តាមរយៈការចូលរួមផ្សព្វផ្សាយតំបន់ទេសចរណ៍នៅកម្ពុជា ជាពិសេសតំបន់ប្រាសាទព្រះវិហារ ក្រុមការងារ RUN With SAI នឹងរៀបចំព្រឹត្តិការណ៍ «រត់អបអរសាទរប្រាសាទព្រះវិហារ លើកទី៣» ដើម្បីអបអរសាទរប្រាសាទព្រះវិហារបានចុះក្នុងបញ្ជីបេតិកភណ្ឌពិភពលោក នៃអង្គការយូណេស្កូ គម្រប់១៧ឆ្នាំ និងផ្សព្វផ្សាយឱ្យភ្ញៀវទេសចរបានស្គាល់ពីកន្លែងផ្សេងៗ នៃតំបន់ប្រាសាទព្រះវិហារ និងជាការជំរុញចលនាទេសចរណ៍ ក្រោមទិសស្លោក «ទេសចរណ៍លូតលាស់ក្នុងសន្តិភាព»។

វិញ្ញាសានៃការរត់អបអរសាទរប្រាសាទព្រះវិហារលើកទី៣ នេះ នឹងមានការបែងចែកជា៤ ដូចជា វិញ្ញាសារដើរដី១៣០០ម៉ែត្រ (យាត្រាបេតិកភណ្ឌ-PREAH VIHEARR TEMPLE WALK), វិញ្ញាសារត់៩គីឡូម៉ែត្រ (ផ្លូវរត់ឌីទេពសែនជ័យ- DY TEP SENCHEY TRAIL) វិញ្ញាសារត់២២.៦គីឡូម៉ែត្រ(ផ្លូវសួគ៌ាល័យ-SOURKEA TRAIL) និង វិញ្ញាសារត់៤២.៥គីឡូម៉ែត្រ(ផ្លូវរត់ជញ្ជាំងដងរែក-DANGREK TRAIL)។ វិញ្ញាសានីមួយៗ មានផែនទីនៃការរត់ ​និងពេលវេលារត់ខុសៗគ្នាដែលបានកំណត់ដោយក្រុមការងាររៀបចំព្រឹត្តិការណ៍ RUN with SAI ។

អមជាមួយគ្នានោះ ព្រឹត្តិការណ៍ទាំងមូលក៏រួមមានកម្មវិធីទស្សនីយភាព ការ​សម្តែង​របាំ​ប្រពៃណី ឧបករណ៍​ប្រពៃណី​ខ្មែរ និង​របាំ​ប្រចាំ​តំបន់​នៅ​ប្រាសាទ​ព្រះវិហារ ដើម្បី​ស្វាគមន៍​ដល់កីឡាករ កីឡាការិនី ទាំងអស់ដែលរត់ដល់ទីបានជោគជ័យ ក៏ដូចជាការផ្តល់នូវអនុស្សាវរីយ៍ និងការចងចាំដ៏ល្អរួមគ្នា នៅលើប្រាសាទព្រះវិហារ ដ៏ពិសិដ្ឋមួយនេះដែរ។ បន្ថែមពីសកម្មភាពរត់ ក្រុមការងារក៏មានរៀបចំកម្មវិធីអមនៃកម្មវិធី គឺការដាំកូនឈើ ដើម្បីជាចូលរួមថែរក្សាបរិស្ថានផងដែរ។

សូមជំរាបជូនថា ព្រឹត្តិការណ៍ «រត់អបអរសាទរប្រាសាទព្រះវិហារ» លើកទី៣ ជាព្រឹត្តិការណ៍ដែលសហការរៀបចំដោយក្រុមការងារ RUN WITH SAI ជាមួយអាជ្ញាធរជាតិព្រះវិហារ និងសហការគាំទ្រដោយ ក្រសួងវប្បធម៌ និងវិចិត្រសិល្ប: រដ្ឋបាលខេត្តព្រះវិហារ  សហភាពសហព័ន្ធយុវជនកម្ពុជា។ ព្រឹត្តិការណ៍នេះ នឹងនាំអ្នកចូលរួមសិក្សាស្វែងយល់ពីភាពអស្ចារ្យ និងតម្លៃជាសារវ័ន្តនៅក្នុងស្ថាបត្យកម្មនៃប្រាសាទព្រះវិហារ ភាពស្រស់ស្អាតនៃបរិស្ថានធម្មជាតិ តាមបណ្ដាតម្រាយផ្លូវរត់ ក្នុងវិញ្ញាសានីមួយៗនៃព្រឹត្តិការណ៍រត់អបអរសាទរប្រាសាទព្រះវិហារ ឆ្នាំ២០២៥ ក្នុងន័យលើកតម្លៃប្រាសាទដែលជាបុព្វបុរសខ្មែរ និងជាឱកាសដល់អត្តពលិក បានបញ្ចេញទេពកោសល្យ បច្ចេកទេស និងសមត្ថភាព ដើម្បីត្រៀមខ្លួនដែលកម្ពុជាធ្វើជាម្ចាស់ផ្ទះ នៃព្រឹត្តិការណ៍កីឡាយុវជនអូឡាំពិកឆ្នាំ២០២៩ខាងមុខ៕