ភ្នំពេញ – ក្នុង​គោល​បំណង​លើក​កម្ពស់​ការ​បណ្តុះបណ្តាល និង​ការ​ស្រាវជ្រាវ​ជំនាញ​សម្រាប់​ឧស្សាហកម្ម​៤.០ STEAMING Cambodia បានរៀបចំ​កម្មវិធីបណ្តុះបណ្តាល​គ្រូបង្គោល ដល់សាស្រ្តាចារ្យ នៃដេប៉ាតឺម៉ង់​ទេព្យកោសល្យ​ឧស្សាហកម្ម និង​មេកានិក នៃវិទ្យាស្ថានបច្ចេកវិទ្យាកម្ពុជា ក្នុងការប្រើប្រាស់​បច្ចេកវិទ្យា software ថ្មីមួយរបស់ក្រុមហ៊ុន Siemens Digital Industries Software គឺ Xceleratory Academy ។

គោលបំណងសំខាន់ នៃការ​បណ្តុះបណ្តាលនេះ គឺដើម្បីពង្រឹងសមត្ថភាពសាស្រ្តាចារ្យ​នៅ​ក្នុង​ដេប៉ាតឺម៉ង់​ទេព្យកោសល្យ​ឧស្សាហកម្ម និង​មេកានិក ដើម្បី​អាចមានសមត្ថភាព​ក្នុងការ​ប្រើប្រាស់​បច្ចេកវិទ្យា software របស់ក្រុមហ៊ុន Siemens សម្រាប់​ការ​ធ្វើ​ទំនើបកម្ម​ផ្នែក​ការងារ​ស្រាវជ្រាវ និង​បណ្តុះបណ្តាល​ជូននិស្សិត ដោយ​ប្រើប្រាស់​សម្ភារៈជំនួយ និង​បច្ចេកវិទ្យា​របស់​ក្រុមហ៊ុន Siemens ដែលឧបត្ថម្ភជូនដោយ​ក្រសួងបរិស្ថាន, ស.ស.យ.ក រាជធានីភ្នំពេញ និង STEAMING Cambodia។

វគ្គបណ្តុះបណ្តាលនេះ នឹងធ្វើ​ឡើង​រយៈពេល​៥សប្តាហ៍ ដោយផ្តើមពីថ្ងៃទី១៥ ខែមីនា រហូត​ដល់ថ្ងៃទី២៦ ខែមេសា ឆ្នាំ​២០២៣។

ក្រោយ​ការ​បណ្តុះបណ្តាលនេះ គេ​រំពឹងថា សាស្រ្តាចារ្យ​នៃដេប៉ាតឺម៉ង់​ទេព្យកោសល្យឧស្សាហកម្ម និង​មេកានិក នៃវិទ្យាស្ថានបច្ចេកវិទ្យាកម្ពុជា នឹងមានជំនាញប្រើប្រាស់បច្ចេកវិទ្យា software របស់ក្រុមហ៊ុន Siemens សម្រាប់​ធ្វើការ​បណ្តុះបណ្តាល​ផ្នែកវិស្វកម្ម​ឌីហ្សាញគ្រឿងមេកានិក និង​សម្រាប់​ការ​ស្រាវជ្រាវ​គម្រោង​ផ្នែក​វិស្វកម្មនានាដែលពាក់ព័ន្ធនឹងការ design និងការធ្វើ simulation។ បន្ថែមពីនេះសាស្ត្រាចារ្យនឹងមានសមត្ថភាព​គ្រប់គ្រង និង​ប្រើប្រាស់ Lab ឱ្យមានលក្ខណៈទំនើបតាម​រយៈ software របស់ Siemens រួមទាំង​បង្កើត​កម្មវិធី​ប្រឡងយក​វិញ្ញាបនបត្រ​បញ្ជាក់​ជំនាញសិក្សា​ផ្នែក​វិស្វកម្មឌីហ្សាញ​មេកានិក​ពីក្រុមហ៊ុន Siemens ជូន​ដល់និស្សិត​ជំនាញផ្នែក​មេកានិក និង​ឧស្សាហកម្មនៅវិទ្យាស្ថានបច្ចេកវិទ្យាកម្ពុជាផងដែរ។

គួរ​បញ្ជាក់ដែរថា ចាប់តាំងពីឆ្នាំ​២០២២មក STEAMING Cambodia បានបណ្តុះបណ្តាល​ជា​ច្រើន​​ទៅ​ដល់​និស្សិត​វិទ្យាស្ថានបច្ចេកវិទ្យាកម្ពុជា និងសិស្ស-និស្សិតមកពីសាលាដទៃ ផ្នែកវិស្វកម្មឌីហ្សាញសរុបប្រមាណ៣២០នាក់ ឱ្យចេះផលិតដោយ​ប្រើប្រាស់ជំនាញវិស្វកម្មផលិត, ចេះប្រើប្រាស់ software របស់ក្រុមហ៊ុន Siemens និងចេះប្រើប្រាស់បច្ចេកវិទ្យា 3D Printing ។ ជាមួយ​គ្នានេះ STEAMING Cambodia ក៏​បានជួយ​ទៅ​ដល់​ការ​ធ្វើទំនើបកម្ម Lab ទាំង៤ របស់ដេប៉ាតឺម៉ង់ទេព្យកោសល្យឧស្សាហកម្ម និងមេកានិក ធ្វើ​យ៉ាងណាឱ្យ​រាល់គម្រោងស្រាវជ្រាវនានារបស់ Lab ទាំង៤ អាចទទួលបានគាំទ្រពីបច្ចេកវិទ្យារបស់​ក្រុមហ៊ុន Siemens បានផងដែរ៕