ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសង្កេតមិនមែនត្រឹមតែជាសកម្មភាពនោះទេ ប៉ុន្តែវាជា ជំនាញដ៏សំខាន់ ដែលតម្រូវឱ្យយើងប្រើប្រាស់ស្មារតីផ្តោតទៅលើបរិយាកាសជុំវិញខ្លួន ទាំងព្រឹត្តិការណ៍ អាកប្បកិរិយា និងសកម្មភាពនានា។ ការមានទម្លាប់សង្កេតបានល្អ រួមចំណែកយ៉ាងធំធេង ដល់ការប្រាស្រ័យទាក់ទងប្រកបដោយប្រសិទ្ធភាព។ ជាងនេះទៅទៀត ការអភិវឌ្ឍជំនាញនៃការសង្កេតបានជំរុញឱ្យមានជំនាញ ស្តាប់ ជំនាញ នៃការសម្រេចចិត្តបានប្រសើរជាងមុន និងការឆ្លើយតបជាមួយអ្នកដទៃសមហេតុផលជាងមុន ដែលចំណុចទាំងនេះ ជាការរួមចំណែកជំរុញភាពជោគជ័យទាំងជីវិតផ្ទាល់ខ្លួន និងអាជីពវិជ្ជាជីវៈ។
តាមរយៈ Stevekeating បានបង្ហាញគន្លឹះមួយចំនួន ក្នុងការពង្រឹងជំនាញសង្កេតឱ្យមានប្រសិទ្ធភាពជាងមុន និងមានលម្អិតបន្ថែមនៅខាងក្រោម ៖
អនុវត្តន៍សកម្មភាពដែលនាំឱ្យស្មារតីរឭកដឹង (Mindfulness) ៖ ស្មារតីរឭកដឹង គឺជាសកម្មភាពទាំងឡាយណាដែលប្រព្រឹត្តិទៅហើយនាំឱ្យចិត្តនឹងធឹង ដោយការផ្តោតលើអ្វីដែលកំពុងតែធ្វើ មិនថា លោកអ្នកកំពុងតែដើរ ឬកំពុងតែនិយាយ ឬក៏កំពុងតែទទួលទានអាហារនោះទេ គួរតែប្រើប្រាស់ញាណទាំងប្រាំឱ្យអស់លទ្ធភាព (ចក្ខុវិញ្ញាណ សោតវិញ្ញាណ ជីវ្ហាវិញ្ញាណ ឃានវិញ្ញាណ និងកាយវិញ្ញាណ) ដូចជា ការប្រើប្រាស់ភ្នែក សម្រាប់មើលអ្វីដែលកើតមានជុំវិញខ្លួន ការប្រើត្រចៀកសម្រាប់ស្តាប់សម្លេងជុំវិញខ្លួន ប្រើអណ្តាតសម្រាប់សាកល្បងរស់ជាតិ ប្រើច្រមុះសម្រាប់ហិតក្លិន និងប្រើស្បែកដូចជាម្រាមដៃដើម្បីយកទៅពាល់ឱ្យដឹងពីសីតុណ្ហភាព ឬដើម្បីឱ្យដឹងក្តៅត្រជាក់ជាដើម ដែលការអនុវត្តទាំងនេះហើយ វាបានរួមចំណែកជំរុញឱ្យស្មារតីស្ថិតក្នុងបច្ចុប្បន្នភាព។
មិនស្លន់ស្លោ ៖ ភាពប្រញាប់ប្រញាល់ អាចនឹងធ្វើឱ្យបាត់បង់ភាពលម្អិតដែលកើតមាននៅជុំវិញខ្លួន ព្រោះនៅពេលដែលលោកអ្នកចង់សង្កេតនរណាម្នាក់ ឬក៏ព្រឹត្តិការណ៍អ្វីមួយត្រូវការពេលវេលា និងមិនស្លន់ស្លោពេក មិនប្រញាប់ពេក និងត្រូវការផ្ចង់ស្មារតីសង្កេតលើអ្វីមួយឱ្យបានហ្មត់ចត់។ បន្ទាប់ពីសង្កេតហើយ គឺត្រូវការពេលវេលាក្នុងការឆ្លុះបញ្ចាំង អំពីអ្វីដែលបានកត់សម្គាល់ អំពីអ្វីដែលបានយល់ឃើញ ដែលកត្តានេះជួយពង្រឹងជំនាញសង្កេតឱ្យកាន់តែមានប្រសិទ្ធភាព។
ការសួរបញ្ជាក់ ៖ ការសង្កេតមិនមែនជាការដាក់បញ្ចូលតែគំនិតផ្ទាល់ខ្លួន ឬក៏ការវាយតម្លៃដោយផ្អែកទៅតាមអ្វីដែលបានឃើញឬឮ តែមួយមុខប៉ុណ្ណោះទេ ប៉ុន្តែជាការបញ្ជាក់បន្ថែមតាមរយៈការបំផុសជាប្រធានបទ ឬក៏ការចោទជាសំណួរបន្ថែមជាដើម។
ការកត់ត្រា ៖ ការកត់ត្រាជួយឱ្យការចងចាំ និងការវិភាគអំពីអ្វីដែលបានសង្កេតកាន់តែទទួលបាននូវព័ត៌មានលម្អិត និងច្បាស់ជាងមុន ហើយការកត់ត្រាទៀតសោត មានច្រើនទម្រង់ដូចជាការសរសេរ ការគូសគំនូរ និងការថតសម្លេងជាដើម។ ការកត់ត្រាក៏បានរួមចំណែកក្នុងការផ្ទៀងផ្ទាត់ព្រឹត្តិការណ៍ និងការទទួលបានទិន្នន័យបន្ថែមផងដែរ៕
