ក្នុងពិធីបិទ ការប្រកួតប្រជែងសមត្ថភាពជំនាញមហាវិទ្យាល័យវិជ្ជាជីវៈពិភពលោកឆ្នាំ២០២៥ ប្រចាំតំបន់អាស៊ាន កាលពីថ្ងៃទី១១ ខែកញ្ញា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការប្រកួតប្រជែងជំនាញវិជ្ជាជីវៈពិភពលោកឆ្នាំ២០២៥ បានបង្កើតឱកាសដល់យុវជន និងគ្រូបង្រៀនអប់រំវិជ្ជាជីវៈ បញ្ចេញសមត្ថភាព និងទេពកោសល្យ ជាពិសេសការបំពេញសេចក្តីស្រមៃរបស់ខ្លួន បង្កើតកម្មវិធីសិក្សា វិធីសាស្ត្របង្រៀន ការពង្រឹងគុណភាពគ្រូ និងការបង្កើតវេទិកាល្អៗ។

ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា ការប្រកួតប្រជែងជំនាញវិជ្ជាជីវៈពិភពលោកឆ្នាំ២០២៥ ជាព្រឹត្តិការណ៍មួយដែលពិភពលោកកំពុងយកចិត្តទុកដាក់និងចាប់អារម្មណ៍។ វេទិកានេះ មិនត្រឹមតែជាការប្រកួតសមត្ថភាព និងជំនាញប៉ុណ្ណោះទេ ថែមទាំងជាការផ្លាស់ប្ដូរគំនិត ការរួមបញ្ចូលគ្នានៃវប្បធម៌ និងការភ្ជាប់ទំនាក់ទំនងរវាងគ្នានិងគ្នាថែមទៀត។

កម្មវិធីប្រកួតប្រជែងជំនាញបច្ចេកទេស និងវិជ្ជាជីវៈពិភពលោក ឆ្នាំ២០២៥ ប្រចាំតំបន់អាស៊ាន ធ្វើ​ឡើងក្រោមប្រធានបទ “ជំនាញផ្លាស់ប្ដូរជោគវាសនា ជំនាញបង្កើតអនាគត”។ ការប្រកួតនេះ មានបេក្ខជនចូលរួមសរុបចំនួន៦០ក្រុម ក្នុងនោះប្រទេសកម្ពុជាចំនួន ៤០ក្រុមដែលរួមមានវិទ្យាស្ថានជាតិពហុបច្ចេកទេសកម្ពុជា, វិទ្យាស្ថានជាតិបណ្ដុះបណ្ដាលបច្ចេកទេស និងវិទ្យាស្ថានជាតិពហុបច្ចេកទេសតេជោសែន នៃក្រសួងការងារ និងបណ្តុះបណ្តាលវិជ្ជាជីវៈ, ប្រទេសឥណ្ឌូនេស៊ីចំនួន ១០ក្រុម, ប្រទេសហ្វីលីពីនចំនួន ៣ក្រុម, ប្រទេសម៉ាឡេស៊ីចំនួន ៣ក្រុម និងប្រទេសថៃចំនួន ៤ក្រុម។

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ជំនាញទាំង៣ ដែលជាវិញ្ញាសាក្នុងការប្រកួតនេះ គឺ ១.ការធ្វើពាណិជ្ចកម្មតាមប្រព័ន្ធអនឡាញ, ២.បច្ចេកវិទ្យាព័ត៌មានជំនាន់ថ្មី និង ៣.ការផលិតឧបករណ៍បម្រើដល់ឧស្សាហកម្ម, ឯកឧត្តមថា វិញ្ញាសាទាំងនេះ គឺសុទ្ធសឹងជាជំនាញដែលមានតម្រូវការខ្ពស់ក្នុងទីផ្សារការងារបច្ចុប្បន្ននិងអនាគត និងមានភាពចាំបាច់ក្នុងការអភិវឌ្ឍឧស្សាហកម្ម និងអភិវឌ្ឍសេដ្ឋកិច្ចសង្គមជាតិយើង។

