ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា ប្រកាសជ្រើសរើសបេក្ខជនចូលរួមប្រកួតប្រជែងការនិទានរឿងឌីជីថល លើកទី៣ របស់មជ្ឈមណ្ឌលស៊ីមេអូ RECSAM ក្រោមមូលបទ “ស្ទែមនៅក្នុងដែនដីរឿងនិទាន៖ កន្លែងដែលការសិក្សាជួបនឹងអច្ឆរិយៈ”។
កម្មវិធីប្រកួតប្រជែងនេះ ត្រូវបានរៀបចំឡើងក្រោមគោលបំណងចំនួន៤រួមមាន ៖ ទី១. លើកកម្ពស់ការអប់រំស្ទែម ៖ លើកទឹកចិត្តអ្នកចូលរួមឱ្យស្វែងយល់ពីគោលគំនិតឆ្នើម តាមរយៈវិធីសាស្ត្របែបទាក់ទាញ និងច្នៃប្រឌិត, ទី២. អភិវឌ្ឍជំនាញសម្រាប់ពេលអនាគត ៖ ផ្ដល់ឱ្យសិស្សានុសិស្ស និងគ្រូបង្រៀននូវអក្ខរកម្មផ្នែកឌីជីថល និងជំនាញនិទានរឿង ដែលចាំបាច់សម្រាប់ពិភពលោកទំនើប, ទី៣. អបអរសាទរភាពចម្រុះ ៖ បង្ហាញពីគំនិតច្នៃប្រឌិត និងទស្សនៈប្លែកៗរបស់សិស្ស និងគ្រូបង្រៀននៅទូទាំងអាស៊ីអាគ្នេយ៍ និង ទី៤. បំផុសគំនិតច្នៃប្រឌិត ៖ ជំរុញអ្នកចូលរួមឱ្យគិតយ៉ាងល្អិតល្អន់អំពីអនាគតនៃការអប់រំ និងរបៀបដែលស្ទែមអាចជំរុញការផ្លាស់ប្តូរជាវិជ្ជមាន។
សម្រាប់លក្ខខណ្ឌនៃការចូលរួម ៖ ជាសិស្សានុសិស្ស និងគ្រូបង្រៀននៅកម្រិតបឋមសិក្សា និងមធ្យមសិក្សា។ ត្រូវបង្កើតវីដេអូតាមលក្ខខណ្ឌកំណត់របស់អ្នករៀបចំ។ ក្នុងនោះ អ្នកចូលរួមត្រូវបានបែងចែកជា ៣ក្រុមគឺក្រុមប្រភេទ A ៖ សិស្សនៅកម្រិតបឋមសិក្សា មានអាយុចន្លោះពី ៧ ទៅ ១២ ឆ្នាំ (អាចចូលរួមជាបុគ្គល ឬជាក្រុម និងត្រូវមានអាណាព្យាបាល ឬគ្រូដឹកនាំ)។ ក្រុមប្រភេទ B ៖ សិស្សកម្រិតអនុវិទ្យាល័យ មានអាយុចន្លោះពី ១៣ ទៅ ១៨ ឆ្នាំ (ត្រូវចូលរួមជាបុគ្គល និងត្រូវមានអាណាព្យាបាល ឬគ្រូដឹកនាំ)។ ក្រុមប្រភេទ C ៖ គ្រូបង្រៀននៅកម្រិតបឋមសិក្សា ឬមធ្យមសិក្សា (ត្រូវចូលរួមជាបុគ្គល)។
បេក្ខជនជ័យលាភីលេខ១ នឹងទទួលបានថវិកាចំនួន ២០០ ដុល្លារអាមេរិក, ជ័យលាភីលេខ២ និងទទួលបានថវិកាចំនួន ១៥០ ដុល្លារអាមេរិក, និងជ័យលាភីលេខ៣ ទទួលបានថវិកាចំនួន ១០០ ដុល្លារអាមេរិក។ បេក្ខជនដែលមានចំណាប់អារម្មណ៍ចង់ចូលរួមប្រកួតអាចដាក់ពាក្យចូលរួមប្រកួតតាមរយៈ https://forms.gle/S6vK37EsYauiQ14N8។ ផុតកំណត់ទទួលពាក្យនៅថ្ងៃទី១៨ ខែមេសា ឆ្នាំ២០២៥៕
