យោងតាម Business Insider បានបង្ហាញថា ខួរក្បាល គឺជាផ្នែកមួយនៃរាងកាយ ដែលមានឥទ្ធិពលយ៉ាងខ្លាំងទៅលើដំណើរការនៃរាងកាយទាំងមូល។ ទន្ទឹមនឹងនេះ ការអនុវត្តទម្លាប់បានល្អ ពិតជាមានសារៈសំខាន់សម្រាប់សុខភាពខួរក្បាល និងរាងកាយ ។ លោក Jason Shepherd សាស្ត្រាចារ្យរងផ្នែកសរសៃប្រសាទនៅសាកលវិទ្យាល័យ Utah និង លោកស្រី Talia Lerner ជំនួយការសាស្រ្តាចារ្យផ្នែកសរសៃប្រសាទនៅសាកលវិទ្យាល័យ Northwestern បានបង្ហាញ ទម្លាប់ចំនួន៥ ដែលជួយឱ្យខួរក្បាលមានសុខភាពល្អ។

១. គេងដោយមានអនាម័យ និងគ្រប់គ្រាន់ ៖ លោក Joson Shepherd បានលើកឡើងថា ការអនុវត្តអនាម័យនៃការគេងបានល្អ និងការគេងពីប្រាំមួយទៅប្រាំបីម៉ោងជារៀងរាល់យប់ គឺជារឿងដ៏ល្អបំផុតមួយ ដែលអ្នកអាចធ្វើបានសម្រាប់សុខភាពខួរក្បាល។ លើសពីនេះ ការគេងជួយខួរក្បាលដំណើរការព័ត៌មានថ្មី បង្កើតការចងចាំ ពង្រឹងសមត្ថភាពការគិត គំនិតថ្មីៗ និងកម្ចាត់ជាតិពុលនៃប្រូតេអ៊ីន ដែលគេស្គាល់ថាជាបន្ទះអាមីឡូអ៊ីដ ដែលជាទូទៅកកកុញនៅក្នុងខួរក្បាលរបស់មនុស្ស និងនាំឱ្យមានជំងឺភ្លេចភ្លាំង។

២. ធ្វើលំហាត់ប្រាណ ៖ លោក Shepherd បន្ថែមថា ការហាត់ប្រាណទៀងទាត់ ជួយបង្កើនលំហូរឈាមទៅកាន់ខួរក្បាល ព្រមទាំងបេះដូងរឹងមាំ ហើយមានសមត្ថភាពជួយបូមឈាមឱ្យបានគ្រប់គ្រាន់បញ្ជូនទៅកាន់ខួរក្បាល។ យោងតាមការស្រាវជ្រាវរបស់ AMERICAN BRAIN FOUNDATION មនុស្សដែលធ្វើលំហាត់ប្រាណទៀងទាត់​អាចជួយកាត់បន្ថយការវិវត្តនៃជំងឺវង្វេង និង ពន្យារការចុះខ្សោយនៃមុខងារយល់ដឹងរបស់ខួរក្បាល នៅពេលឈានចូលវ័យចំណាស់។

៣. ចំណាយពេលជាមួយមិត្តភក្ដិ ៖ លោកស្រី Talia Lerner បាននិយាយថា ភាពឯកោអាចប៉ះពាល់ដល់សុខភាពផ្លូវចិត្ត សុខុមាលភាពផ្លូវអារម្មណ៍ និងសុខភាពខួរក្បាល។ ដូច្នេះវាជារឿងសំខាន់ ដែលយើងត្រូវមានទំនាក់ទំនងជាមួយអ្នកដទៃ។ អ្នកជំនាញរូបនេះបន្ថែមថា ជាទូទៅមនុស្ស ដែលមានទំនាក់ទំនងក្នុងសង្គមល្អ មានទំនោររស់នៅបានយូរ។ ការចំណាយពេលជាមួយមិត្តភក្តិ គឺល្អសម្រាប់ជីវិតផ្លូវចិត្ត និងសុខភាពខួរក្បាល។

៤. សាកល្បងធ្វើរឿងថ្មីៗ ៖ លោក Jason Shepherd បាននិយាយថា ការជួបមនុស្សថ្មីៗ ទីកន្លែងថ្មីៗ និងបញ្ហាប្រឈមថ្មីៗ អាចរធ្វើឱ្យផ្លូវចិត្តប្រសើរឡើង និងពង្រឹងសមត្ថភាពខួរក្បាល។ អ្នកជំនាញរូបនេះ បន្តថា មនុស្សភាគច្រើន មានទម្លាប់ធ្វើរឿងដដែលៗជារៀងរាល់ថ្ងៃ។ ប៉ុន្តែការរៀនអ្វីដែលថ្មីអាចជួយឱ្យខួរក្បាលមានការលូតលាស់ជាប្រចាំ។ លើសពីនេះ ប្រសិនបើអ្នកអាចបន្តប្រើខួរក្បាលរបស់អ្នកតាមរបៀបថ្មីជាទៀងទាត់ ផ្លូវចិត្តរបស់អ្នកនឹងកាន់តែប្រសើរឡើងទៅតាមនោះដែរ នៅពេលអាយុកាន់តែច្រើន។

៥. ជៀសវាងការញ៉ាំអាហារកែច្នៃ៖ ការសិក្សាជាច្រើនបានបង្ហាញថា ការញ៉ាំអាហារកែច្នៃ ដូចជាទំនិញវេចខ្ចប់ គ្រឿងបំពង និងគ្រឿងកំប៉ុង អាចជះឥទ្ធិពលអវិជ្ជមានដល់សុខភាព និងបង្កើនហានិភ័យសុខភាព ដូចជាជំងឺទឹកនោមផ្អែម កូលេស្តេរ៉ុលខ្ពស់ ឬសម្ពាធឈាមខ្ពស់ជាដើម។ ជំងឺទាំងនេះប៉ះពាល់ដល់សរីរាង្គផ្សេងៗតាមវិធីផ្សេងៗគ្នា ប៉ុន្តែជាទូទៅអាចប៉ះពាល់ដល់រាងកាយ និងខួរក្បាល។ លោកស្រី Talia Lerner បានលើកឡើងថា ប្រសិនបើអ្នកមានសម្ពាធឈាមខ្ពស់ អ្នកអាចនឹងមានហានិភ័យខ្ពស់ ក្នុងការមានជំងឺខួរក្បាល ដូចជាជំងឺដាច់សរសៃឈាមខួរក្បាល ឬជំងឺវង្វេងសរសៃឈាមជាដើម។ ការជៀសវាងការញ៉ាំអាហារកែច្នៃឱ្យបានច្រើនតាមដែលអាចធ្វើបាន ជាជម្រើសដ៏ល្អបំផុតសម្រាប់សុខភាពរាងកាយ និងខួរក្បាល៕