ឯកឧត្តម ហេង សួរ ក៏ជឿជាក់ថា ការប្រកួតនេះ នឹងផ្តល់នូវលទ្ធផលជាក់ស្តែង ជះឥទ្ធផលយ៉ាងវិជ្ជមាន ទាក់ទាញយុវជនឱ្យស្រលាញ់ជំនាញបច្ចេកទេស និងការច្នៃប្រតិដ្ឋផ្សេងៗ ហើយក៏ជាឱកាសបង្កើតឱ្យមានវេទិការសម្រាប់សហប្រតិបត្តិការជំនាញ និងការផ្លាស់ប្តូរនានា ឆ្លើយតបនឹងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។

ឯកឧត្តម WANG WENBIN ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំនៅកម្ពុជា បានគូសបញ្ជាក់ពីការប្តេជ្ញាចិត្ត បន្តពង្រឹងនិងពង្រីកកិច្ចសហប្រតបត្តិការជាមួយកម្ពុជាជាច្រើនបន្ថែមទៀត តាមរយៈការផ្លាស់ប្តូររវាងប្រជាជន និងប្រជាជនលើវិស័អប់រំជំនាញវិជ្ជាជីវៈ សំដៅគាំទ្រដល់ការអភិវឌ្ឍធនធានមនុស្សប្រកបគុណភាពឆ្លើយតបនឹងចក្ខុវិស័យអភិវឌ្ឍជាតិរបស់រាជរដ្ឋាភិបាលកម្ពុជា។

ឯកឧត្តមឯកអគ្គរដ្ឋទូតបញ្ជាក់ថា រដ្ឋាភិបាលចិនយកចិត្តទុកដាក់យ៉ាងខ្លាំងក្នុងការជំរុញអភិវឌ្ឍន៍ជំនាញវិជ្ជាជីវៈ ដោយបាននិងកំពុងពង្រឹង និងពង្រីកកិច្ចសហប្រតិបត្តិការជាមួយបណ្តាប្រទេសជាច្រើនទូទាំងពិភពលោក តាមរយៈការរៀបចំការប្រកួតប្រជែងជាលក្ខណៈអន្តរជាតិយ៉ាងសម្បូរបែប ដែលក្នុងនេះរួមមាន «ការប្រកួតប្រជែងសមត្ថភាពជំនាញមហាវិទ្យាល័យវិជ្ជាជីវៈពិភពលោកឆ្នាំ២០២៥ ប្រចាំតំបន់អាស៊ាន» ដែលស្តែងឱ្យឃើញពីលទ្ធផលនៃកិច្ចសហប្រតិបត្តិការប្រកបដោយផ្លែផ្ការរវាងកម្ពុជា-ចិន លើវិសល័យអភិវឌ្ឍន៍ការបណ្តុះបណ្តាលជំនាញវិជ្ជាជីវៈ ដោយបានទាក់ទាញសិស្សនិស្សិតជាច្រើនមកពីបណ្តាប្រទេសក្នុងតំបន់ចូលរួមប្រកួតប្រជែង។

សូមជំរាបជូនថា កម្មវិធីប្រកួតប្រជែងជំនាញបច្ចេកទេស និងវិជ្ជាជីវៈពិភពលោក ត្រូវបានរៀបចំឡើង ចាប់តាំងពីឆ្នាំ២០០៨ ក្នុងគោលបំណងផ្ដល់ឱកាសដល់យុវជនបានបង្ហាញសមត្ថភាពក្នុងការបង្កើតថ្មី, បង្ហាញពីមិត្តភាពរឹងមាំជាសកលក្នុងកិច្ចសហប្រតិបត្តិការ និងអនាគតឈ្នះ-ឈ្នះរួមគ្នា, បង្ហាញឱ្យឃើញនូវការខិតខំជំរុញ និងបង្កើនសមត្ថភាពនិស្សិតឱ្យក្លាយជាយុវជនឆ្នើម, ដឹកនាំឱ្យមានការអភិវឌ្ឍកាន់តែល្អប្រសើរ លើវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ និងជំរុញកិច្ចសហប្រតិបត្តិការ និងការផ្លាស់ប្ដូរជាលក្ខណៈអន្តរជាតិ៕