ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ទម្លាប់លេងជាមួយកូនចំាបាច់សម្រាប់ដំណើរអភិវឌ្ឍសមត្ថភាពរបស់កូន ដូចជា សមត្ថភាពគិត យល់ដឹង ទំនាក់ទំនង ការចងចាំ ទំនុកចិត្ត ក្តីស្រមៃ និងការស្វែងយល់ពីទិដ្ឋភាពជុំវិញខ្លួនរបស់កូនជាបន្តបន្ទាប់ ។ កុមារគ្រប់រូបនឹងទទួលបានអារម្មណ៍កក់ក្តៅនៅពេលដែលម្តាយឪពុកបានប្រឡែងលេងជាមួយ ឬសន្ទនាលេងសើចជាមួយកូន ជំនួសឱ្យសកម្មភាពទុកកូនចោលតែម្នាក់ឯង ឬអនុញ្ញាតឱ្យកូនលេងបច្ចេកវិទ្យាដូចជាស្មាតហ្វូនជាដើម ។ ខាងក្រោមនេះ ជាហេតុផល ៤ចំណុចដែលម្តាយឪពុកគួរចំណាយពេលវេលាលេងជាមួយកូនឱ្យបានច្រើន ដែលបានលើកឡើងដោយអង្គការ UNICEF កម្ពុជា ។
១. ជួយពង្រឹងចំណងរវាងម្តាយឪពុកនិងកូន ៖ តាមរយៈការផ្តល់សេចក្ដីស្រលាញ់ឱ្យកូន ការលួងលោម និងការយកចិត្តទុកដាក់ អ្នកកំពុងបង្កើតមូលដ្ឋានគ្រឹះសម្រាប់ការអភិវឌ្ឍជំនាញផ្នែកស្មារតី និងសង្គម ដែលគាំទ្រដល់សុខភាពផ្លូវចិត្ត និងសុខុមាលភាពរបស់ពួកគេនាពេលអនាគត ។
២. ជួយកាត់បន្ថយភាពតានតឹងចិត្ត ៖ នៅពេលអ្នករីករាយនឹងពេលវេលាសប្បាយៗ និងសើចក្អាកក្អាយជាមួយគ្នា រាងកាយរបស់អ្នកនឹងបញ្ចេញអរម៉ូនអង់ដូភីន ដែលជំរុញឱ្យមានអារម្មណ៍ល្អនិងវិជ្ជមាន ។ ភាពរីករាយនេះកើតឡើងទាំងម្តាយឪពុក និងកូនតូចរបស់អ្នក ។
៣. ជួយកុមារគ្រប់គ្រងអារម្មណ៍បានល្អ ៖ ផ្តល់ពេលវេលាឱ្យកុមារលេងជាមួយម្តាយឪពុកគ្រប់គ្រាន់ នោះនឹងជួយកុមារឱ្យអាចគ្រប់គ្រងព្រមទាំងដោះស្រាយបញ្ហាអារម្មណ៍នានា ដូចជា ការឈឺចាប់ ភាពភ័យខ្លាច ឬការបាត់បង់ឱ្យប្រសើរឡើងវិញ ។ កុមារត្រូវការភាពកក់ក្តៅ និងភាពរីករាយជានិច្ចពីម្តាយឪពុក ។
៤. ជួយបង្កើតទំនុកចិត្តដល់កុមារ ៖ នៅពេលដែលអ្នកឆ្លៀតពេលលេងជាមួយកូន កូនតូចរបស់អ្នកនឹងដឹងថា ពួកគេមានតម្លៃ និងមានទំនុកចិត្តចំពោះដំណើរជីវិតរបស់ពួកគេ ។ ការចែករំលែកបទពិសោធន៍ជាមួយគ្នា ជួយឱ្យកូនរបស់អ្នកដឹងថា ពួកគេទទួលបានការស្រលាញ់ និងសំខាន់ជានិច្ច ។ សូមញញឹម និងចូលរួមលេងជាមួយកូនដោយរីករាយ គ្រប់ពេលវេលានៅជាមួយកូនៗរបស់អ្នក ៕
