ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា បានប្រកាសដាក់ឱ្យអនុវត្តគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) ដើម្បីបណ្ដុះមូលធនមនុស្សលើជំនាញវិទ្យាសាស្ត្រ និងបច្ចេកវិទ្យាឌីជីថលកម្រិតខ្ពស់។
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ស្របតាមចក្ខុវិស័យ និងទិសដៅយុទ្ធសាស្រ្តរបស់រាជរដ្ឋាភិបាល គម្រោង SE4HC បានដើរតួនាទីយ៉ាងសំខាន់ក្នុងការវិនិយោគមូលធនមនុស្សដែលមានជំនាញវិទ្យាសាស្ត្រ និងបច្ចេកវិទ្យាឌីជីថលកម្រិតខ្ពស់ ដើម្បីលើកកម្ពស់ផលិតភាពសេដ្ឋកិច្ចកម្ពុជាក្នុងយុគសម័យឌីជីថល។
ឯកឧត្តមបណ្ឌិតសភាចារ្យសង្កត់ធ្ងន់ថា គុណតម្លៃនៃគម្រោងនេះ បានជួយពង្រឹងប្រសិទ្ធភាពនៃប្រព័ន្ធអប់រំមធ្យមសិក្សាកម្ពុជាឱ្យមានគុណភាព សមធម៌ សមភាពយេនឌ័រ និងមានភាពធន់នឹងបម្រែបម្រួលអាកាសធាតុ តាមរយៈការដាក់ចេញការអនុវត្តនូវអភិក្រមដំណោះស្រាយ ដែលមាននវានុវត្តន៍ និងបច្ចេកវិទ្យាអប់រំ (EdTech) ដើម្បីជំរុញការបង្រៀន និងការរៀនវិទ្យាសាស្រ្ត និងបច្ចេកវិទ្យាឌីជីថល ឱ្យមានលក្ខណៈអន្តរកម្ម និងភាពជាក់ស្តែង។
ជាមួយគ្នានេះដែរ រដ្ឋមន្រ្តីក្រសួងអប់រំ ក៏បានថ្លែងអំណរគុណចំពោះធនាគារអភិវឌ្ឍន៍អាស៊ី និងក្រសួងសេដ្ឋកិច្ច និងហិរញ្ញវត្ថុ ព្រមទាំងវាយតម្លៃខ្ពស់ចំពោះក្រុមការងារគម្រោងទាំងអស់ដែលបានខិតខំធ្វើឱ្យគម្រោងនេះ មានដំណើរការយ៉ាងល្អប្រសើរក្នុងគោលបំណងអភិវឌ្ឍមូលធនមនុស្ស ដើម្បីចូលរួមចំណែកកសាងកម្ពុជាក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសអភិវឌ្ឍន៍ត្រឹមឆ្នាំ២០៥០។
សូមជម្រាបជូនថា គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) បានទទួលឥណទានកម្ចីពីធនាគារអភិវឌ្ឍន៍អាស៊ី (ADB) និងថវិកាបដិភាគរបស់រាជរដ្ឋាភិបាលកម្ពុជា។ គម្រោងនេះផ្តោតលើលទ្ធផលចំនួន ៤ គឺ ៖ ១). លទ្ធភាពទទួលបានការអប់រំមធ្យមសិក្សាទុតិយភូមិ ប្រកបដោយគុណភាព, ២). គុណភាពនៃការអប់រំមធ្យមសិក្សាទុតិយភូមិស្របតាមជំនាញសតវត្សរ៍ទី២១, ៣). គុណភាពនៃរង្វាយតម្លៃការអប់រំមធ្យមសិក្សាទុតិយភូមិបានប្រសើរឡើង និង ៤). គន្លងអប់រំក្រោយមធ្យមសិក្សាបានពង្រឹង។
គម្រោង SE4HC បានអនុវត្តទៅលើវិទ្យាស្ថានជាតិអប់រំ វិទ្យាស្ថានបច្ចេកវិទ្យាកម្ពុជា វិទ្យាសា្ថនគរុកោសល្យរាជធានីភ្នំពេញ វិទ្យាស្ថានគរុកោសល្យបាត់ដំបង មជ្ឈមណ្ឌលបណ្តុះបណ្តាល និងវិក្រឹត្យការភូមិភាគកំពង់ចាម សកលវិទ្យាល័យជាតិគ្រប់គ្រង វិទ្យាស្ថានអប់រំពិសេស អគ្គនាយកដ្ឋានអប់រំ និងអគ្គនាយកដ្ឋានឧត្តមសិក្សា ហើយគម្រោងនឹងគ្របដណ្តប់សាលាមធ្យមសិក្សាទុតិយភូមិគោលដៅចំនួន២៥៩ ដែលនឹងទទួលបានអន្តរាគមន៍សំខាន់ៗពីគម្រោង៕
