ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ព្រឹត្តិការណ៍កីឡាស៊ីហ្គេមលើកទី ៣២នៅកម្ពុជាបានលេចឡើងនូវរឿងរ៉ាវល្អៗ និងគួរជាទីមោទនៈជាច្រើន ដែលធ្វើឱ្យពិភពលោកបានស្គាល់ និងចាប់អារម្មណ៍ពីកម្ពុជាកាន់តែខ្លាំង។ ក្រៅតែពីរឿងរ៉ាវអត្តពលិកកម្ពុជា ប៊ូ សំណាង ដែលមកដល់ទីក្រោយគេ ប៉ុន្តែបានឈ្នះបេះដូងអ្នកទស្សនានោះ ពេលនេះ គេឃើញមានរឿងរ៉ាវមួយទៀត នោះគឺ កីឡាករអត្តពលកម្មសិង្ហបុរី Soh Rui Yong ដែលទទួលបានជ័យលាភីមេដាយប្រាក់ ក្នុងវិញ្ញាសាអត្តពលកម្ម ១០,០០០ ម៉ែត្របុរស បានបង្ហាញស្មារតីកីឡាក៏គួរឱ្យគោរព និងស្ញប់ស្ញែង តាមរយៈការចែករំលែកទឹករបស់ខ្លួន ទៅកាន់អត្តពលិកឥណ្ឌូនេស៊ី Rikki Martin Luther Simbolon ដែលកំពុងរត់នាំមុខ បន្ទាប់ពីអត្តពលិកឥណ្ឌូនេស៊ីខកខានក្នុងការយកចំណែកទឹករបស់គាត់ នៅកីឡដ្ឋានមរតកតេជោ កាលពីថ្ងៃទី១១ ខែឧសភា ឆ្នាំ២០២៣។
ក្រោយប្រកួតប្រជែងយ៉ាងស្វិតស្វាញ កីឡាករ Soh បានរត់ដល់ទីក្នុងលំដាប់ទី២ ដោយប្រើថេរវេលា ៣១:១០:៧០ យឺតជាងអត្តពលិកឥណ្ឌូនេស៊ី Martin ដែលប្រើថេរវេលា ៣១:០៨:៨៥ និងក្លាយជាម្ចាស់មេដាយមាស ។ Soh បានលើកឡើងថា
“ខ្ញុំប្រហែលជារំភើបខ្លាំងជាងនេះ ប្រសិនបើខ្ញុំអាចពន្លឿនការរត់នៅវិនាទីចុងក្រោយ ដោយអាចយកឈ្នះអ្នកនាំមុខ។ ប៉ុន្តែគាត់ពិតជាសមនឹងទទួលបានជ័យលាភីនេះមែន។”
ស្មារតីរបស់អត្តពលិកសិង្ហបុរី បានបង្ហាញថា កីឡាគឺលើការប្រកួតយកឈ្នះចាញ់ ប៉ុន្តែកីឡានាំមកនូវសាមគ្គីភាព មិត្តភាព និងការរួបរួម។ យ៉ាងណាមិញ Soh ក៏បានបង្កើតកំណត់ត្រាថ្មីសម្រាប់ប្រជាជាតិសិង្ហបុរីផងដែរ ដោយបានបញ្ចប់ការរង់ចាំរយៈពេល ៤០ឆ្នាំ ក្នុងការឈ្នះមេដាយស៊ីហ្គេម ក្នុងវិញ្ញាសាអត្តពលកម្ម ១០,០០០ម៉ែត្របុរស។
“ខ្ញុំគិតថា នេះគឺជាការប្រកួតរត់ប្រណាំងចុងក្រោយរបស់ខ្ញុំ ព្រោះនៅស៊ីហ្គេមលើកក្រោយ ខ្ញុំនឹងចូលរួមប្រកួតវិញ្ញាសាម៉ារ៉ាតុង ហើយយកមេដាយមាសនៅទីនោះ។”
សូមជម្រាបជូនថា អត្តពលិកសិង្ហបុរីចុងក្រោយគេ ដែលបានឈ្នះមេដាយលើវិញ្ញាសាអត្តពលកម្ម ១០,០០០ម៉ែត្របុរស គឺលោក Jagtar Singh ដែលនៅពេលនោះលោកទទួលបានមេដាយសំរិទ្ធក្នុងឆ្នាំ១៩៨៣៕
