ការចាប់ផ្ដើមនៃរដូវវស្សាបានចូលរួមកាត់បន្ថយកម្ដៅ ដែលក្ដៅខ្លាំងក្នុងរដូវប្រាំង និងផ្ដល់ឱ្យយើងនូវអារម្មណ៍ផាសុកភាពក្នុងការរស់នៅ ប៉ុន្តែការមកដល់នៃខ្យល់មូសុងនៃរដូវវស្សា ក៏នាំមកនូវជំងឺជាច្រើនផងដែរ មានទាំងជំងឺឆ្លង និងជំងឺមិនឆ្លង។ ប្រសិនបើមិនយកចិត្តទុកដាក់ថែសុខភាពឱ្យបានល្អ សំណើមក្នុងខ្យល់ និងភ្លៀងធ្លាក់ខ្លាំងក្នុងរដូវនេះ នឹងធ្វើឱ្យយើងឈឺមិនខាន។ យើងសង្កេតឃើញមានជំងឺចំនួន ៤ដែលឧស្សាហ៍កើតមានក្នុងរដូវនេះ និងទាមទារឱ្យយើងមានការប្រុងប្រយ័ត្ន និងការពារខ្លួនឱ្យបានល្អ។

១. គ្រុនឈាម (Dengue) ៖ គ្រុនឈាម ជាជំងឺដែលកាចសាហាវ នឹងងាយកើតមានជាងគេនៅរដូវភ្លៀង។ ជំងឺនេះ កើតឡើងដោយសារមូសខ្លាខាំ ហើយមានរោគសញ្ញាមួយចំនួនដូចជា គ្រុនក្ដៅ ឡើងកន្ទួលក្រហម ឈឺក្បាល និងចំនួនផ្លាកែតទាប។ ដើម្បីជៀសវាងការកើតមានជំងឺគ្រុនឈាម អ្នកត្រូវប្រាកដថា អ្នករក្សាអនាម័យនៅផ្ទះបានល្អ ហើយរៀបចំរបស់របរផ្សេងៗ ពិសេស​លុប​ថ្លុកទឹកដែល​នៅ​ក្បែរៗផ្ទះកុំ​ឱ្យ​កើត​មាន​ដង្ហូវទឹក។

២. គ្រុនពោះវៀន (Typhoid)៖ ការបរិភោគអាហារ និងទឹកដែលមានមេរោគ គឺជាមូលហេតុចម្បង ដែលនាំឱ្យមានជំងឺគ្រុនពោះវៀន។ បាក់តេរី Salmonella typhi ដែលមាននៅក្នុងទឹកមិនស្អាត និងអាហារដែលគ្មានអនាម័យ ជាភ្នាក់ងារបង្កឱ្យមានជំងឺនេះ។ ដូច្នេះ អ្នកជំនាញ បានណែនាំឱ្យយើងជៀសវាងការញ៉ាំអាហារដែលគ្មានអនាម័យជាចាំបាច់ ត្រូវប្រាកដថា ទឹកដែលអ្នកទទួលទានជាទឹកស្អាត ជាពិសេសក្នុងរដូវភ្លៀង។ ការរក្សាអនាម័យបានល្អ គឺជាកត្តាសំខាន់ដែលអាចការពារអ្នក និងគ្រួសារពីជំងឺគ្រុនពោះវៀន។

៣. រលាកថ្លើមប្រភេទ A (Hepatitis A)៖ ការទទួលទានទឹក និងអាហារ ដែលមិនមានអនាម័យ អាចបង្កឱ្យអ្នកមានជំងឺថ្លើមប្រភេទ A។ ការកើតមានជំងឺនេះ ប៉ះពាល់ខ្លាំងទៅដល់សុខភាពថ្លើម ព្រមទាំងអាចគំរាមកំហែងដល់អាយុជីវិតអ្នកជំងឺទៀតផង។ ហេតុនេះ នៅរដូវភ្លៀង យើងត្រូវរក្សាអនាម័យឱ្យបានខ្ពស់។ ជាពិសេស ដើម្បីការពារខ្លួនពីជំងឺនេះ រាល់បន្លែ ផ្លែឈើ ដែលយើងទទួលទាន គួរតែត្រូវបានសម្អាតឱ្យបានស្អាត។

៤. គ្រុនក្ដៅ (Viral fever)៖ ការកើតជំងឺគ្រុនក្ដៅគឺជារឿងធម្មតា នៅពេលអាកាសធាតុប្រែប្រួល។ រោគសញ្ញានៃជំងឺនេះ មានដូចជា ក្ដៅខ្លួន ញាក់ និងឈឺរាងកាយ។ ជំងឺនេះ ជាប្រភេទជំងឺឆ្លង វាកើតឡើងដោយសារការប៉ះពាល់រាងកាយគ្នា ឬការធ្វើដំណើរកាត់ទឹកភ្លៀង។ អ្នកជំងឺត្រូវរងចាំចាប់ពី ៣ថ្ងៃ ទៅ៧ថ្ងៃ ដើម្បីជាសះស្បើយពីជំងឺនេះ។ ហេតុនេះ ដើម្បីការពារខ្លួនពីជំងឺគ្រុនក្តៅ អ្នកគួរទទួលទានទឹកក្ដៅឱ្យបានច្រើន និងជៀសវាងការធ្វើដំណើរកាត់ភ្លៀង និងខ្យល់ខ្លាំង ម្យ៉ាងទៀតត្រូវជៀសវាងការប៉ះផ្ទាល់ជាមួយបុគ្គល ដែលកំពុងឈឺជំងឺនេះ៕