នៅក្នុងសន្និសីទសារព័ត៌មានស្ដីពីពិព័រណ៍សៀវភៅកម្ពុជា លើកទី១២ នៅសមាគមអ្នកនិពន្ធខ្មែរ នាព្រឹកថ្ងៃទី២៦ ខែវិច្ឆិកា ឆ្នាំ២០២៥ ឯកឧត្តម គឹម ពីនន់ អនុរដ្ឋលេខាក្រសួងវប្បធម៌ និងវិចិត្រសិល្បៈ មានប្រសាសន៍ថា ពិព័រណ៍សៀវភៅកម្ពុជា បន្តជំរុញទម្លាប់អាន ជាពិសេសក្នុងចំណោមយុវជន កាន់តែផុសផុលគួរឱ្យកត់សម្គាល់។

ឯកឧត្តម គឹម ពីនន់ មានប្រសាសន៍ថា ការរៀបចំពិព័រណ៍សៀវភៅ ដែលបានកើនឡើងពីស្តង់តិចតួចរហូតដល់ជាង ៣០០ ស្តង់នាពេលបច្ចុប្បន្ន គឺជាសញ្ញាឆ្លុះបញ្ចាំងពីការចង់ចេះ ចង់ដឹង និងការគាំទ្រសៀវភៅពីសំណាក់ប្រជាជនខ្មែរ ជាពិសេសស្រទាប់យុវវ័យ។ ទន្ទឹមនឹងនេះ សៀវភៅដែលដាក់តាំងមានច្រើនប្រភេទ ទាំងអក្សរសិល្ប៍ វិទ្យាសាស្ត្រ និងមានអ្នកនិពន្ធខ្មែរបានកើនឡើងផងដែរ។

បើទោះជាមានការចាប់អារម្មណ៍ច្រើនលើវិស័យអានសៀវភៅក៏ដោយ ឯកឧត្តម គឹម ពីនន់ បានលើកឡើងថា ប្រជាជនកម្ពុជានៅមិនទាន់មាន “វប្បធម៌នៃការអាន” បានល្អនៅឡើយទេ បើប្រៀបធៀបនឹងប្រទេសមួយចំនួន។ ឯកឧត្តមបន្តថា ការអានភាគច្រើនកើតឡើងនៅក្នុងសាលារៀន តាមការតម្រូវរបស់គ្រូបង្រៀន ឬសាស្ត្រាចារ្យ គឺមិនទាន់កើតចេញពីស្មារតីចង់អានដោយស្ម័គ្រចិត្តនោះទេ។

ឯកឧត្តម គឹម ពីនន់ សង្ឃឹមថា ការរៀបចំឱ្យមានពិព័រណ៍សៀវភៅកម្ពុជានេះ បន្តិចម្តងៗនឹងបណ្តុះគំនិតវប្បធម៌នៃការអានដោយស្ម័គ្រចិត្ត។

ជាមួយគ្នានេះ ឯកឧត្តម ហុក សុទ្ធិ ប្រធានសមាគមបណ្ណារក្សកម្ពុជា និងជានាយកអង្គការស៊ីប៉ា មានប្រសាសន៍​ថា ដោយសារកម្ពុជាធ្លាប់ជួបរបបប្រល័យពូជសាសន៍ ប៉ុល ពត ជាង៣ឆ្នាំ ដែលបានសម្លាប់បញ្ញវន្ត ដូចជាគ្រូបង្រៀន អ្នកនិពន្ធ ប្រមាណ៨០ភាគរយ និងបានដុតបំផ្លាញសៀវភៅស្ទើរទាំងស្រុង ទើបធ្វើឱ្យបាត់បង់ការផ្ទេរទម្លាប់អានតាមគ្រួសារពីជំនាន់មួយទៅជំនាន់មួយ។ ឯកឧត្តមបន្តថា កាលណាកូនមិនឃើញឪពុកម្តាយអានសៀវភៅ កូនក៏មិនអាចអាន និងមិនយល់ពីអត្ថប្រយោជន៍នៃការអានដែរ។

