ការមើលកុន ឬទស្សនាខ្សែភាពយន្តបានក្លាយជាវិធីសាស្ត្រដ៏មានប្រជាប្រិយភាពបំផុតមួយ ដើម្បីបន្ធូរភាពតានតឹងសម្រាប់យុវវ័យសម័យថ្មី ។ លើសពីនេះ គេសង្កេតឃើញថា ខ្សែភាពយន្តបែបវិទ្យាសាស្ត្រប្រឌិត ហាក់ទទួលបានការគាំទ្រយ៉ាងខ្លាំងពីសំណាក់អ្នកទស្សនាគ្រប់មជ្ឈដ្ឋាន ដោយមិនគ្រាន់តែមានតម្លៃសម្រាប់ការកម្សាន្តអារម្មណ៍មួយមុខទេ ប៉ុន្តែខ្សែភាពយន្តប្រភេទនេះ ក៏បានផ្ដល់នូវអត្ថប្រយោជន៍ជាច្រើនផងដែរ ជាពិសេស​ជួយ​ដល់​ការ​គិតរបស់យើងផងដែរ។

ខាងក្រោមនេះគឺជាលក្ខណៈពិសេសចំនួន ៦ សំខាន់ៗ ពីការ​ទស្សនា​រឿងបែបវិទ្យាសាស្ត្រ ៖

១. បើកផ្លូវសម្រាប់ការគិតបែបស៊ីជម្រៅ ៖ ការគិតបែបស៊ីជម្រៅ និងប្រកបដោយភាពច្នៃប្រឌិតខ្ពស់ គឺជាទេពកោសល្យដ៏សំខាន់បំផុតដែលមនុស្សនៅក្នុងសម័យកាលជឿនលឿនចាំបាច់ត្រូវមានដោយខានពុំបាន។ ជំនាញគិតស៊ីជម្រៅអនុញ្ញាតឱ្យយើងមើលឃើញបញ្ហា និងស្ថានភាពចំពោះមុខក្នុងរូបភាពថ្មី និងងាយស្រួលប្រឈមមុខដោះស្រាយជាងមុន។ ការទស្សនាភាពយន្តវិទ្យាសាស្ត្រ នឹងបង្ហាញអំពីបញ្ញាត្តិគំនិតថ្មីៗ ប្លែកៗ ដែលអនុញ្ញាតឱ្យអ្នកមើលឃើញពិភពលោកកាន់តែទូលំទូលាយ ដោយទទួលបាននូវគំនិតថ្មីៗ និងយល់អំពីរឿងរ៉ាវថ្មីៗអំពីបច្ចុប្បន្នភាព និងអនាគតនៃការរស់នៅរបស់មនុស្ស។ ម្ល៉ោះហើយ វាជាចំណីខួរក្បាលដ៏សំខាន់ ដែលអនុញ្ញាតឱ្យយើងព្យាករណ៍អំពីទំហំនៃបញ្ហា និងងាយស្រួលរកដំណោះស្រាយ។

២. ផ្ដល់ដើមទន់ដើម្បីគិតពីអនាគតមួយដ៏ប្រសើរ ៖ អ្នកនិពន្ធខ្សែភាពយន្តវិទ្យាសាស្ត្រ តែងតែបង្ហាញអំពីគំនិត និងរបៀបដោះស្រាយបញ្ហាប្រឈមរបស់ពិភពលោកនាថ្ងៃអនាគត។ បើទោះជាយើងមិនអាចយកគំនិតទាំងនោះមកអនុវត្តក្នុងតថភាពសង្គមជាក់ស្ដែងបានទាំងស្រុង យ៉ាងហោចណាស់ការបង្ហាញទាំងនោះអាចឱ្យយើងដឹងអំពីរូបភាព នៃអនាគតមួយដែលយើងស្រមៃចង់បាន។

