ការរៀនតន្រ្តីនៅតាមគ្រឹះស្ថានសិក្សា ពិតជាមានសារៈសំខាន់ណាស់ដែលជួយសិស្សឱ្យមានអារម្មណ៍រីករាយ និងបន្ធូរអារម្មណ៍តានតឹងពីការសិក្សាបានមួយកម្រិត។ បច្ចុប្បន្ន សៀវភៅសិក្សាតន្រ្តីជាភាសាខ្មែរនៅតាមសាលាចំណេះដឹងទូទៅហាក់មិនសូវសម្បូរនៅ​ឡើយ ហើយ​នៅតាមសាលាឯកជនមួយចំនួនវិញ បាន​កំពុង​ប្រើប្រាស់សៀវភៅសិក្សាតន្រី្តជាភាសាបរទេស។

លោកស្រី ទេព សុគន្ធារ៉េត ប្រធានផ្នែកបង្រៀនព្យាណូ នៃសាកលវិទ្យាល័យភូមិន្ទវិចិត្រសិល្បៈ និងជាអ្នកដឹកនាំវង់តន្ត្រីយុវជនអង្គរ (ANYO) មានប្រសាសន៍ថា ការសិក្សាពីតន្រ្តី ជាការសិក្សាផ្នែកអារម្មណ៍ ធ្វើឱ្យចូលដល់ជម្រៅចិត្តខាងក្នុង បើទោះជាតន្រ្តីស្ថិតក្នុងផ្នែកអរូបីក៏ពិតមែន ប៉ុន្តែធ្វើឱ្យមានចិត្តរំភើប សប្បាយរីករាយ ធូរស្រាលអារម្មណ៍។ ទន្ទឹមគ្នានេះ វាក៏​ជួយកុមារឱ្យមានការគិតវៃឆ្លាត និងបន្ធូរអារម្មណ៍តានតឹងពីការសិក្សា ព្រោះពេលណាយើងមានអារម្មណ៍ខឹង មួរម៉ៅ នៅពេលបានលេងតន្រ្តី នឹងធ្វើឱ្យអារម្មណ៍នឹងនរមកវិញ។

លោកស្រី សុគន្ធារ៉េត បន្ថែមថា ក្រៅពីជួយផ្នែកអារម្មណ៍ឱ្យរីករាយ តន្រ្តីក៏ជាភាសាភ្លេងតែមួយ ដែលអាចឱ្យមនុស្សមកពីប្រទេសផ្សេងគ្នាអាចលេងភ្លេងជាមួយគ្នាបានតាមរយៈអក្សរភ្លេង។ ​លើសពីនេះ ការរៀនពីតន្រ្តី ក៏ជួយឱ្យមានសាមគ្គីភាព មានទំនាក់ទំនងអន្តរជាតិ ដែលនាំមកនូវសន្តិភាព ពោលគឺការលេងតន្រ្តីដើម្បីសន្តិភាព។

បើតាមប្រធានផ្នែកបង្រៀនព្យាណូ នៃសាកលវិទ្យាល័យភូមិន្ទវិចិត្រសិល្បៈ រូបនេះថា នៅសាលារៀនចំណេះដឹងទូទៅប្រទេសជប៉ុន គេ​មានរៀនអក្សរភ្លេង ដែលធ្វើឱ្យសិស្សរៀនឆាប់ចាប់បានលឿន ប៉ុន្តែនៅប្រទេសកម្ពុជា មិនមានរៀនអក្សរភ្លេង ដែលធ្វើឱ្យពិបាកក្នុងការបង្រៀន ក៏ដូចជាពិបាកឱ្យយល់ដឹងពីវប្បធម៌តន្រ្តី។ ដូច្នេះ ទើបក្រុមវង់តន្ត្រីយុវជនអង្គរ (ANYO) បានចងក្រងសៀវភៅសិក្សាតន្រ្តីរីករាយជាភាសាខ្មែរ ចំនួន៦ក្បាលតាមគំនិតផ្ដួចផ្ដើមរបស់លោកស្រីបណ្ឌិត Miya Choi គ្រូបង្រៀនព្យាណូស្ម័គ្រចិត្តនៅអនុវិទ្យាល័យវិចិត្រសិល្បៈ អ្នកនិពន្ធ និងជាសាស្រ្តាចារ្យ នៃវិទ្យាសា្ថន Cambodia Presbyterian Theological និងដោយមានការសហការជាមួយក្រសួងអប់រំ យុវជន និងកីឡា សម្រាប់ការបង្រៀនតន្រ្តីនៅតាមសាលារដ្ឋ និងសាលាឯកជននានា។

