ភ្នំពេញ – នៅក្នុងវគ្គផ្ដាច់ព្រ័ត្រថ្នាក់ជាតិតិចណូវេសិនកម្ពុជាឆ្នាំ២០២៣ កាលពីពេលថ្មីៗកន្លងទៅ គណៈកម្មការបានរកឃើញក្រុមជ័យលាភីឆ្នើមចំនួន ៤ក្រុម ក្រោយការប្រកួតយ៉ាងស្វិតស្វាញរបស់កុមារីក្នុងការធ្វើការជាក្រុមបង្កើតគណិតច្នៃប្រឌិត និងរកដំណោះស្រាយថ្មីៗឆ្លើយតបទៅនឹងបញ្ហានានាដោយប្រើបច្ចេកវិទ្យាឌីជីថល និងគំនិតសហគ្រិនភាព។

ជាមួយគ្នានេះ បេក្ខនារីចំនួន១៧ក្រុម បានឡើងមកប្រកួតពីគ្រឹះស្ថានសិក្សារដ្ឋ និងឯកជន តាមបណ្ដារាជធានី-ខេត្ត ក្នុងវគ្គផ្ដាច់ព្រ័ត្រថ្នាក់ជាតិតិចណូវេសិនកម្ពុជាឆ្នាំ២០២៣ ហើយជាលទ្ធផលក្រុមដែលទទួលបានជ័យលាភីឆ្នើមមានចំនួន ៤ក្រុមរួមមាន ជ័យលាភីលេខ១ បានទៅលើ ក្រុម “Torsu Girl” ជ័យលាភីពានរង្វាន់ជើងឯកថ្នាក់ជាតិ (Senior Division), ជ័យលាភីលេខ២ បានទៅលើ ក្រុម “Sunrizze” ជ័យលាភីពានរង្វាន់ជើងឯកថ្នាក់ជាតិ (Junior Division), ជ័យលាភីលេខ៣ បានទៅលើ ក្រុម “Innovative Girl” ជ័យលាភីពានរង្វាន់ជើងឯកថ្នាក់ជាតិ (Beginner Division) និងជ័យលាភីលេខ៤ បានទៅលើ ក្រុម “Smart Girl Hun Sen Khchao” ជ័យលាភីពានរង្វាន់ប្រជាប្រិយភាព។

ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ មានប្រសាសន៍ថា កម្មវិធីបណ្តុះបណ្តាលនិងប្រកួតប្រជែងរយៈពេល ១២សប្តាហ៍ ផ្នែកសហគ្រិនភាពបច្ចេកវិទ្យាសកលលោក ដែលមានគោលបំណងលើកកម្ពស់ដល់សិស្សជាកុមារី ឬយុវនារី ចាប់ពីអាយុ ៨ ដល់ ១៨ឆ្នាំ ឱ្យចេះធ្វើការជារក្រុម ចូលរួមបង្កើតភាពច្នៃប្រឌិត និងរកដំណោះស្រាយថ្មីៗឆ្លើយតបទៅនឹងបញ្ហានានាដោយប្រើបច្ចេកវិទ្យាឌីជីថល វិទ្យាសាស្រ្តកុំព្យូទ័រ និងគំនិតសហគ្រិនភាពដែលជាជំនាញផ្ទាល់ខ្លួន។

រដ្ឋមន្ត្រីក្រសួងប្រៃសណីយ៍និងទូរគមនាគមន៍ ក៏បានអបអរសាទរដល់កុមារី ២ក្រុម ដែលបានឆ្លងផុតវគ្គជម្រុះកម្រិតពិភពលោកដំណាក់កាលទីមួយ ឈានចូលវគ្គពាក់កណ្តាលផ្តាច់ព្រ័ត្រ ហើយបានជូនពរដល់សិស្សានុសិស្សទាំងអស់ ទទួលបានសំណាងល្អ សុខភាពល្អ និងជោគជ័យក្នុងការប្រកួតថ្នាក់ជាតិ ព្រមទាំងការប្រកួតប្រជែងក្នុងកម្រិតពិភពលោក។

ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍

“ខ្ញុំសង្ឃឹមជឿជាក់ថា ក្មួយៗសិស្សានុសិស្សមិនថាតិចឬច្រើនសុទ្ធតែបានផលវិជ្ជមាននៃការរីកចម្រើននៃបច្ចេកវិទ្យានេះបានគ្រប់ៗគ្នាដូចជា ការសិក្សាអនឡាញល្អៗ ការស្រាវជ្រាវពីបណ្ណាល័យគ្មានដែនកំណត់បញ្ញាសប្បនិមិ្មត Wechat ដែលផ្ដល់ផលប្រយោជន៍ជាវិជ្ជមាន”

ឯកឧត្តម ជា វ៉ាន់ដេត បញ្ជាក់ថា រាជរដ្ឋាភិបាលកម្ពុជាបានដាក់ចេញនូវក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ ហើយយុទ្ធសាស្ត្រសំខាន់មួយគឺផ្តោតលើ “ការកសាងធនធានមនុស្សឌីជីថល” ដែលជាធនធានក្នុងការជំរុញដល់ការចាប់យកឌីជីថលលើគ្រប់វិស័យ ដើម្បីបង្កើនផលិតភាពនិងកំណើនសេដ្ឋកិច្ច សំដៅប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ និងប្រទេសមានប្រាក់ចំណូលខ្ពស់នៅឆ្នាំ២០៥០។

កម្មវិធីតិចណូវេសិន២០២៣ បានប្រកាសបើកជាផ្លូវការ កាលពីថ្ងៃទី៤ ខែកុម្ភៈ ឆ្នាំ២០២៣ បន្ទាប់មកសមាគមន៍ Technovation Cambodia ក៏បានរៀបចំការបង្រៀនរយៈពេល ១២សប្តាហ៍ នៅសាកលវិទ្យាល័យអាមេរិកាំងភ្នំពេញ ដែលក្នុងនោះ មានក្រុមនារី ១៩ក្រុម សរុប ២៥៧នាក់ មកពី ៦៦សាលា រដ្ឋនិងឯកជន មកពី ១៥ ខេត្តក្រុង និង ៩ក្លឹប ព្រមទាំងគ្រូបង្គោល ៤៥នាក់។ មិនតែប៉ុណ្ណោះនៅតាមបណ្តាខេត្តគោលដៅរបស់ Technovation ដូចជាខេត្តកំពង់ចាម និងបាត់ដំបង ក៏បានបង្រៀនទៅក្រុមសិស្សនារីដោយមានការណែនាំពីគ្រូបង្គោលផងដែរ។

សូមជម្រាបជូនថា កម្មវិធីតិចណូវេសិន (Technovation) ២០២៣ សហការរៀបចំដោយក្រសួងប្រៃសណីយ៍និងទូរគមនាគមន៍ ក្រសួងអប់រំយុវជននិងកីឡា និង Tech For Kids Academy ព្រមទាំងមានការឧបត្ថម្ភពីសាកលវិទ្យាល័យអាមេរិកាំងភ្នំពេញ (AUPP) បណ្ឌិត្យសភាបច្ចេកវិទ្យាឌីជីថលកម្ពុជា (CADT) និងក្រុមហ៊ុន Smart Axiata ដែលជាកម្មវិធីប្រកួតប្រជែងផ្តោតសំខាន់ទៅលើការលើកទឹកចិត្តកុមារី ឬយុវតី ក្នុងវិស័យបច្ចេកវិទ្យា និងធុរកិច្ច តាមរយៈកម្មវិធីបណ្តុះបណ្តោល ការអភិវឌ្ឍកម្មវិធីទូរសព្ទ (Mobile App) និង សហគ្រិនភាព ដល់កុមារីនិងយុវតី៕