តាមរយៈការបង្ហាញពីពិភពលោកនាពេលអនាគតពោរពេញដោយបច្ចេកវិទ្យាខ្ពស់ដែលផ្ដល់នូវជីវិតដ៏ល្អប្រសើរសម្រាប់មនុស្ស ភាពយន្តប្រភេទនេះ បណ្ដុះគំនិតឱ្យអ្នកទស្សនាស្រមៃអំពីពិភពលោកមួយដែលមានភាពជឿនលឿន និងស៊ីវិល័យសម្រាប់ខ្លួនឯងដែរ ហេតុផលនេះជំរុញឱ្យពួកគេខិតខំប្រឹងប្រែងធ្វើការខ្លាំងជាងមុន ដើម្បីសម្រេចបានគោលបំណងនេះ។

៣. ឆ្លុះបញ្ចាំងពីបញ្ហាសង្គមនាពេលអនាគត ៖ ជាមួយនឹងបញ្ញាត្តិនៃការ​ស្រមើស្រមៃអំពីអនាគតមួយ ដែលបញ្ហាទាំងអស់ត្រូវគ្រប់គ្រងលែងបាន ឬធ្លាក់ចូលទៅក្នុងវិបត្តិអ្វីមួយ គោលគំនិតអ្នកនិពន្ធតែងបង្ហាញពីដំណោះស្រាយចំពោះវិបត្តិទាំងនោះជានិច្ច ដោយជួនកាលវាអាចជាបញ្ហាដែលទាក់ទងនឹងវិទ្យាសាស្ត្រ ឬវិបត្តិផ្សេងៗទៀតជាច្រើន។ រឿងប្រភេទនេះបំផុសគំនិតឱ្យអ្នកទស្សនាគិតអំពីផលវិបាកដែលខ្លួនឯងអាចជួបប្រទះនៅថ្ងៃខាងមុខ និងរិះរកមធ្យោ​បាយថ្មីៗ ដើម្បីទប់ស្កាត់បញ្ហាទាំងនោះទុកជាមុន។ ម្យ៉ាងវិញទៀត សកម្មភាពនេះក៏ជាការត្រៀមខ្លួន ដើម្បីចូលរួមបង្កើតសង្គមមួយដែលមានប្រជាជនមានផ្នត់គំនិតជឿនលឿន និងដើរទាន់ដំណើរការនៃការអភិវឌ្ឍសង្គម។

៤. ពង្រឹងសមត្ថភាពក្នុងការផ្ចង់អារម្មណ៍ ៖ ប្រសិនបើអ្នកខ្វះការផ្ដោតអារម្មណ៍ សមត្ថភាពក្នុងការគិតរបស់អ្នកនឹងកាន់តែចុះខ្សោយ ហើយវាពិតជាប៉ះពាល់ខ្លាំងដល់ការបំពេញការងារ និងការរស់នៅប្រចាំថ្ងៃ ។ សមត្ថភាពក្នុងការផ្ចង់ ឬផ្ដោតអារម្មណ៍ក្នុងការបំពេញកិច្ចការ គឺជាធាតុសំខាន់បំផុតសម្រាប់មនុស្ស ជាពិសេសយុវជនក្នុងពេលបច្ចុប្បន្នតែម្ដង ព្រោះវាជាផ្នែកមួយក្នុងការ​ពង្រឹងសមត្ថភាពខួរក្បាល ដែលរួមមាន ទស្សនៈ ការចងចាំ ការរៀនសូត្រអ្វីថ្មី ការវិភាគវែកញែក ការសម្រេចចិត្តជាដើម។

ស្របតាមហេតុផលនេះ នៅពេលដែលអ្នកទស្សនាភាពយន្តបែបវិទ្យាសាស្ត្រ អ្នកច្បាស់ជាចង់យល់អំពីដំណើររឿង និងហេតុការណ៍ថ្មីៗប្រកបដោយភាពច្នៃប្រឌិតខ្ពស់របស់អ្នកនិពន្ធដែលនឹងកើតឡើងជាបន្តបន្ទាប់ពីមួយវគ្គទៅមួយវគ្គ។ ហេតុនេះការដាក់អារម្មណ៍ទាំងស្រុងចំពោះសកម្មភាពតួរអង្គនឹងកើតមានឡើងដោយស្វ័យប្រវត្តិ ហើយវាក៏អាចក្លាយជាទម្លាប់សម្រាប់អ្នកក្នុងការធ្វើរឿងផ្សេងៗទៀត ហើយទម្លាប់នេះក៏ជួយបង្កើនផលិតភាពការងារឱ្យកាន់តែប្រសើរផងដែរ។

