កាលពីថ្ងៃទី២៥ ខែវិច្ឆិកា ឆ្នាំ២០២៥ ក្រសួងអប់រំ យុវជន និងកីឡា បានចេញសេចក្ដីណែនាំ ដោយ​ប្រាប់ដល់គ្រឹះស្ថាន​មធ្យមសិក្សា​ចំណេះទូទៅ​សាធារណៈ ឱ្យ​មានដំណើរការបង្រៀន និងរៀនពេញមួយថ្ងៃ។ អ្នកនាំពាក្យក្រសួងអប់រំ យុវជន និងកីឡា លើកឡើងថា សេចក្តីណែនាំ​ដែល​ជំរុញឱ្យ​គ្រឹះស្ថានមធ្យមសិក្សាចំណេះទូទៅសាធារណៈដំណើរការបង្រៀន និងរៀនពេញមួយថ្ងៃនេះ គឺដើម្បីលើកកម្ពស់គុណភាពអប់រំ ឆ្លើយតបទៅនឹង​តម្រូវការ​ពិតប្រាកដ​របស់សហគមន៍ មាតាបិតា ឬអ្នកអាណាព្យាបាល នាពេលបច្ចុប្បន្ន។

ក្នុង​សេចក្ដីណែនាំ ក្រសួងអប់រំជំរុញឱ្យគ្រឹះស្ថានសិក្សាកំណត់កាលវិភាគបង្រៀនយ៉ាងតិច ៤០ម៉ោងសិក្សាក្នុងមួយសប្ដាហ៍ ដោយក្នុងមួយម៉ោងសិក្សាមានរយៈពេល ៥០នាទី។ សម្រាប់គ្រឹះស្ថានសិក្សាចំណេះទូទៅ ត្រូវកំណត់ម៉ោងសិក្សាដោយពេលព្រឹកចូលម៉ោង ៧:00 ចេញម៉ោង ១១:០០ និងរសៀលចូលម៉ោង ១៣:០០ ឬម៉ោង ១៤:០០ ចេញម៉ោង ១៦:០០ ឬម៉ោង ១៧:00។

សម្រាប់ការគ្រប់គ្រងបច្ចេកទេសបង្រៀន និងរៀន រួមមាន ភាសាខ្មែរ គណិតវិទ្យា ភាសាបរទេស និងមុវិជ្ជាមួយចំនួនទៀត ដែលអាចបត់បែនការអនុវត្ត ឬតាមស្ថានភាពជាក់ស្ដែងរបស់សាលារៀន ព្រមទាំងជួយសិស្សរៀនយឺតផងដែរ។ ហើយប្រសិនបើ​មានលទ្ធភាព អាច​បញ្ចូល​ការ​អនុវត្តកម្មវិធី​សិក្សា​ទំនើប ដោយបន្ថែម​មុខ​វិជ្ជា​ភាសាអង់គ្លេស ចិន កុំព្យូទ័រ ការ​អប់រំស្ទែម រ៉ូបូទិក ក៏​ដូចជា​ការ​អប់រំ​សិល្បៈ កីឡា ជា​ដើម។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាស៍ថា ដំណើរការបង្រៀន និងរៀនពេញមួយថ្ងៃនេះ គឺជាអ្វីដែលក្រសួងអប់រំ បានត្រៀមលក្ខណៈជាច្រើនឆ្នាំណាស់មកហើយ ដើម្បីធ្វើយ៉ាងណាលើកកម្ពស់គុណភាពអប់រំ។ ជាក់ស្ដែង នៅក្នុងឆ្នាំសិក្សា២០១៦ និង២០១៨កន្លងមក ក្រសួងអប់រំ បានសិក្សា និងដាក់ចេញក្របខណ្ឌកម្មវិធីសិក្សាថ្មី ក៏ដូចជាកម្មវិធីសិក្សាលម្អិតតាមមុខវិជ្ជានីមួយៗ ដែលកម្មវិធីសិក្សានោះបានចង្អុលបង្ហាញពីការអនុវត្តកម្មវិធីសិក្សាពេញមួយថ្ងៃ។

លោកជំទាវ ឃួន វិច្ឆិកា បញ្ជក់ថា ភាពជោគជ័យដែលក្រសួងអប់រំអនុវត្តកម្មវិធីរៀនពេញមួយថ្ងៃ បានធ្វើឱ្យក្រសួងសម្រេចចិត្តពង្រីកវិសាលភាពនេះ ដោយបច្ចុប្បន្នមានសាលារៀនជំនាន់ថ្មីចំនួន១៤ កំពុងដំណើរការនៅទូទាំងប្រទេស ហើយក្រសួងអប់រំ គ្រោងពង្រីកវិសាលភាពសាលារៀនជំនាន់ថ្មីចំនួន ៨បន្ថែមទៀតនៅឆ្នាំក្រោយ។

អ្នកនាំពាក្យក្រសួងអប់រំបន្ថែមថា ស្របជាមួយគ្នា ក្រសួងក៏​បានដាក់ឱ្យ​សាលារៀនគំរូអនុវត្តផងដែរ ដោយ​សាលារៀនដែលទទួលបានជាសាលាស្តង់ដាសាលារៀនគំរូប្រមាណ ២០០សាលា បានទទួលសេចក្ដីណែនាំនេះតាំងពីដើមឆ្នាំសិក្សា​២០២៤-២០២៥ នៅក្នុងការអនុវត្តការបង្រៀនបន្ថែមយ៉ាងតិច ២ម៉ោងក្នុងមួយថ្ងៃ។

យ៉ាងណា បើតាម​លោកជំទាវ ឃួន វិច្ឆិកា តាមរយៈសេចក្ដីណែនាំកន្លងមក ក្រសួងអប់រំ ក៏សង្កេតឃើញថា សាលារៀនជាច្រើនបានចាប់ផ្ដើមពង្រីកវិសាលភាពរបស់ខ្លួន ទៅតាមធនធានដែលមានស្រាប់តាមការអនុវត្តកម្មវិធីសិក្សាបន្ថែមម៉ោងនេះ។ ក្រោយពេលរៀបចំកម្មវិធីសិក្សានេះរួចរាល់ ក្រសួងក៏បានរៀបចំឱ្យមានសាលារៀនជំនាន់ថ្មី ដែលកម្មវិធីសាលារៀនជំនាន់ថ្មីនេះ គឺជាសាលារៀនដែលអនុវត្តការរៀនពេញមួយថ្ងៃ៕