ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អត្ថបទមួយសរសេរដោយលោក ស៊ី ជិនពីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន (CPC) ស្តីពីការពន្លឿន ការកសាងប្រទេសចិនឱ្យទៅជាប្រទេសឈានមុខគេក្នុងវិស័យអប់រំ បានចេញផ្សាយកាលពីថ្ងៃអាទិត្យ ដើមសប្ដាហ៍កន្លងទៅ, នេះបើតាមសារព័ត៌មានចិន Xinhua ។
អត្ថបទបានបោះពុម្ពផ្សាយនៅក្នុងទស្សនាវដ្តី Qiushi Journal លើកទី ១១ ដែលនេះជាទស្សនាវដ្តីដ៏ល្បីរបស់គណៈកម្មាធិការកណ្តាល CPC ។
ក្នុងអត្ថបទ លោក ស៊ី សង្កត់ធ្ងន់ថា ការអប់រំដើរតួនាទីជាមូលដ្ឋានគ្រឹះ ក្នុងការកសាងប្រទេសដ៏រឹងមាំមួយ និងសម្រេចបាននូវភាពរស់រវើករបស់ប្រជាជាតិចិន ដោយបង្ហាញពីគោលដៅជាយុទ្ធសាស្ត្រនៃការធ្វើឱ្យប្រទេសចិន ជាប្រទេសឈានមុខគេក្នុងវ័យអប់រំនៅឆ្នាំ២០៣៥។
ខ្លឹមសារអត្ថបទ បានជំរុញឱ្យមានការខិតខំប្រឹងប្រែងយ៉ាងខ្ជាប់ខ្ជួន ដើម្បីអនុវត្តភារកិច្ចជាមូលដ្ឋាន នៃការលើកកម្ពស់គុណធម៌ តាមរយៈការអប់រំ ការពង្រឹងការគាំទ្រលើការអប់រំក្នុងការរីកចម្រើនផ្នែកវិទ្យាសាស្ត្រ និងបច្ចេកវិទ្យា, ការបណ្ដុះទេពកោសល្យ និងការលើកកម្ពស់គុណភាពនៃសេវាអប់រំសាធារណៈ និងការអនុវត្តយុទ្ធសាស្ត្រឌីជីថល នៃការអប់រំជាតិ។
ទន្ទឹមនឹងការសង្កត់ធ្ងន់លើសារៈសំខាន់ នៃការបណ្ដុះបណ្ដាលគ្រូបង្រៀន ដែលមានគុណវុឌ្ឍខ្ពស់ ក្នុងយុគសម័យថ្មី។ អត្ថបទនេះ ក៏បានជំរុញឱ្យមានការខិតខំប្រឹងប្រែង ដើម្បីធានាថា គ្រូបង្រៀន ទទួលបានការទទួលស្គាល់ពីសង្គម និងត្រូវបានចាត់ទុកថា ជាវិជ្ជាជីវៈមួយក្នុងចំណោមវិជ្ជាជីវៈដែលគួរឱ្យគោរពបំផុតនៅក្នុងសង្គម។
ជាមួយនឹងគោលដៅ នៃការកសាងប្រទេសទៅជាមជ្ឈមណ្ឌលអប់រំដ៏សំខាន់មួយ ដែលមានឥទ្ធិពលជាសាកល អត្ថបទរបស់លោក ស៊ី បានអំពាវនាវបើកវិស័យអប់រំឱ្យកាន់តែទូលំទូលាយទៅពិភពខាងក្រៅ និងបន្តពង្រឹងឥទ្ធិពល ការប្រកួតប្រជែង និងសំឡេងរបស់ចិន លើឆាកអន្តរជាតិ។
អត្ថបទនេះ ក៏បានអំពាវនាវផងដែរ ឱ្យបង្កើនប្រសិទ្ធភាព គម្រោងនៃការអប់រំថ្នាក់ឧត្តមសិក្សា និងការកសាងបុគ្គលិកជំនាញ ដែលមានសារៈសំខាន់ជាយុទ្ធសាស្ត្រ៕