៥. កាត់បន្ថយភាពតានតឹង ៖ ពេលខ្លះជីវិតរស់នៅប្រចាំថ្ងៃរបស់យើងម្នាក់ៗគឺពិតជាមានភាពស្មុគស្មាញខ្លាំង ដែលតម្រូវឱ្យយើងស្វែងរកវិធីរំដោះខ្លួនចេញពីស្ថានភាពតានតឹងទាំងនោះភ្លាមៗ ។ មនុស្សមួយចំនួនបានសម្រេចចិត្តសម្រាកនៅផ្ទះ ខ្លះជួបជុំមិត្តភក្តិជជែកកម្សាន្ត និងអ្នកខ្លះទៀតចំណាយពេលវិស្សមកាលនៅតំបន់ទេសចរណ៍ផ្សេងៗ ដើម្បីលំហែកាយ ដោយស្រូបយកខ្យល់អាកាលបរិសុទ្ធ។

ទន្ទឹមនឹងនេះការទស្សនាភាពយន្តវិទ្យាសាស្រ្តក៏ជាវិធីសាស្ត្រមួយដ៏ល្អឥតខ្ចោះ សម្រាប់ការសម្រាកខួរក្បាល កម្សាន្តអារម្មណ៍ និងបន្ធូរភាពតានតឹងផងដែរ ព្រោះនៅពេលទស្សនាជក់ចិត្ត អ្នកនឹងភ្លេចអស់ទុក្ខកង្វល់ និងបញ្ហាផ្សេងៗទៀត ដោយរវល់ផ្ដោតអារម្មណ៍នៅលើការមើលរឿងឱ្យយល់តែមួយមុខប៉ុណ្ណោះ។ ម្ល៉ោះហើយ សកម្មភាព​នេះអាចធ្វើឱ្យអារម្មណ៍របស់អ្នកមានភាពប្រសើរឡើងវិញ និងផ្ដល់ឱ្យអ្នកនូវពេលវេលាសម្រាក និងដកខ្លួនចេញពីជីវិតពិតបានមួយគ្រាផងដែរ។

៦. បង្កើនភាពឈ្លាសវៃផ្លូវអារម្មណ៍ (Emotional Intelligence) ៖ ភាពឈ្លាសវៃផ្លូវអារម្មណ៍ (Emotional Intelligence) ត្រូវគេដឹងជាទូទៅថា ជាចរិតលក្ខណៈដ៏សំខាន់ដែលជួយឱ្យទំនាក់ទំនង ការគ្រប់គ្រងការងារ ការដោះស្រាយបញ្ហា និងសមត្ថភាពចូលរួមធ្វើការជាមួយអ្នកដទៃកាន់តែមានភាពប្រសើរឡើង។ ប្រសិនបើអ្នកចង់ពង្រឹងភាពឈ្លាសវៃផ្លូវអារម្មណ៍ ការទស្សនាភាពយន្តបែបវិទ្យាសាស្ត្រក៏ជាវិធីសាស្ត្រមួយដ៏មានប្រសិទ្ធភាពផងដែរ ព្រោះថា ខណៈពេលទស្សនាអ្នកនឹងដាក់អារម្មណ៍ខ្លួនឯងចូលទៅក្នុងខ្សែជីវិតរបស់តួរអង្គដែលអ្នកចូលចិត្ត​ និងតួរអង្គផ្សេងៗជាច្រើនទៀត។ ដំណើរការនេះ នឹងធ្វើឱ្យអ្នកយល់ពីអារម្មណ៍របស់តួរអង្គនីមួយៗនៅក្នុងរឿងបានច្រើន ហើយការទទួលដឹងអារម្មណ៍អ្នកដទៃ ក៏ជាការបើកផ្លូវឱ្យអ្នកអាចអភិវឌ្ឍរបៀបស្វែងយល់អំពីការគិតរបស់មនុស្សក្នុងជីវិតពិតជាក់ស្ដែងបានល្អ និងអាចសម្របខ្លួនទៅក្នុងមជ្ឈដ្ឋានជុំវិញខ្លួន និងសង្គមកាន់តែងាយស្រួល៕