ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រទេសចិនកំពុងផ្លាស់ប្តូរទេសភាពផ្ទាំងប៉ាណូសាធារណៈនៅតាមតំបន់ដែលមានមនុស្សធ្វើដំណើរច្រើន ដោយជំនួសការផ្សាយពាណិជ្ជកម្មដែលបង្ហាញតារាភាពយន្ត និងតារាចម្រៀងល្បីៗ មកបង្ហាញរូបអ្នកវិទ្យាសាស្ត្រ សាស្ត្រាចារ្យ និងអ្នកស្រាវជ្រាវជួរមុខរបស់ប្រទេស ដើម្បីលើកកម្ពស់ការចាប់អារម្មណ៍របស់យុវជនចំពោះវិទ្យាសាស្ត្រ និងការច្នៃប្រឌិត។
យោងតាមសារព័ត៌មាន Global Times បានឱ្យដឹងថា ថ្មីៗនេះផ្ទាំងប៉ាណូធំៗនៅតាមដងផ្លូវសំខាន់ៗ អាកាសយានដ្ឋាន និងស្ថានីយ៍រថភ្លើងក្រោមដីក្នុងទីក្រុងធំៗរបស់ចិន ត្រូវបានប្រើប្រាស់ជាកន្លែងបង្ហាញរឿងរ៉ាវ និងសមិទ្ធផលរបស់អ្នកវិទ្យាសាស្ត្រឆ្នើម។
ការតាំងបង្ហាញទាំងនេះបង្ហាញមុខអ្នកស្រាវជ្រាវ រួមជាមួយព័ត៌មានសង្ខេបអំពីការងារ ការរកឃើញ និងស្នាដៃសំខាន់ៗរបស់ពួកគេ។
អ្នកវិទ្យាសាស្ត្រដែលត្រូវបានបង្ហាញនៅលើផ្ទាំងប៉ាណូ មានអ្នកធ្វើការក្នុងវិស័យជាច្រើន រួមមានបច្ចេកវិទ្យាកសិកម្ម ការរុករកអវកាស ការស្រាវជ្រាវវេជ្ជសាស្ត្រ និងបញ្ញាសិប្បនិម្មិត។
នៅទីក្រុងធំៗ ដូចជា ប៉េកាំង និងសៀងហៃ ការតាំងបង្ហាញត្រូវបានដាក់នៅតំបន់ដែលមានចរាចរណ៍មនុស្សខ្ពស់ ដើម្បីឱ្យសាធារណជនអាចស្វែងយល់អំពីស្នាដៃរបស់អ្នកវិទ្យាសាស្ត្របានយ៉ាងងាយស្រួល។
ការផ្លាស់ប្តូរនេះក៏ត្រូវបានស្វាគមន៍ពីប្រជាពលរដ្ឋ អ្នកអប់រំ និងសិស្សានុសិស្សមួយចំនួននៅក្នុងតំបន់។ អ្នកគាំទ្រគំនិតផ្តួចផ្តើមនេះយល់ថា ការបង្ហាញអ្នកវិទ្យាសាស្ត្រជាសាធារណៈអាចជួយឱ្យកុមារ និងយុវជនស្គាល់ និងកោតសរសើរអ្នកដែលចូលរួមចំណែកក្នុងការរកឃើញ និងការច្នៃប្រឌិត ជំនួសឱ្យការផ្តោតតែទៅលើតារាក្នុងវិស័យកម្សាន្ត។
អង្គការវិទ្យាសាស្ត្រនានាក៏បានលើកឡើងថា ការផ្តល់កិត្តិយសជាសាធារណៈដល់អ្នកស្រាវជ្រាវមានសារៈសំខាន់ ព្រោះអ្នកវិទ្យាសាស្ត្រដើរតួនាទីក្នុងការជំរុញការអភិវឌ្ឍ និងវឌ្ឍនភាពរបស់ប្រទេស។
ប្រទេសចិនបានចាត់ទុកវិទ្យាសាស្ត្រ និងបច្ចេកវិទ្យាជាកម្លាំងសំខាន់សម្រាប់ការអភិវឌ្ឍជាតិរយៈពេលវែង។ ជាមួយគ្នានេះ អាជ្ញាធរមានគោលបំណងពង្រីកការផ្សព្វផ្សាយអំពីវិទ្យាសាស្ត្រពីទីក្រុងធំៗទៅកាន់ទីក្រុងតូចៗ និងបង្កើនការគាំទ្រដល់ការស្រាវជ្រាវ និងកម្មវិធីសម្រាប់យុវជន។
ការលើកតម្កើងអ្នកវិទ្យាសាស្ត្រតាមរយៈផ្ទាំងប៉ាណូសាធារណៈ ត្រូវបានចាត់ទុកថាជាវិធីមួយក្នុងការបង្កើតគំរូសង្គមថ្មី ដែលជំរុញឱ្យយុវជនចាប់អារម្មណ៍លើវិទ្យាសាស្ត្រ បច្ចេកវិទ្យា និងការច្នៃប្រឌិត ព្រមទាំងលើកទឹកចិត្តឱ្យពួកគេចូលរួមចំណែកក្នុងការអភិវឌ្ឍសង្គមនាពេលអនាគត៕