ឯកឧត្តម ហុក សុទ្ធិ បន្ថែមថា ការអានសៀវភៅ គឺជាវិធីទទួលបានចំណេះដឹងរឹងមាំជាងគេ។ ឯកឧត្តម ហុក សុទ្ធិ ក៏សង្កេតឃើញថា បច្ចុប្បន្នក្មេងៗនៅជនបទមិនអៀនក្នុងការអាននោះទេ ប៉ុន្តែយុវជននៅទីក្រុងវិញហាក់ញៀននឹងទូរស័ព្ទ តែក៏មានការអានតាមឌីជីថលដែរ ប៉ុន្តែមិនមាំទាំដូចការអានតាមរយៈសៀវភៅ។ យើងសង្ឃឹមថា អាចកែឱ្យមានទម្លាប់អានសៀវភៅបានប្រសើរជាងនេះ។

លោកស្រី ម៉ៅ កូឡាប ប្រធានកម្មវិធីអភិវឌ្ឍន៍យុវជន និងបណ្ណាល័យ អង្គការស៊ីប៉ា យល់ឃើញថា ការអានសៀវភៅនៅកម្ពុជាបានកើនឡើងដោយសារតែមានអ្នកនិពន្ធដែលមានគុណភាព។ ប្រសិនបើអ្នកនិពន្ធមិនមានគុណភាព ក៏គ្មានវត្តមានអ្នកអានច្រើនដែរ។ លោកស្រី ម៉ៅ កូឡាប បន្តថា ការជំរុញឱ្យវិស័យសៀវភៅនៅកម្ពុជាទៅដល់កម្រិតអន្តរជាតិ គឺមិនទាន់ទៅដល់នៅឡើយ ដោយសារការតែងនិពន្ធភាគច្រើនជាភាសាខ្មែរ។

សម្រាប់ ឯកឧត្តម សុខ ឫទ្ធី ប្រធានសមាគមអ្នកបោះពុម្ពផ្សាយសៀវភៅកម្ពុជា លើកឡើងស្រដៀងគ្នាថា ឧបសគ្គភាសា នៅតែកំណត់ការផ្សព្វផ្សាយសៀវភៅកម្ពុជាទៅកាន់កម្រិតអន្តរជាតិ។ ឯកឧត្តម សុខ ឫទ្ធី ក៏បានជំរុញឱ្យមានស្នាដៃបកប្រែ និងធ្វើយ៉ាងណាឱ្យវិស័យតែងនិពន្ធនៅកម្ពុជាអាចឈានដល់កម្រិតអន្តរជាតិ។ ឯកឧត្តម សុខ ឫទ្ធី រំពឹងថា ពិព័រណ៍សៀវភៅកម្ពុជាលើកទី១២ ឆ្នាំ២០២៥ នេះ នឹងមានអ្នកចូលរួមទស្សនា និងទិញសៀវភៅមិនក្រោម ១០ម៉ឺននាក់ឡើយ។

គួរជំរាបជូនថា ឆ្នាំនេះ គឺជាឆ្នាំទី១២ហើយដែលក្រសួងវប្បធម៌ និងវិចិត្រសិល្បៈ រួមជាមួយក្រសួងអប់រំ យុវជន និងកីឡា និងក្រសួងព័ត៌មាន បានរៀបចំពិព័រណ៍សៀវភៅថ្នាក់ជាតិ លើកទី១២ ឆ្នាំ២០២៥ ដែលនឹងប្រព្រឹត្ត​ធ្វើ​ចាប់ពីថ្ងៃទី១១ ដល់ថ្ងៃទី១៤ ខែធ្នូ ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ (បរិវេណ Elysée) ក្រោមប្រធានបទ «សៀវភៅជាជំនួយបញ្ញា ជាអាហារគំនិត»៕