តាមរយៈ គម្រោង S4C វិទ្យាស្ថានជាតិសហគ្រិនភាព និងនវានុវត្តន៍ (NIEI) កំពុងប្រកាសជ្រើសរើសសិស្ស និស្សិត ចូលសិក្សាអាហារូបករណ៍កម្រិតសញ្ញាបត្រជាន់ខ្ពស់បច្ចេកទេស ជំនាញវិស្វកម្មអគ្គិសនី ចំនួន៤៥០កន្លែង ស​ម្រាប់ឆ្នាំសិក្សា២០២៥-២០២៦។

លក្ខខណ្ឌនៃការជ្រើសរើស ៖ ជាបេក្ខជនដែលបានប្រឡងជាប់ ឬធ្លាក់សញ្ញាបត្រមធ្យមសិក្សាទុតិយភូមិ ឬ សញ្ញាបត្របច្ចេកទេស និងវិជ្ជាជីវៈ៣ ឬសញ្ញាបត្រមានតម្លៃស្មើ។ ចំពោះសិស្សដែលប្រឡងធ្លាក់សញ្ញាបត្រមធ្យមសិក្សាទុតិយភូមិ ត្រូវមានវិញ្ញាបនបត្របញ្ចប់ការសិក្សាថ្នាក់ទី១២ និងជាបុគ្គលដែលមានកាយសម្បទា និងសុខភាពល្អ។

ឯកសារ និងលិខិតចាំបាច់ដែលបេក្ខជនត្រូវភ្ជាប់ និងបំពេញ ៖ ពាក្យសុំអាហារូបករណ៍១ច្បាប់ សញ្ញាបត្រមធ្យមសិក្សាទុតិយភូមិ ឬវិញ្ញាបនបត្របញ្ចប់ការសិក្សាថ្នាក់ទី១២ (បញ្ជាក់រួច) ១ច្បាប់ សញ្ញាបត្របច្ចេកទេស និងវិជ្ជាជីវៈ ៣ (បញ្ជាក់រួច) ១ច្បាប់, ប្រវត្តិរូបសង្ខ្ខេប១ច្បាប់, បង្កាន់ដៃទទួលពាក្យ១ច្បាប់, រូបថតថ្មី (ថតចំពីមុខ គ្មានពាក់វែនតា ទំហំ៤x៦ ចំនួន៤សន្លឹក និង ទំហំ ៣x៤ចំនួន៤សន្លឹក) អត្តសញ្ញាណប័ណ្ណ១ច្បាប់ និងសំបុត្រកំណើត១ច្បាប់។ ចំពោះបេក្ខជនដែលមកពីគ្រួសារក្រីក្រ តំបន់ឆ្ងាយដាច់ស្រយាល និងជនជាតិដើមភាគតិច ត្រូវបានផ្ដល់អាទិភាព។

អត្ថប្រយោជន៍ដែលបេក្ខជនទទួលបានពីអាហារូបករណ៍ ៖ ការសិក្សារយៈពេល២ឆ្នាំ, អគារសិក្សាបំពាក់ដោយសម្ភារៈថ្មី, កម្មវិធីបណ្ដុះបណ្ដាលត្រូវបានរៀបចំដោយជំនាញការសិង្ហបុរី, សម្ភារៈបណ្ដុះបណ្ដាលទំនើប និងសំបូរបែប (និស្សិតបញ្ចប់ការសិក្សាមានសមត្ថភាពខ្ពស់), ផ្ដល់ជូនកន្លែងស្នាក់នៅសម្រាប់និស្សិតមកពីតាមបណ្ដាខេត្ត, ផ្ដល់ជូនប្រាក់ឧបត្ថម្ភប្រចាំខែសម្រាប់និស្សិតឆ្នើម (៦០ដុល្លារក្នុងមួយខែ) និង ផ្ដល់អាទិភាពសម្រាប់សិស្ស-និស្សិតជានារី ជនមានពិការភាព ជនជាតិដើមភាគតិច និងយុវជនមកពីគ្រួសារក្រីក្រ។

បេក្ខជន មានចំណាប់អារម្មណ៍ អាចទៅទទួលពាក្យ និងដាក់ពាក្យនៅវិទ្យាស្ថានជាតិសហគ្រិនភាព និងនវានុវត្តន៍ ដែលមានទីតាំងស្ថិតនៅតាមបណ្ដោយមហាវិថីសហព័ន្ធរុស្សី សង្កាត់ទឹកថ្លា ខណ្ឌសែនសុខ រាជធានីភ្នំពេញ ឬអាចទំនាក់ទំនងតាមរយៈ Facebook Page ៖ វិទ្យាស្ថានជាតិសហគ្រិនភាព និងនវានុវត្តន៍ រៀងរាល់ម៉ោងធ្វើការពីថ្ងៃចន្ទ ដល់ថ្ងៃសៅរ៍។ បេក្ខជនក៏អាចចុះឈ្មោះតាមOnline តាមរយៈ ៖ https://forms.gle/PemuaAn4jqC5w7RB7 ។

សម្រាប់ព័ត៌មានបន្ថែម អាចទំនាក់ទំនងទៅកាន់ 011 298 456 / 010 548 426 / 093 808 057 / 010 266 296 / 010 744 132 / 071 643 5388 ៕