ការមិនបានយកចិត្តទុកដាក់អំពីការបង្កើនថាមពល ឬការគ្រប់គ្រងខ្លួនឯង គឺជាកត្តាប្រឈមមួយដែលមនុស្សស្ទើរតែគ្រប់គ្នាធ្លាប់ជួបប្រទះ។ តាមការសិក្សាមួយរបស់សាកលវិទ្យាល័យ Nottingham រកឃើញថា ការដឹងពីដំណើរនៃការជំរុញថាមពល និងចេះគ្រប់គ្រងសកម្មភាពប្រចាំថ្ងៃរបស់ខ្លួនឯង វាបានជួយឱ្យការចាប់ផ្តើមបន្តបេសកកម្មនៅថ្ងៃថ្មីមានប្រសិទ្ធភាព ឬក៏ផលិតភាពច្រើនជាងពេលដែលមិនបានគិតគួរអំពីបញ្ហានេះ។ 

ការយកចិត្តចិត្តទុកដាក់លើផលិតភាពរស់នៅ គឺ ជួយឱ្យការប្រើប្រាស់ពេលវេលាព្រឹកព្រលឹមកាន់តែប្រសើរ សម្រួចគោលដៅ មានតុល្យភាព បង្កើនគុណភាពរស់នៅប្រចាំថ្ងៃ បង្កើនសមទ្ធិផលការងារ រួមទាំងជំរុញឱ្យចេះស្រឡាញ់ពេលចិត្តជាមួយនឹងខ្លួនឯងបន្ថែមមួយកម្រិតទៀត។ យោងតាមគេហទំព័រ Entrepreneur បានរំលឹកនូវសកម្មភាពមួយចំនួន ដែលលោកអ្នក ត្រូវតែបន្តធ្វើឱ្យបានទៀងទាត់ ដើម្បីជំរុញផលិតភាពក្នុងការរស់នៅ។

លំហាត់ប្រាណ ៖ តាមការស្រាវជ្រាវរបស់សាកលវិទ្យាល័យ Bristol រកឃើញថា មនុស្សដែលធ្វើលំហាត់ប្រាណជាប្រចាំ គឺបង្កើននូវថាមពលបន្ថែម និងមានសមត្ថភាពមើលអ្វីមួយនៅក្នុងផ្លូវវិជ្ជមានបានច្រើនជ្រុង។ ទន្ទឹមគ្នានោះ វាក៏អាចជួយទៅដល់ការពង្រឹង ជំនាញគិតស៊ីជម្រៅ និងបំផុសសេចក្ដីតាំងចិត្តក្នុងការបញ្ចប់ភារកិច្ចប្រចាំថ្ងៃផងដែរ។ កាលដែលធ្វើឱ្យរាងកាយមានចលនា យ៉ាងហោចណាស់ ១០នាទី ក្នុងមួយថ្ងៃ ក៏អាចជួយឱ្យកាត់ជាតិអាស៊ីតបានមួយផ្នែកដែរ ថែមទាំងធ្វើឱ្យប្រព័ន្ធសរសៃប្រសាទដំណើរការល្អ។

ទទួលទានទឹកក្រូច ឬទឹកក្រូចឆ្មារ ៖ ការជ្រើសយកភេសជ្ជៈទឹកក្រូច ឬទឹកក្រូចឆ្មារ ដើម្បីទទួលទានពេលព្រឹកព្រលឹម ជួយឱ្យ​ស្រឡះបំពង់ក និងស្រូបថាមពលបំពេញបន្ថែមទៅកាន់សារពាង្គកាយ ដោយហេតុថាសារធាតុមកពីផ្លែក្រូចមានវិតាមីន C រួមទាំងមានសារធាតុប្រឆាំងអុកស៊ីតកម្ម ។ ហើយរបៀបនៃការពិសាឱ្យមានប្រសិទ្ធភាព គឺទទួលទានមុនស្រស់ស្រូបអាហារពេលព្រឹកប្រមាណក្នុងរយៈពេល ១០ទៅ៣០នាទី សឹមទទួលទានអាហារ។ គួរជំរាបជូនដែរថា មិនគួរពិសាភេសជ្ជៈទឹកក្រូចដោយគ្មានទឹកធម្មតាសម្រាប់ផឹកជាបន្ទាប់បន្សំនោះទេ ព្រោះវាប៉ះពាល់ដល់សុខភាពធ្មេញរបស់អ្នក។

មិនប្រើប្រាស់ស្គ្រីនមុនទទួលទានអាហារពេលព្រឹក ៖ ប្រសិនបើក្រោកពីដំណេកភ្លាម លោកអ្នកផ្តល់ភាពសំខាន់នៅជាមួយស្គ្រីនទូរស័ព្ទដើម្បីទៅធ្វើសម្មភាពមិនសូវសំខាន់ដូចជា ផ្ញើសានិយាយលេង ឆែកហ្វេសប៊ុក នោះវានឹងនាំឱ្យលោកអ្នកបាត់បង់នូវការផ្តោត ថែមទាំងមិនបានធ្វើរឿងសំខាន់ៗជាច្រើនទៀត។ អ្នកគួរតែផ្តល់ភាពសំខាន់ទៅធ្វើឱ្យសកម្មភាពវិជ្ជមានជំនួសវិញដូចជា អនុវត្តការរក្សាចិត្តឱ្យស្ងប់ និងបង្កើនភាពស្រស់ថ្លាឱ្យបានពេញមួយថ្ងៃ តាមរយៈហាត់ប្រាណ សមាធិ ឬក៏ឈរមើលសត្វហើរតាមមាត់បង្អួចជាដើម។

រក្សាទម្លាប់បរិភោគអាហារពេលព្រឹក ៖ ការបរិភោគអាហារពេលព្រឹកដែលមានគុណភាព មានច្រើនជម្រើសណាស់សម្រាប់មនុស្សទូទៅ ប៉ុន្តែគួរជ្រើសយកអាហារណា ដែលស្របនឹងតម្រូវការរាងកាយ ឬអាហារដែលបំពេញថាមពលបានក្នុងរយៈពេលយូរ និងកាត់បន្ថយអាការៈឆាប់ឃ្លានជាដើម ដែលទាំងនេះគ្រាន់តែជាបច្ចេកទេសខ្លះៗប៉ុណ្ណោះ។ លោកអ្នកត្រូវប្រាដកថា អាហារពេលព្រឹកដែលជ្រើសយកមកទទួលទាន ត្រូវមានជីវជាតិសម្រាប់ទ្រទ្រង់នូវសុខភាព ពីព្រោះអាហារល្អ វាបានបង្កើនថាមពលទៅកាន់រាងកាយ និងធ្វើ​ឱ្យ​ការ​ចងចាំល្អ ជាពិសេសជួយឱ្យការផ្តោតសតិក្នុងរយៈពេលយូរ៕