មួយរយៈពេលចុងក្រោយមកនេះ ភាពទំនើបនៃបច្ចេកវិទ្យា បានផ្លាស់ប្តូរទាំងស្រុងរាល់របៀបនៃការទំនាក់ទំនង។ ក្នុងនោះកុំព្យូទ័របានគេ​ប្រើប្រាស់ស្ទើរតែគ្រប់សកម្មភាពដើម្បីជំនួសឱ្យការសរសេរ ក៏​ដូចជា​ការកត់ត្រា។ យ៉ាងណាក៏ដោយ ការស្រាវជ្រាវបានរកឃើញថា ការអនុវត្ត​ការ​សរសេរ​ដោយដៃ គឺជួយឱ្យកុមារ និង​យុវវ័យ​អភិវឌ្ឍន៍សាច់ដុំ ព្រមទាំងធ្វើឱ្យចលនាដៃបានលឿនរហ័ស ពង្រឹងស្មារតី ឬជំនាញជាមូលដ្ឋានគ្រឹះចំណេះដឹង បង្កើនភាពច្នៃប្រតិដ្ឋ ការចងចាំ ទំនាក់ទំនង និងកាត់បន្ថយស្រ្តេសជាដើម។

យោងតាមគេហទំព័រ National Handwriting Association បានឱ្យដឹងថា ការ​សរសេរដោយដៃ មានសារៈសំខាន់អាចសម្រួលដល់ការងារនិងតម្រូវការមួយចំនួនដូចជា កត់ត្រាបញ្ជីទិញទំនិញ សរសេរសំបុត្រនៅថ្ងៃខួបកំណើត សរសេរសារឆ្លើយឆ្លង បំពេញព័ត៌មាននៅក្នុងទម្រង់កិច្ចការ ឬលិខិតធនាគារ និងការងារដទៃទៀត ដែលសុទ្ធសឹងជាផ្នែកសំខាន់ក្នុងការរស់នៅប្រចាំថ្ងៃ ។

មួយវិញទៀត ការសិក្សារៀនសូត្រ និងការប្រើប្រាស់ដៃដើម្បីសរសេរអក្សរមានភាពសំខាន់ដោយសារតែ វាបានចូលរួមអភិវឌ្ឍនៅពេលមានការងារដែលត្រូវវាយតម្លៃសមត្ថភាពដោយការសរសេរក្នុងក្រដាស ជាពិសេសពេលសាលាតម្រូវឱ្យសរសេរចម្លើយចូលទៅក្នុងក្រដាសពេលប្រឡង។ ព្រោះនៅតាមតំបន់មួយចំនួនគេនៅតែ​ឱ្យតម្លៃថា ការសរសេរអក្សរដោយដៃជាទម្រង់មួយដើម្បីត្តេសសមត្ថភាពបែបផ្លូវការ ដូច្នេះបើសិនជាកុមារ ឬយុវវ័យ មិនមានទម្លាប់សរសេរដោយដៃទេ នោះឱកាសនៃការទទួលបានលទ្ធផលការសិក្សាល្អ ក៏ថមថយទៅតាមនោះដែរ។

សរុបជារួម ការប្រើប្រាស់ប៊ិចនិងក្រដាស ហើយសរសេរអក្សរដោយដៃ នៅតែដើរតួនាទីយ៉ាងសំខាន់តាំងពីវ័យកុមារ និងសម្រួលដល់ការរស់នៅ ពេលពេញវ័យ។ ទន្ទឹមគ្នានោះ មនុស្សបានផ្លាស់ប្តូរពីការសេសេរដោយសន្លឹកសៀវភៅទៅជាអេឡិចត្រូនិច ក្នុងការទំនាក់ទំនង ហើយមានកុំព្យូទ័រមួយចំនួន មានកម្មវិធីដែលមានសមត្ថភាពសរសេរដោយដៃ, ចំណុចនេះបង្ហាញឱ្យឃើញថា ទោះបីស្ថិតនៅក្នុងជំនាន់ដ៏មានភាពជឿនលឿន គេនៅកែកត់សម្គាល់បានថា ការសរសេរអក្សរដោយដៃ ចាំបាច់ក្នុងការទំនាក់ទំនង អភិវឌ្ឍសមត្ថភាពឱ្យរឹងមាំ និងការរស់នៅប្រចាំថ្ងៃ៕