ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីប្រកួតក្រុមភ្លេងកាយរឹទ្ធិថ្នាក់ជាតិ លើកទី២ ក្រោមប្រធានបទ « ភ្លេងកាយរឹទ្ធិ ដើម្បីមហាវរវិបុលភាព» នាព្រឹកថ្ងៃទី៤ ខែមិថុនា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានស្នើឱ្យនាយកដ្ឋានសហប្រតិបត្តិការកាយរឹទ្ធ និងមន្ទីរអប់រំរាជធានីខេត្ត រៀបចំកាយរឹទ្ធិល្អនៅតាមសាលារៀនគំរូ ដើម្បីលើកកម្ពស់ការអនុវត្តជំនាញសតវត្សទី២១។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា នាយកដ្ឋានសហប្រតិបត្តិការកាយរឹទ្ធ និងមន្ទីរអប់រំរាជធានីខេត្ត ត្រូវរៀបចំផែនការពង្រឹងសមាជិកភាព និងពង្រឹងរចនាសម្ព័ន្ធកងល្បាតនៅតាមសាលារៀនគំរូ ដើម្បីគាំទ្រដល់កម្មវិធីក្រៅម៉ោងសិក្សា ហើយត្រូវរួមគ្នាខិតខំរៀបចំដំណើរការកាយរឹទ្ធិល្អនៅតាមសាលារៀនគំរូ ដើម្បីលើកកម្ពស់ការអនុវត្តជំនាញសតវត្សទី២១ ជំនាញបច្ចេកវិទ្យាព័ត៌មាន ជំនាញឌីជីថលបញ្ញាសិប្បនិម្មិត ជំនាញបច្ចេកទេសសម្រាប់កុមារ និងយុវជន តាមវិធីសាស្ត្ររៀន និងអនុវត្តជាក់ស្ដែង ការសិក្សាតាមបែបអនុវត្តគម្រោង វិធីសាស្រ្តមិត្តអប់រំមិត្ត បង្កើតជាក្លិបសិក្សា ក្លិបសកម្មភាព ក្លិបគម្រោងនានា នៅតាមសាលារៀនរបស់ខ្លួនឱ្យឆ្លើយតបទៅនឹងបរិវត្តកម្មឌីជីថល។
រដ្ឋមន្រ្តីក្រសួងអប់រំ លើកឡើងថា បណ្ដាប្រទេសជឿនលឿននៅលើពិភពលោកតែងបង្កើតឱ្យមានក្រុមភ្លេងព្យុហយាត្រានៅតាមគ្រឹះស្ថានសិក្សា ដើម្បីជួយអប់រំស្មារតីកាយរឹទ្ធិក្នុងចំណោមយុវជន និងកុមារ។ ឯកឧត្តមបណ្ឌិតសភាចារ្យ បន្តថា ការបង្កើតឱ្យមានក្រុមភ្លេងព្យុហយាត្រានៅតាមគ្រឹះស្ថានសិក្សា ពិតជាជួយដល់ការអភិវឌ្ឍកាយសម្បទា បំណិនសម្បទា សុខភាពផ្លូវចិត្ត និងជួយលូតលាស់បំណិនសតវត្សទី២១ បណ្ដុះបញ្ញាស្មារតី វិស័យ សីលធម៌ ការធ្វើការងារជាក្រុម និងភាពធន់ ជាពិសេសផ្ដល់ផលវិជ្ជមានលើការសិក្សារៀនសូត្រ និងមានឥរិយាបទល្អ។
បើតាម ឯកឧត្តមបណ្ឌិតសភាចារ្យ ហង់ជួន ណារ៉ុន បេសកកម្មរបស់កាយរឹទ្ធិជាតិកម្ពុជា ពិតជាបានឆ្លើយតបជាវិជ្ជមានក្នុងការអនុវត្តសកម្មភាពក្រៅម៉ោងសិក្សា ការពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបទល្អរបស់សិស្សនៅតាមសាលារៀន ជាពិសេសការរៀបចំក្រុមភ្លេងកាយរឹទ្ធិ និងរចនាសម្ព័ន្ធកាកបាតក្រហមកាយរឹទ្ធិនៅតាមគ្រឹះស្ថានសិក្សា។
រដ្ឋមន្រ្តីក្រសួងអប់រំ ក៏បានស្នើឱ្យគ្រឹះស្ថានសិក្សាចូលរួមអនុវត្តសកម្មភាពក្រៅម៉ោងសិក្សាបន្ថែម២ម៉ោង ក្នុងមួយថ្ងៃដើម្បីលើកកម្ពស់គុណភាពអប់រំ ដោយសូមក្រុមប្រឹក្សាកាយរឹទ្ធិរាជធានីខេត្តចូលរួមសហការគៀគរមូលនិធិពីសប្បុរសជន និងក្រុមហ៊ុនឯកជននានា ដើម្បីបង្កើតក្រុមភ្លេងកាយរឹទ្ធិ យ៉ាងហោចណាស់ឱ្យមានមួយក្រុមជាតំណាងខេត្តរបស់ខ្លួន។ នាយកដ្ឋានសហប្រតិបត្តិការកាយរឹទ្ធ ត្រូវរៀបចំក្រុមគ្រូភ្លេងព្យុហយាត្រាកាយរឹទ្ធិថ្នាក់ជាតិ ដោយចងក្រងក្មួយៗជាកាយរឹទ្ធិឱ្យមានជំនាញភ្លេងព្យុហយាត្រាកាយរឹទ្ធិ ដើម្បីចុះហ្វឹកហាត់ដល់ក្រុមភ្លេងកាយរឹទ្ធិនៅតាមរាជធានីខេត្តដែលទើបបង្កើតថ្មី។ នាយកដ្ឋានសហប្រតិបត្តិការកាយរឹទ្ធ និងមន្ទីរអប់រំរាជធានីខេត្ត ត្រូវសហការរៀបចំផែនការសកម្មភាព ដើម្បីផ្លាស់ប្ដូរបទពិសោធន៍រវាងក្រុមភ្លេងព្យុហយាត្រារាជធានីខេត្ត ដើម្បីចែករំលែកចំណេះដឹង និងបទភ្លេងព្យុហយាត្រាកាយរឹទ្ធ។
គួរជំរាបជូនថា កាយរឹទ្ធិជាតិបង្កើតឡើងក្នុងឆ្នាំ២០០០ ក្រោមគំនិតផ្ដួចផ្ដើម របស់សម្ដេចអគ្គមហាសេនាបតីតេជោ ហ៊ុន សែន។ ក្រុមកាយរឹទ្ធជាតិកម្ពុជា បានទទួលស្គាល់ជាសមាជិកពេញសិទ្ធិ នៃអង្គការពិភពលោក នៃចលនាកាយរឹទ្ធិ នៅថ្ងៃ១ ខែកក្កដា ឆ្នាំ២០០៨។ បច្ចុប្បន្នកាយរឹទ្ធិជាតិកម្ពុជា មានសមាជិកចំនួន ១៨៥ ៣៥៦នាក់៕
