ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អនុវត្តន៍រាល់សកម្មភាពទាំងឡាយណាដែលជំរុញដល់ការយកចិត្តទុកដាក់ចំពោះខ្លួនឯងដូចជា ការលួងលោមខ្លួនឯង និយាយវិជ្ជមានជាមួយខ្លួនឯង គឺជាទម្លាប់ដែលអាចកាត់បន្ថយការដាក់សម្ពាធចំពោះខ្លួនឯង នៅពេលស្ថិតក្នុងស្ថានការណ៍លំបាក ឬក៏នៅពេលមានសម្ពាធផ្លូវចិត្តដោយសារការប្រព្រឹត្តខុសឆ្គងណាមួយ។ ជារឿយៗនៅពេលនរណាម្នាក់មកសុំជំនួយ ឬត្រូវការការលើកទឹកចិត្ត យើងមានប្រយោគវិជ្ជមានជាច្រើនក្នុងការលួងលោម ផ្តល់ការគាំទ្រយ៉ាងពេញទំហឹងទៅកាន់ពួកគេ ប៉ុន្តែនៅពេលស្ថិតក្នុងស្ថានភាពរបស់ខ្លួនឯងវិញ បែរជារកពាក្យអ្វីថ្លែងមកកាន់ខ្លួនឯងមិនបាន។ នេះហៅថាមិនបានផ្តល់ការអាណិតមកកាន់ខ្លួនឯងបានពេញលេញនៅឡើយទេ។
សកម្មភាពដែលផ្តល់ការអាណិតអាសូរចំពោះខ្លួនឯង សុទ្ធសឹងតែជាចំណែកសំខាន់ដូចគ្នា តួយ៉ាងដូចជា ព្យាយាមយល់ពីតម្រូវការផ្ទាល់ខ្លួន ការនិយាយពាក្យវិជ្ជមានរៀងរាល់ថ្ងៃ សមាធិ អប់រំចិត្ត ផ្ចង់ស្មារតីចំពោះបច្ចុប្បន្នភាព ជារួមធ្វើល្អជាមួយខ្លួនឯងឱ្យដូចទៅនឹងការធ្វើល្អជាមួយអ្នកដទៃ។ The Newyourk time បានបកស្រាយអំពីវិធីសាស្រ្តក្នុងការកាត់បន្ថយការដាក់សម្ពាធចំពោះខ្លួនឯងដោយការធ្វើល្អជាមួយនឹងខ្លួនឯង ឬការអនុវត្តសកម្មភាពដែលផ្តល់ការអាណិតអាសូរចំពោះខ្លួនឯង។
ទន្ទេញ ឬនិយាយពាក្យវិជ្ជមានជាមួយខ្លួនឯងរាល់ថ្ងៃ ៖ ជាដំបូងសាកទុកពេលឆ្លុះបញ្ចាំងជាមួយនឹងខ្លួនឯងបន្តិច ថា តើក្នុងពេលពេញមួយថ្ងៃបានធ្វើអ្វីខ្លះដែលគាំទ្រដល់សុខភាពផ្លូវចិត្តរបស់ខ្លួន? ប្រសិនបើមានទម្លាប់និយាយដោយមិនបានគិតពីផលប៉ះពាល់ចំពោះខ្លួនទេ មិនខុសអី ពីការប្រើប្រាស់ទម្លាប់ប្រចាំថ្ងៃឱ្យក្លាយជាសត្រូវនឹងខ្លួនឯងនោះទេ! ពេលខ្លះយើងមានទម្លាប់ប្រុងប្រយ័ត្នពាក្យសម្តី ឬការប្រព្រឹត្តមិនល្អជាមួយអ្នកដទៃតែប៉ុណ្ណោះ តែបែរជាមិនប្រយ័ត្នជាមួយខ្លួនឯង យូរៗទៅនឹងជំរុញឱ្យផ្នត់គំនិតអវិជ្ជមានរីកដុះដាល ហើយសុខភាពផ្លូវចិត្តធ្លាក់ចុះ។ ហើយអ្វីដែលគួរមើលឡើងវិញនៅត្រង់ចំណុចនេះគឺ ការអនុវត្តជាមួយមិត្តល្អរបស់ខ្លួនបែបណា សូមកុំភ្លេចអនុវត្តន៍ជាមួយខ្លួនឯងបែបនោះដូចគ្នា។
