អ្នកជំនាញផ្នែកពត់តម្រង់ធ្មេញលើកឡើងថា មិនមែនមនុស្សគ្រប់គ្នាសុទ្ធតែអាចពត់ធ្មេញបានទេ ជាពិសេស អ្នកមានបញ្ហាសុខភាពទូទៅ ហើយអ្នកជំងឺពុកឆ្អឹង ត្រូវបានគេហាមឃាត់សម្រាប់ការពត់ធ្មេញនេះ។

ទន្តបណ្ឌិតឯកទេស ហេង ស្រីនិច ជាសហស្ថាបនិក និង ជាប្រធានផ្នែកពត់តម្រង់ធ្មេញ នៃមន្ទីរព្យាបាលមាត់ធ្មេញ Qualitooth មានប្រសាសន៍ថា មូលហេតុដែលអ្នកមានបញ្ហាសុខភាព ជាពិសេសជំងឺពុកឆ្អឹង មិនអាចពត់ធ្មេញបាន ព្រោះនៅពេលដែលអ្នកជំនាញធ្វើការពត់ ឬទាញធ្មេញរបស់គាត់ ឆ្អឹងនៅកន្លែពត់នោះ នឹងមិនដុះមកវិញទេ ដែលអាចប៉ះពាល់ដល់សុខភាពមាត់ធ្មេញរបស់អ្នកជំងឺ។ អ្នកជំនាញរូបនេះបន្តថា ក្រៅពីជំងឺពុកឆ្អឹង អ្នកដែលមានឆ្អឹងវៀចខ្លាំងពេក ក៏មិនអាចពត់បានដែរ ហើយប្រសិនបើអ្នកជំងឺចង់ពត់ គឺតម្រូវឱ្យធ្វើការវះកាត់កែឆ្អឹងបន្ថែម។

បើតាមអ្នកជំនាញរូបនេះ សម្រាប់បុគ្គលដែលមានសុខភាពល្អ គឺអាចពត់ធ្មេញបានដោយមិនចាំបាច់បារម្ភពីបញ្ហាសុខភាពនោះទេ។ ប៉ុន្តែក្នុងករណីដែលបុគ្គលម្នាក់កំពុងតែមានបញ្ហាសុខភាពទូទៅ ដូចជា ជំងឺលើសឈាម ជំងឺបេះដូង ឬជំងឺទូទៅណាមួយ គឺគាត់មិនអាចពត់ធ្មេញបានទេ។ ដូច្នេះ មុនពេលសម្រេចចិត្តពត់ធ្មេញ អ្នកជំងឺ ត្រូវពន្យល់ប្រាប់ពីស្ថានភាពសុខភាពរបស់ខ្លួន ឱ្យបានលម្អិតទៅកាន់គ្រូពេទ្យ។

ចំពោះអ្នកដែលអាចពត់ធ្មេញបាន នឹងទទួលបានអត្ថប្រយោជន៍សំខាន់ចំនួន ២ រួមមាន ទី១ លើកកម្ពស់សោភណ្ឌភាពទម្រង់មុខ និងទី២ ធ្វើឱ្យសុខភាពមាត់ធ្មេញល្អប្រសើរ។ សម្រាប់សោភណ្ឌភាពទម្រង់មុខ ទន្តបណ្ឌិតឯកទេស ហេង ស្រីនិច បានលើកឡើងថា អ្នកមានបញ្ហាមុខក្រពុង សើចចេញអញ្ចាញខ្លាំង និងធ្មេញមានចន្លោះធំ នឹងប្រែប្រួលមកល្អប្រសើរច្រើន។ ដោយឡែកចំពោះបញ្ហាសុខភាព អ្នកជំនាញរូបនេះ បញ្ជាក់ថា ការពត់ធ្មេញ នឹងធ្វើឱ្យមុខងារទំពាររបស់អ្នកជំងឺល្អជាងមុន និងធ្វើឱ្យធ្មេញត្រង់ជួរ។

យ៉ាងណាក៏ដោយ ដើម្បីទទួលបានលទ្ធផលល្អ ក្នុងការពត់ធ្មេញ លោកស្រីបានលើកទឹកចិត្តឱ្យអ្នកដែលពត់ធ្មេញ សម្អាតធ្មេញជាប្រចាំ ក្រោយពេលញ៉ាំអាហារ។

“នៅពេលដែលគាត់ពាក់ដែកពុតធ្មេញ សំខាន់បំផុតគឺ ក្រោយពេលញ៉ាំអាហារ ត្រូវតែដុសធ្មេញ ប្រសិនបើមួយថ្ងៃញ៉ាំ ១០ដង ត្រូវដុសសម្អាតធ្មេញទាំង ១០ដង និងអាចប្រើកូនច្រាស់តូច ដើម្បីសម្អាតឱ្យបានស្អាតនៅចន្លោះធ្មេញ”

លើសពីនេះ ក្រោយពេលដោះដែកចេញ អ្នកជំងឺត្រូវតែជួបគ្រូពេទ្យដើម្បីសម្អាតធ្មេញ និងពិនិត្យមើលការវិវត្តន៍នៃស្ថានភាពធ្មេញ ជារៀងរាល់៦ខែម្ដង៕