មនុស្សអាចទទួលឥទ្ធិពលតាមរយៈការប្រើប្រាស់ថាមពល និងពេលវេលាដែលពួកគាត់បានវិនិយោគជាមួយ។ ហើយនៅពេលពួកគាត់មានឱកាសនៅក្បែរមនុស្សដែលមានផ្នត់គំនិតវិជ្ជមានច្រើន នោះក៏នឹងទទួលឥទ្ធិពលល្អៗក្នុងការមើលទៅកាន់ពិភពខាងក្រៅក្នុងផ្លូវល្អដូចគ្នា ។ មិនតែប៉ុណ្ណោះទេ គឺថែមទាំងមានលទ្ធភាពសម្រេចបានកិច្ចការច្រើនជាងមុនបន្ថែមទៀតផង។ លោក Aimee Bateman ជាអ្នកប្រឹក្សាផ្លូវចិត្តបានឱ្យដឹងថា ការសេពគប់ជាមួយមនុស្សមានទស្សនៈវិជ្ជមាន ក៏ជាចំណែកសំខាន់ ជួយឱ្យអ្នកមានឱកាសសម្រេចជោគជ័យក្នុងគោលដៅផងដែរ។

យោងតាមគេហទំព័រ staples បានឱ្យដឹងបន្ថែមថា ការចំណាយពេលនៅក្បែរមនុស្សដែលបរិបូរណ៍ដោយក្ដីរំភើបរីករាយ មានទស្សនៈជីវិតរស់នៅល្អ គឺជាគន្លឹះមួយជួយឱ្យការរស់នៅក្នុងដំណើរជីវិតកាន់តែមានកម្លាំងចិត្តច្រើនជាងមុន ។ តើលោកអ្នកធ្លាប់កត់សម្គាល់ដែរទេ នៅពេល ​​​​​​​​​​​​​​ដែលអ្នកទទួលបន្ទុកការងារហាក់លើសចំណុះ វាក៏អាចបណ្តាលឱ្យប៉ះពាល់អារម្មណ៍របស់អ្នកបានដូចគ្នា! ទន្ទឹមគ្នានោះ ប្រសិនបើអ្នកបានជួបមិត្តរួមអាជីពណាម្នាក់ ជាបុគ្គលដែលមានផ្នត់គំនិតវិជ្ជមាននៅក្បែរខ្លួន នោះរាល់ទុក្ខកង្វល់ទាំងអម្បាលណា ក៏នឹងរសាយបាត់ទៅវិញបន្តិចម្តងៗក្នុងរយៈពេលខ្លី ក៏ដោយហេតុថា បុគ្គលប្រភេទនេះ គឺងាយស្វែងរកច្រកចេញពេលមានបញ្ហាម្តងព្រមទាំងរកបានប្រកបដោយគន្លឹះសមស្របទៀតផង។

លោក Jim Rohn ជាវាគ្មិនមានជំនាញនិយាយលើកទឹកចិត្ត មានប្រសាសន៍ក្នុងន័យដូច្នោះថា នៅពេលដែលយើងចំណាយពេល នៅក្បែរមនុស្សដែលពោរពេញដោយផ្នត់គំនិតវិជ្ជមាន វាក៏ជំរុញឱ្យអ្នក កាន់តែទទួលបានកម្លាំងជំរុញចិត្ត និងទឹកចិត្តក្នុងការបន្តរស់នៅ ឬក៏ប្រឈមនឹងបញ្ហានានា ពីព្រោះការរស់នៅពេលខ្លះហាក់មិនមានភាពងាយស្រួលគ្រប់ពេលនោះទេ ដែលជាហេតុចាំបាច់ ត្រូវមានមនុស្សបង្កើនទស្សនៈវិជ្ជមាន ឱ្យមានចំនួនច្រើនបន្ថែមជុំវិខ្លួនរបស់យើង។