នៅក្នុង​សៀវភៅសិក្សាតន្ត្រីរីករាយ ផ្ដោតលើការរៀនអក្សរភ្លេង ការរៀនពីប្រវត្តិ យល់ដឹងពីឧបករណ៍តន្រ្តីពិភពលោក ឧបករណ៍តន្រ្តីបុរាណខ្មែរ និងបទចម្រៀងកុមារខ្មែរ បទចម្រៀងកុមារបរទេស បទប្រពៃណីជាតិល្បីៗទូទាំងពិភពលោក។ លើសពីនេះ បង្រៀនឱ្យស្គាល់ពីអ្នកនិពន្ធ តន្ដ្រីករ និងចំណេះដឹងជាច្រើនទៀតទាក់ទងនឹងតន្រ្តី។ បន្ថែមពីនេះ មានលេងល្បែងពីចង្វាក់ទាក់ទងនឹងតន្រ្តី ដើម្បីឆាប់ងាយយល់ ដោយផ្ដោតសំខាន់លើការចេះអានអក្សរភ្លេង ហើយនៅពេលឡើងថ្នាក់ធំមានរៀនព្យាណីកា និងរៀនឧបករណ៍ផ្លុំជាដើម។

សម្រាប់សៀវភៅ​តន្រ្តីដែល​លោកស្រី ទេព សុគន្ធារ៉េត រួមជាមួយ​ក្រុមការងារបានចងក្រងនេះ ឯកឧត្តមបណ្ឌិត​សភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានកោតសរសើរ និងថ្លែងអំណរគុណចំពោះការយកចិត្តដាក់ខិតខំប្រឹងប្រែងរៀបចំចងក្រងសៀវភៅតន្រ្តីជាច្រើនក្បាលនេះឡើង ប្រកបដោយគុណភាព និងមានភាពទាក់ទាញសម្រាប់កុមារ និងយុវជនវ័យក្មេង ព្រមទាំងបានឯកភាពគាំទ្រដល់ការរៀបចំវគ្គបណ្ដុះបណ្ដាលគ្រូបង្រៀនតន្រ្តី (ជាមួយសៀវភៅសិក្សាតន្រ្តី) និងគាំទ្រដល់ការសម្របសម្រួលក្នុងដំណើរការនេះឱ្យរលូន និងជោគជ័យ។

យ៉ាងណាក៏ដោយ​លោកស្រី ទេព សុគន្ធារ៉េត សង្ឃឹមថា សៀវភៅសិក្សាតន្រ្តីនេះ នឹងបានចែកជូនបង្រៀននៅទូទាំងប្រទេស ហើយ​និងបានធ្វើការបណ្ដុះបណ្ដាលគ្រូបង្រៀនតន្រ្តីក្នុងការប្រើប្រាស់សៀវភៅសិក្សាតន្ត្រីទាំងនេះ ដើម្បីធានាឱ្យបាននូវប្រសិទ្ធភាពក្នុងការបង្រៀន។

គួរជំរាបជូនថា សៀវភៅសិក្សាតន្រ្តីរីករាយ ត្រូវ​បានចងក្រងតាមកម្រិត ដោយ​មានសរុបចំនួន ៦ក្បាល ក្នុងនោះបានបោះពុម្ពរួចចំនួន១ពាន់ច្បាប់ ហើយ​គ្រោងនឹងបោះពុម្ពបន្ថែម​ចំនួន​៦ពាន់ច្បាប់ទៀតក្នុងពេលខាងមុខ៕