ភ្នំពេញ – ក្រសួងអប់រំ និងអង្គការពាក់ព័ន្ធកំពុងធ្វើការយកចិត្តទុកដាក់លុបបំបាត់ការប្រើប្រាស់បារីអេឡិចត្រូនិច និងផលិតផលអេច៍ធីភី នៅក្នុងគ្រឹះស្ថានសិក្សាទូទាំងប្រទេស។ នេះជាការលើក​ឡើងរបស់លោកជំទាវបណ្ឌិត សឿន សុជាតា អនុរដ្ឋលេខាធិការក្រសួងអប់រំ យុវជន និងកីឡា ក្នុង​ឱកាស​ចូលរួម​កម្មវិធី​ប្រកួតវោហារស័ព្ទ វគ្គផ្តាច់ព្រ័ត្រ​ក្រោម​ប្រធានបទ «ការលុបបំបាត់ការប្រើប្រាស់បារីអេឡិចត្រូនិច និងផលិតផលអេច៍ធីភី ដើម្បីលើកកម្ពស់សុខភាពសិក្សា» កាលពីថ្ងៃទី១ ខែមីនា កន្លងទៅនេះ។

លោកជំទាវ សឿន សុជាតា មានប្រសាសន៍ថា បារីអេឡិចត្រូវនិច និងផលិតផលអេច៍ធីភី មានផលប៉ះពាល់យ៉ាងច្រើនទៅលើសុខភាពរបស់អ្នកអប់រំ អ្នកសិក្សា រួមទាំងប្រជាជនកម្ពុជាទាំងមូល ។ ទន្ទឹមគ្នានេះ ក្រសួងអប់រំ យុវជន និងកីឡាបានខិតខំអនុវត្តនូវសេចក្ដីណែនាំពីការលក់ដូរ ការជួញដូរ ការដាក់តាំង ការបង្ហាញដើម្បីទាក់ទាញអារម្មណ៍ទៅលើផលិតផលអេឡិចត្រូនិចនេះ ដោយត្រូវហាមឃាត់នៅតាមគ្រឹះស្ថានសិក្សាគ្រប់កម្រិតនៅទូទាំងប្រទេស ។

បើតាម​ប្រសាសន៍របស់​លោកជំទាវអនុរដ្ឋលេខាធិការ បច្ចុប្បន្ន​ក្រសួងអប់រំ យុវជន និងកីឡា បានដាកបញ្ចូលប្រធានបទដែលពាក់ព័ន្ធទៅនឹងគ្រោះថ្នាក់នៃការប្រើប្រាស់បារី ផ្សែងបារី និងបារីអេឡិចត្រូនិចទាំងអស់នេះ ទៅក្នុងកម្មវិធីលើកកម្ពស់សុខភាពសិក្សារួចទៅហើយ។ លើសពីនេះ នៅក្នុងគោលនយោបាយជាតិស្ដីពីសុខភាពសិក្សា ក្រសួងក៏បានធ្វើការអប់រំផ្សព្វផ្សាយ ដោយបានចុះអនុវត្តការងារដែលមានការគាំទ្រជាមួយអង្គការសុខភាពពិភពលោក និងអង្គការចលនាដើម្បីសុខភាពកម្ពុជាផងដែរ តាមរយៈការធ្វើសិក្ខាសាលាផ្សព្វផ្សាយ ប៉ុន្តែនៅមានកម្រិតនៅឡើងដោយសារកត្តាពេលវេលា និងខ្វះខាតថវិកា។

“ខ្ញុំសូមថ្លែងអំណរគុណយ៉ាងជ្រាលជៅដល់អង្គការចលនាដើម្បីសុខភាពកម្ពុជា និងអង្គការសុខភាពពិភពលោកដែលបានរួមចំណែកជួយក្រសួងអប់រំលើកកម្ពស់សុខភាពសិក្សាជូនដល់អ្នកអប់រំ ក៏ដូចជាអ្នកសិក្សានៅទូទាំងប្រទេស ព្រោះការលើកកម្ពស់សុខភាពសិក្សានេះ ជាកត្តាសំខាន់បំផុត”

– លោកជំទាវ សឿន សុជាតា អនុរដ្ឋលេខាធិការក្រសួងអប់រំ យុវជន និងកីឡា ។

បារីអេឡិចត្រូនិក (Electronic Nicotine Delivery System-EDNS) និងអេចឈ៍ ធី ភី (HTPs-Heated Tobacco Product) ជាផលិតផលថ្នាំជក់ថ្មី ដែលត្រូវបានគេផលិតឡើង ដើម្បីជំនួសផលិតផលថ្នាំជក់ធម្មតា ជាពិសេស ទាក់ទាញឱ្យមានការប្រើប្រាស់ក្នុងចំណោមយុវវ័យ។ វាត្រូវបានគេប្រើប្រាស់ តាមរយៈឧបករណ៍ម្យ៉ាងដែលប្រើថ្មពិលបង្កើតថាមពលកម្តៅក្នុងការបំលែងអង្គធាតុ ដែលដាក់ចូលឧបករណ៍នោះឱ្យទៅជាចំហាយ ហើយត្រូវបានពលរដ្ឋខ្មែរទូទៅ ព្រមទាំងយុវជនសិស្សសាលាមួយចំនួនប្រើប្រាស់ជាបន្តបន្ទាប់ផងដែរ។

បើតាមការបោះពុម្ភផ្សាយរបស់ The Education State បានឱ្យដឹងថា ការស្រូបចំហាយបារីអេឡិចត្រូនិចអាចបណ្ដាលឱ្យមានគ្រោះថ្នាក់ខ្លាំងក្នុងរយៈពេលខ្លី និងរយៈពេលវែង សូម្បីតែបារីអេឡិចត្រូចមិនមានសារធាតុនីកូទីនត្រូវបានប្រើក៏ដោយ។ ក្នុងនោះផលប៉ះពាល់រយៈពេលខ្លី រួមមាន ការក្អួតចង្អោរ ក្អក ដង្ហើមខ្លី ការក្រហាយមាត់ និងជំងឺមហារីក។ ចំណែក ផលប៉ះពាល់រយៈពេលវែង រួមមាន ការខូចសួត ជំងឺបេះដូង និងជំងឺមហារីក៕