយភាពទៀតទាត់ទាំងនេះ នឹងជំរុញឱ្យការបណ្តុះអារម្មណ៍វិជ្ជមានត្រឡប់មកវិញបានខ្លះ៕
