ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីរសៀលថ្ងៃទី៩ កក្កដា បានចុះពិនិត្យស្ថានភាពសុវត្ថិភាពក្នុងការរៀន និងបង្រៀន នៅសាលាបឋមសិក្សាទាំង៨ តាមបណ្ដោយព្រំដែនក្នុងស្រុកបន្ទាយអំពិល ខេត្តឧត្តរមានជ័យ។
សាលាបឋមសិក្សាទាំង៨ ដែលមានទីតាំងនៅតាមតំបន់ព្រំដែននោះ រួមមាន សាលាបឋមសិក្សាតាមន្តសែនជ័យ, សាលាបឋមសិក្សាបុស្សធំ, សាលាបឋមសិក្សាហនុមាន, សាលាបឋមសិក្សាថ្មដូន, សាលាបឋមសិក្សាជប់គគីរ, សាលាបឋមសិក្សាមនោរម្យ១បូក២, សាលាបឋមសិក្សាហាលឿមសែនជ័យ និងសាលាបឋមសិក្សាចន្ទក្រហម។
បន្ទាប់ពីបានស្ដាប់របាយការណ៍របស់នាយកសាលាបឋមសិក្សាទាំង៨ រួចមក ឯកឧត្តមរដ្ឋមន្រ្តីបានកោតសរសើរ និងថ្លែងអំណរគុណដល់លោកគ្រូ អ្នកគ្រូ ដែលបានខិតខំប្រឹងប្រែងលះបង់ខ្ពស់ក្នុងការបង្រៀនគ្រប់កាលៈទេសៈ និងបានរម្លឹកឡើងវិញអំពីប្រវត្តិសាស្ត្រ សំណង់ប្រាសាទនានា នៃតំបន់នេះចាប់តាំងពីសម័យមុនអង្គររហូតមកដល់សម័យអាណានិគមនិយមបារាំង។ ក្នុងនោះ ការទទួលបានជ័យជម្នះក្នុងការទាមទារ នៃតំបន់ប្រាសាទព្រះវិហារ ដោយសម្ដេចព្រះបាទ នរោត្តម សីហនុ និងនៅឆ្នាំ២០០៨ ការខិតខំប្រឹងប្រែងរបស់សម្ដេចតេជោ ហ៊ុន សែន ក្នុងការតតាំងក្ដីនៅទីក្រុងឡាអេ និងបានដាក់បញ្ចូលជាសម្បត្តិបេតិកភណ្ឌពិភពលោក។
ចំពោះក្តីកង្វល់របស់លោកគ្រូ អ្នកគ្រូ ពាក់ព័ន្ធបញ្ហាព្រំដែន ឯកឧត្តមរដ្ឋមន្រ្តី បានសុំឱ្យលោកគ្រូអ្នកគ្រូជឿជាក់លើការដឹកនាំរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាព្រំដែនដោយសន្តិវិធី ចៀសវាងការប្រើប្រាស់ហិង្សា។ ឯកឧត្ដមបណ្ឌិតសភាចារ្យ ក៏បានលើកទឹកចិត្តលោកគ្រូ អ្នកគ្រូ បន្តយកចិត្តទុកដាក់ផ្តោតលើការបង្រៀន ដោយប្រើប្រាស់វិធីសាស្ត្របង្រៀនទៅតាមលទ្ធភាពជាក់ស្ដែងក្នុងការអនុវត្តកញ្ចប់អំណានដំបូង និងគណិតវិទ្យាដំបូង ហើយជាមួយគ្នានេះ ក៏មានការជួយគាំទ្រពីនាយកដ្ឋានបឋមសិក្សាលើការបណ្ដុះបណ្ដាលពីវិធីសាស្ត្របង្រៀនថ្មីៗ ការប្រើប្រាស់សម្ភារៈសិក្សា ផ្តល់ឯកសារបន្ថែម និងសៀវភៅអំណានផ្សេងៗដល់សាលាបឋមសិក្សានីមួយៗ ដើម្បីជាជំនួយពង្រឹងដល់ការរៀន និងបង្រៀន។
ជាមួយគ្នានេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ក៏បាននាំយកអំណោយជាច្រើនរួមមាន ទូរទស្សន៍ឆ្លាតវៃ សម្ភារៈសិក្សានៃកញ្ចប់សម្ភារៈអំណាន និងគណិតវិទ្យាថ្នាក់ដំបូង សៀវភៅសិក្សាគោលពីថ្នាក់ទី១ ដល់ថ្នាក់ទី៩លើគ្រប់មុខវិជ្ជា កាតាប និងសម្ភារៈសិក្សាសម្រាប់កុមារ ម៉ាស៊ីន LCD ថេប្លេត សៀវភៅសរសេរ និងប៊ិក ដើម្បីផ្តល់ជូនដល់សិស្សានុសិស្ស និងលោកគ្រូ អ្នកគ្រូ ក្នុងដំណើរការបង្រៀននិងរៀន ជាពិសេសការបន្តអនុវត្តថ្នាលបឋម PLP។
រដ្ឋមន្រ្តីក្រសួងអប់រំ ក៏បានលើកទឹកចិត្តលោកគ្រូអ្នកគ្រូឱ្យបន្តរក្សាស្មារតីរួបរួមសាមគ្គីគ្នាឱ្យកាន់តែរឹងមាំ ដើម្បីផ្តល់នូវការអប់រំប្រកបដោយគុណភាព បរិយាបន្ន និងសមធម៌ ប្រែក្លាយយុវជនកម្ពុជាជំនាន់ក្រោយទៅជាកម្លាំងចលករដ៏មានសក្តានុពលចូលរួមចំណែកក្នុងការអភិវឌ្ឍសេដ្ឋកិច្ចសង្គមជាតិឱ្យរីកចម្រើនប្រកបដោយចីរភាព៕
