ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
របាយការណ៍របស់កម្មវិធីអភិវឌ្ឍន៍អង្គការសហប្រជាជាតិ (UNDP) ចេញផ្សាយកាលពីពេលថ្មីៗនេះបង្ហាញថា ប្រទេសកម្ពុជាបានបោះជំហានគួរឱ្យកត់សម្គាល់ក្នុងការជំរុញការអភិវឌ្ឍន៍មនុស្ស។
របាយការណ៍ស្ដីពីការអភិវឌ្ឍន៍មនុស្សឆ្នាំ២០២៥ បានឱ្យដឹងថា ចាប់តាំងពីឆ្នាំ១៩៩០ មក អាយុសង្ឃឹមរស់ក្នុងប្រទេសកម្ពុជាបានកើនឡើង ១៥,៤៦ឆ្នាំ, ការចំណាយពេលក្នុងការអប់រំទូទៅ (years of schooling) កើនឡើង ៤,៣១ឆ្នាំ និងការចំណាយពេលជាមធ្យមក្នុងការសិក្សា (mean years of schooling) កើនឡើង ២,៣៨ឆ្នាំ។
របាយការណ៍បានបន្ថែមថា ប្រាក់ចំណូលជាតិសរុប (GNI) សម្រាប់មនុស្សម្នាក់ បានកើនឡើងប្រហែល ៣០៧,៧ % ។
លើសពីនេះ តម្លៃសន្ទស្សន៍អភិវឌ្ឍមនុស្ស (HDI) បានឈរនៅតម្លៃ ០,៦០៦ ក្នុងឆ្នាំ ២០២៣ ដែលជាការកើនឡើងតិចតួចពី ០,៦០២ ក្នុងឆ្នាំ២០២២ និងបានចាត់ថ្នាក់កម្ពុជា ឱ្យស្ថិតនៅក្នុងចំណាត់ថ្នាក់មធ្យមក្នុងការអភិវឌ្ឍមនុស្ស និងឈរនៅចំណាត់ថ្នាក់ទី១៥១ ក្នុងចំណោម ១៩៣ ប្រទេស។
HDI បានសិក្សាដោយវាយតម្លៃលើសមិទ្ធផល នៃការអភិវឌ្ឍ លើវិស័យសុខភាព ការអប់រំ និងប្រាក់ចំណូល។
របាយការណ៍នេះ ក៏បានបង្ហាញពីការរកឃើញ ទាក់ទងនឹងការស្ទង់មតិសកលថ្មីមួយ ដែលបានរកឃើញថា នៅក្នុងប្រទេសដែលមានកម្រិត HDI ទាប និងស្ថិតនៅកម្រិតមធ្យមដូចកម្ពុជា ការប្រើបញ្ញាសិប្បនិម្មិត (AI) ត្រូវបានគេរំពឹងថា នឹងបង្កើនផលិតភាព ហើយត្រូវប្រើក្នុងវិស័យអប់រំ វិស័យសុខាភិបាល ឬវិស័យការងារក្នុងឆ្នាំបន្ទាប់។
រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ឯកឧត្តម ជា វ៉ាន់ដេត មានប្រសាសន៍ថា ប្រទេសកម្ពុជា ជាប្រទេសមួយ ក្នុងចំណោមប្រទេសអភិវឌ្ឍន៍តិចតួចបំផុត (LDC) ដែលចាត់វិធានការយ៉ាងសកម្ម ដើម្បីបង្កើតយុទ្ធសាស្ត្រ AI ថ្នាក់ជាតិដ៏ទូលំទូលាយមួយ។
លោកបន្ថែមថា យុទ្ធសាស្ត្រនេះមានគោលបំណងផ្ដល់នូវវិធីសាស្ត្រ ដែលមានរចនាសម្ព័ន្ធ និងផ្ដោតលើមនុស្ស ក្នុងការប្រើ AI សម្រាប់កំណើនសេដ្ឋកិច្ចប្រកបដោយបរិយាប័ន្ន អភិបាលកិច្ចដែលឆ្លើយតប និងការអភិវឌ្ឍមនុស្សរយៈពេលវែង។
លោក Alissar Chaker តំណាង UNDP ប្រចាំប្រទេសកម្ពុជា មានប្រសាសន៍ថា នៅពេលដែល AI មានការវិវឌ្ឍន៍យ៉ាងឆាប់រហ័ស និងជ្រាបចូលទៅក្នុងជីវិតប្រចាំថ្ងៃ ប្រជាជនត្រូវតែស្វែងរកសក្តានុពលរបស់វា ដើម្បីជំរុញការអភិវឌ្ឍន៍ប្រកបដោយចីរភាពនៅកម្ពុជា៕
