ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងមហាផ្ទៃបានជំរុញឱ្យសិស្សានុសិស្សទូទាំងប្រទេសគោរពច្បាប់ចរាចរណ៍ឱ្យបានខ្ជាប់ខ្ជួន ជាពិសេសការពាក់មួកសុវត្ថិភាព បើកបរប្រកាន់ស្ដាំ និងរក្សាសណ្ដាប់ធ្នាប់នៅលើដងផ្លូវ ខណៈអាជ្ញាធរបន្តពង្រឹងការអប់រំ និងផ្សព្វផ្សាយនៅតាមសាលារៀន ដើម្បីកាត់បន្ថយគ្រោះថ្នាក់ចរាចរណ៍ក្នុងចំណោមសិស្ស។
លោក ទូច សុឃៈ អ្នកនាំពាក្យរងក្រសួងមហាផ្ទៃ បានប្រាប់ AMS ថា ក្រសួងបានណែនាំជាបន្តបន្ទាប់ដល់រដ្ឋបាលថ្នាក់ក្រោមជាតិ និងកងកម្លាំងនគរបាលគ្រប់លំដាប់ថ្នាក់ ឱ្យចុះអប់រំ និងផ្សព្វផ្សាយអំពីសុវត្ថិភាពចរាចរណ៍ និងការគោរពច្បាប់ចរាចរណ៍នៅតាមសាលារៀន។ លោកបន្ថែមថា អង្គភាពនគរបាលមួយចំនួនក៏បានផ្តល់មួកសុវត្ថិភាពជូនសិស្សដែលមានជីវភាពខ្វះខាតផងដែរ។
លោកមានប្រសាសន៍ថា «ការអប់រំជាបន្តបន្ទាប់បានធ្វើឱ្យសិស្សជាច្រើនចាប់ផ្តើមមានទម្លាប់ល្អក្នុងការធ្វើដំណើរ ដោយពាក់មួកសុវត្ថិភាព បំពាក់កញ្ចក់មើលក្រោយ និងបើកបរដោយមានសណ្ដាប់ធ្នាប់ ទាំងនៅលើផ្លូវជាតិ និងផ្លូវក្នុងភូមិឃុំ»។
ទោះជាយ៉ាងណា លោកបានកត់សម្គាល់ថា នៅតែមានសិស្សមួយចំនួនមិនទាន់អនុវត្តវិធានសុវត្ថិភាពចរាចរណ៍បានពេញលេញ ដោយមិនពាក់មួកសុវត្ថិភាព ជិះម៉ូតូគ្មានកញ្ចក់មើលក្រោយ និងបើកបរខ្វះសណ្ដាប់ធ្នាប់ ដែលជាកត្តាបង្កើនហានិភ័យ នៃគ្រោះថ្នាក់ចរាចរណ៍។
លោកបានអំពាវនាវឱ្យឪពុកម្តាយ សាលារៀន អាជ្ញាធរមូលដ្ឋាន និងសមត្ថកិច្ច បន្តសហការគ្នាអប់រំ និងក្រើនរំលឹកសិស្សានុសិស្សឱ្យគោរពច្បាប់ចរាចរណ៍ ដោយពាក់មួកសុវត្ថិភាព ប្រកាន់ស្ដាំ មិនជិះបញ្ច្រាសទិស មិនជិះទន្ទឹមគ្នា មិនបើកបរប្រកួតប្រជែងល្បឿន និងបើកបរក្នុងល្បឿនដែលអាចគ្រប់គ្រងបាន។
ពាក់ព័ន្ធនឹងការលើកកម្ពស់ការយល់ដឹងអំពីសុវត្ថិភាពចរាចរណ៍ លោក ទូច សុឃៈ បានបញ្ជាក់ថា បន្ទាប់ពីទទួលបានលទ្ធផលជោគជ័យពីការបង្កើត «សួនសុវត្ថិភាពចរាចរណ៍» នៅតាមសាលារៀនក្នុងខេត្តកំពង់ឆ្នាំង ក្រសួងមហាផ្ទៃ និងគណៈកម្មាធិការជាតិសុវត្ថិភាពចរាចរណ៍ផ្លូវគោក មានផែនការពង្រីកគម្រោងនេះជាបន្តបន្ទាប់ទៅកាន់ទីតាំងសាធារណៈផ្សេងៗ ដើម្បីឱ្យប្រជាពលរដ្ឋ ជាពិសេសកុមារ និងយុវជន អាចសិក្សា និងអនុវត្តច្បាប់ចរាចរណ៍ក្នុងបរិយាកាសជាក់ស្តែង។
លោកបានសង្កត់ធ្ងន់ថា ការបណ្ដុះទម្លាប់គោរពច្បាប់ចរាចរណ៍តាំងពីវ័យសិក្សា គឺជាគន្លឹះសំខាន់ក្នុងការកាត់បន្ថយគ្រោះថ្នាក់ចរាចរណ៍ និងការពារអាយុជីវិតប្រជាពលរដ្ឋនាពេលអនាគត។
ជាមួយគ្នានេះ លោក គង់ រតនៈ អ្នកពិគ្រោះយោបល់ឯករាជ្យផ្នែកចរាចរណ៍ជើងគោក បានលើកឡើងថា គ្រោះថ្នាក់ចរាចរណ៍ស្ទើរតែក្លាយជាបញ្ហាប្រចាំថ្ងៃ ដោយករណីគ្រោះថ្នាក់កើតឡើងជាបន្តបន្ទាប់ មិនថានៅថ្ងៃធម្មតា ឬអំឡុងពេលពិធីបុណ្យធំៗនោះទេ។ លោកបានអំពាវនាវឱ្យអ្នកប្រើប្រាស់ផ្លូវទាំងអស់បង្កើនការប្រុងប្រយ័ត្ន និងគោរពច្បាប់ចរាចរណ៍ឱ្យបានម៉ឺងម៉ាត់។
យោងតាមរបាយការណ៍របស់ក្រសួងមហាផ្ទៃ គិតចាប់ពីថ្ងៃទី១ ខែមករា ដល់ថ្ងៃទី១០ ខែមេសា ឆ្នាំ២០២៦ កម្ពុជាមានគ្រោះថ្នាក់ចរាចរណ៍សរុប ៧១០ករណី បណ្តាលឱ្យមនុស្សស្លាប់ ៤៧២នាក់ និងរងរបួស ១.១១៤នាក់។
របាយការណ៍ដដែលបង្ហាញថា មូលហេតុចម្បងនៃគ្រោះថ្នាក់ចរាចរណ៍ រួមមាន ការបើកបរលើសល្បឿនកំណត់ មិនគោរពសិទ្ធិអាទិភាព បើកបរក្រោមឥទ្ធិពលគ្រឿងស្រវឹង និងមិនគោរពសញ្ញាចរាចរណ៍ជាដើម៕