តើបុគ្គលិកលក្ខណៈបែបណា ទើបហៅថាជាមនុស្សមានផ្នត់គំនិតវិជ្ជមាន ? តាមពិតទៅ មនុស្សមានផ្នត់គំនិតវិជ្ជមាន ឬក៏ហៅថាមនុស្សដែលមានពន្លឺរស្មី! គឺពួកគាត់ មិនគ្រាន់តែសម្បូរនូវសុភមង្គល ឬក៏ភាពរីករាយប៉ុណ្ណោះទេ ប៉ុន្តែបានបង្កប់នូវការផ្តល់កម្លាំងចិត្តទៅកាន់អ្នកដទៃ និងមានថាមពលជួយឱ្យអ្នកដទៃមានទឹកចិត្តក្នុងការបន្តកិច្ចការណាមួយ ហើយថែមទាំងការ​​​​​​​​​​​​​​​​​​​​​លើកទឹកចិត្តប្រកបដោយហេតុផលឱ្យសម្រេចសមិទ្ធផលដែលរំពឹងទុក។ ជារួមគឺមានន័យថា ជាប្រភេទមនុស្សមានសមត្ថភាពក្នុងការផ្តល់កម្លាំងចិត្ត ជំរុញទឹកចិត្ត និងលើកទឹកចិត្ត។ ហើយការអនុញ្ញាត ឬវិនិយោគពេលឱ្យខ្លួនឯងមានឱកាសក្បែរមនុស្សល្អៗ វាក៏ជួយឱ្យអ្នកទទួលបានបទពិសោធន៍ល្អៗដូចគ្នា ថែមទាំងផ្តល់គុណតម្លៃទៅកាន់ដំណើរជីវិតនៃការរស់នៅ។

គួរកត់សម្គាល់ផងដែរថា បុគ្គលប្រភេទនេះមាននៅគ្រប់ទីកន្លែង មិនមែនមានតែនៅកន្លែងការងារនោះទេ! ដែលមានដូចជា សមាជិកគ្រួសារ និងមិត្តជាដើម។ ពួកគេមានសមត្ថភាពផ្តល់កម្លាំងចិត្តទៅកាន់អ្នក និងជួយឱ្យអ្នកមានផាសុកភាព ក្នុងការបន្តដំណើរទៅមុខក្នុងផ្លូវជីវិតដ៏វែងឆ្ងាយ។ គួរកត់ចំណាំបន្តទៀតដែរ មនុស្សប្រភេទនេះមិនងាយរងនូវការរំខានអារម្មណ៍ ពីសំណាក់មជ្ឈដ្ឋានបរិយាកាសខាងក្រៅនោះទេ ថែមទាំងជាបុគ្គលដែលមានផលិតភាពច្រើន និងមានទឹកចិត្តក្នុងការជួយជ្រោមជ្រែងទៅកាន់អ្នកដទៃទៀតផង។

តើចំណែកខ្លួនឯងវិញ គួរធ្វើបែបណាទើបអាចបណ្តុះផ្នត់គំនិតវិជ្ជមានបាន? សាមញ្ញៗ!មានរឿងមួយគួរឱ្យកត់សម្គាល់គឺ ការបង្ហាញទម្លាប់វិជ្ជមាន និងសកម្មភាពវិជ្ជមានក៏ជាចំណែកជំរុញឱ្យទាក់ទាញរឿងល្អៗទៅកាន់ខ្លួនឯងបានមួយផ្នែកដែរ! ប៉ុន្តែគួរកុំភ្លេចអំពីការរក្សាគោលជំហរខ្លួនឯង។ ហើយឧស្សាហ៍ញញឹមឱ្យបានច្រើន និងមួយវិញទៀត ការធ្វើរឿងល្អៗទៅកាន់អ្នកដទៃ ឬមនុស្សជុំវិញខ្លួនទាំងឡាយ ​អាចថា ជាផលជះបែបវិជ្ជមានយ៉ាងច្រើន ក្នុងការជួយឱ្យលោកអ្នកមានអារម្មណ៍ល្អ និងពង្រឹងផ្នត់គំនិតបែបវិជ្ជមានឱ្យបានច្រើនជាងមុន៕