ការស្វែងយល់អំពីសម្ពាធដែលកំពុងមាន ៖ ការទុកចន្លោះនិងព្យាយាមស្វែងយល់ពីអ្វីៗ ដែលបានកើតមាន ជាពិសេសអំឡុងពេលបាក់ទឹកចិត្តស្ត្រេស ការបន្ទោសខ្លួនឯងជាញឹកញយ ការខកចិត្ត និងអស់សង្ឃឹមជាដើម គឺជាពេលមួយដែលចាំបាច់ត្រូវការឆ្លុះបញ្ចាំងដើម្បីរកឱ្យឃើញអំពីដើមចមបញ្ហា។ បន្ថែមពីនោះ កត់សម្គាល់ដូចគ្នាដែរ ថា តើបញ្ហាដែលកើតមានវាប៉ះពាល់សុខភាពផ្លូវចិត្ត ផ្លូវកាយ ឬក៏ថាមពលកម្រិតណា? ការដោះស្រាយដែលមានភាពឈ្លាសវៃនៅត្រង់ចំណុចនេះ គឺការស្វែងយល់ ឬកត់ចំណាំ ជំនួសឱ្យការគេចវេស។ ប្រសិនបើលំបាកខ្លាំងរហូតគាំងគំនិត គិតមិនឃើញដំណោះស្រាយដែលល្អចំពោះខ្លួនឯងនោះទេ សាកស្រមៃបន្តិចថា ប្រសិនបើបញ្ហានេះកើតឡើងទៅលើមិត្ត តើអ្នកនឹងនិយាយពាក្យអ្វីទៅកាន់ពួកគេ? សារក្នុងន័យនេះ គឺ និយាយជាមួយខ្លួនឯងឱ្យដូចគ្នា ពេលដែលនិយាយលើកទឹកចិត្តអ្នកដទៃ។
តាមការសិក្សាពីសិស្សមិនទាន់បញ្ចប់ពីមហាវិទ្យាល័យប្រមាណ១៣៥នាក់ បានឱ្យដឹងថា មនុស្សដែលបានអនុវត្តន៍សកម្មភាពដែលជំរុញឱ្យស្មារតីស្ថិតក្នុងបច្ចុប្បន្នភាពរយៈការចំណាយពេលមួយថ្ងៃ២០នាទីក្នុងការដាក់ដៃស្តាប់ចង្វាក់បេះដូង ហើយសួរខ្លួនឯងថា តើខ្ញុំធ្វើយ៉ាងដូចម្តេចទើបអាចក្លាយជាមិត្តល្អនឹងខ្លួនឯងបាន? ការធ្វើបែបនេះបានជាប្រចាំ បានជំរុញឱ្យពួកគេ អាចកាត់បន្ថយស្ត្រេស និងការយល់ចិត្ត អាណិតអាសូរចំពោះខ្លួនឯងបានភាគរយខ្ពស់ជាងមុន។
ការផ្តល់ជូនទៅមជ្ឈដ្ឋានខាងក្រៅ ៖ រីករាយជាមួយខ្លួនឯង ងាយស្រួលក្នុងការរីករាយជាមួយអ្នកដទៃ ធ្វើល្អជាមួយខ្លួនឯង មិនពិបាកធ្វើល្អជាមួយអ្នកដទៃដូចគ្នា។ បន្ទាប់ពីបានអនុវត្តន៍ការផ្តល់ក្ដីអាណិតអាសូរចំពោះខ្លួនឯងបានល្អហើយ ជំហានបន្ទាប់គឺការផ្តល់ឱ្យទៅកាន់អ្នកដទៃ ដោយការប្រើប្រាស់ភាសាលើកទឹកចិត្ត ផ្តល់កម្លាំងចិត្ត ការគាំទ្រគ្នាបង្ហាញឱ្យគ្នាដឹងថា គ្មាននរណាម្នាក់ត្រូវបានទុកចោល រួមជាមួយនឹងការផ្សាភ្ជាប់ទំនាក់ទំនងគ្នាប្រកបដោយផាសុកភាព ឬមួយក៏ការចូលរួមស្ម័គ្រចិត្តជាមួយកម្មវិធីដែលផ្តល់ផលវិជ្ជមានទៅកាន់សង្គម។
គួរជម្រាបជូនថា ការធ្វើល្អជាមួយខ្លួនឯង គឺមានន័យថាការមិនបំពានអ្នកដទៃ ឬព្យាយាមកុំធ្វើឱ្យអ្នកដទៃឈឺចាប់ដោយសារខ្លួនដូចគ្នា៕
