មានក្ដីស្រមៃចង់ក្លាយជាអ្នកនិពន្ធ ជំរុញលោក សាន ពិសិទ្ធិ ប្រឹងប្រែងតស៊ូក្នុងវិស័យ​តែងនិពន្ធ រហូត​ដល់ជាប់ជ័យលាភីលេខ១ ផ្នែករឿងខ្លី និងលេខ២ ផ្នែកកំណាព្យ ក្នុងកម្មវិធីប្រកួតប្រជែងអក្សរសិល្ប៍ ប្រធានបទ “អក្សរសិល្ប៍បៃតង” នៃមហោស្រពអក្សរសិល្ប៍ខ្មែរលើកទី៧ ឆ្នាំ២០២៤។

លោក សាន ពិសិទ្ធិ ជានិស្សិតឆ្នាំទី៣ ជំនាញអក្សរសាស្រ្តខ្មែរ នៃសាកលវិទ្យាល័យឯកទេសនៃកម្ពុជា (CUS) សាខាកំពង់ធំ និយាយថា  មូលហេតុដាក់ប្រកួតស្នាដៃរឿងខ្លី និងកំណាព្យ ក្នុងកម្មវិធីប្រកួតប្រជែងអក្សរសិល្ប៍នៃមហោស្រពអក្សរសិល្ប៍ខ្មែរលើកទី៧ ពីព្រោះលោកស្រឡាញ់ផ្នែកអក្សរសាស្រ្ត និងអក្សរសិល្ប៍ខ្មែរ។ លើសពីនេះ លោកចង់បង្ហាញការយល់ឃើញរបស់ខ្លួនតាមរយៈស្នាដៃទៅក្នុងសង្គមមនុស្ស។ ជាពិសេស លោកក៏ចង់ទទួលបានជ័យលាភីពីកម្មវិធី និងចង់ចាប់យកអាជីពជាអ្នកនិពន្ធ ដើម្បីលើកកម្ពស់វិស័យតែងនិពន្ធឱ្យកាន់តែរីកចម្រើន។  

និស្សិតឆ្នាំទី៣ ជំនាញអក្សរសាស្រ្តខ្មែរ រូបនេះ បញ្ជាក់បន្ថែមថា រឿងខ្លីចំណងជើង «អាក្រាត» ដែលជាប់ជ័យលាភីលេខ១ លោកសរសេរឡើងក្នុងគោលបំណងដើម្បីបង្ហាញពីភាពអាក្រាតរបស់ធម្មជាតិ ដោយសារការបំពុលបរិស្ថាន ការបាត់បង់ព្រៃឈើ ការបាត់បង់ជម្រកសត្វព្រៃ ព្រមទាំងការបាត់បង់សណ្ដាប់ធ្នាប់សង្គម ដោយសារមានការជួញដូរគ្រឿងញៀនជាដើម។ លើសពីនេះ ដើម្បីសហការគ្នាស្វែងរកដំណោះស្រាយសម្រាប់អ្នកជំនាន់ក្រោយ។ ចំណែក កំណាព្យ «នំប៉ាវមន្រ្តី» ដែលជាប់ជ័យលាភីលេខ២ គឺលោកចង់បង្ហាញអំពីអំពើពុករលួយរបស់អ្នកមានអំណាច ដែលជួញដូរគ្រឿងញៀន ជួញដូរសត្វ និងជួញដូរមនុស្សខុសច្បាស់។ កំណាព្យនេះ ក៏បង្ហាញថា អ្នកប្រព្រឹត្តអំពើពុករលួយទីបំផុត នឹងទទួលទោសចំពោះមុខច្បាប់។

ម្ចាស់ជ័យលាភីលេខ១ រូបនេះ បន្ថែមថា សម្រាប់រឿងខ្លី លោកបានចំណាយរយៈពេលត្រឹម៨ម៉ោងប៉ុណ្ណោះក្នុងការសរសេររឿងប្រមាណ២ទំព័រ ប៉ុន្តែលោកចំណាយពេលពិនិត្យរហូត ៣ថ្ងៃ ទៅលើទម្រង់ ខ្លឹមសារ អត្ថន័យ អត្ថរស អត្ថរូប និងអក្ខរាវិរុទ្ធ។ ចំណែកកំណាព្យវិញ លោកចំណាយពេលសរសេរ រហូតជិតមួយឆ្នាំ ដោយសារត្រូវគោរពទៅតាមក្បួនច្បាប់នៃការតែងកំណាព្យ។

យុវជនមកពីខេត្តកំពង់ធំ រូបនេះ លើកឡើងថា សម្រាប់ការលំបាកដែលលោកជួបប្រទះក្នុងការដាក់ប្រកួតស្នាដៃ គឺដោយសារលោកទើបប្រឡូកថ្មីក្នុងការសរសេររឿងខ្លី និងកំណាព្យ។ ក្នុងនោះ ការមិនសូវមានពេលវេលាច្រើន ដោយត្រូវរៀនផង និងធ្វើការផង។ យ៉ាងណាមិញ លោកនៅតែជំនះបញ្ហាទាំងនេះ ដោយសុំការណែនាំពីអ្នកនិពន្ធនៅសមាគមអ្នកនិពន្ធខ្មែរ ព្រោះលោកមានឆន្ទៈចង់ក្លាយជាអ្នកនិពន្ធ។

“ខ្ញុំមិនរំពឹងខ្ពស់នោះទេសម្រាប់ជ័យលាភី គឺគ្រាន់តែសង្ឃឹម៥០%ប៉ុណ្ណោះ ពីព្រោះមានបេក្ខជនឆ្នើមជាច្រើនបានដាក់ស្នាដៃប្រកួតក្នុងកម្មវិធីនេះ។ អ្វីដែលធ្វើឱ្យខ្ញុំក្ដុកក្ដួល និងស្រក់ទឹកភ្នែកដោយក្ដីរីករាយ គឺខ្ញុំបានជាប់ពានរង្វាន់ដែលសុក្រិតបំផុត ដោយមានគណៈកម្មការ៣រូប ដាក់ពិន្ទុយ៉ាងតឹងរឹង”។

លោក សាន ពិសិទ្ធិ បន្ថែមថា តាមរយៈការដាក់ស្នាដៃប្រកួតអក្សរសិល្ប៍នៃមហោស្រពអក្សរសិល្ប៍ខ្មែរលើកទី៧ លោកបានរៀនចេះពីកម្មវិធីនេះ រួមមាន ទី១. រៀនអំពីរបៀបសរសេររឿងខ្លី និងកំណាព្យបែបទំនើប ២. ច្បិចយកសារៈសំខាន់ប្រធានបទមកបញ្ចូលជាមួយតថភាពសង្គម ទី៣. រៀនចេះរបៀបរចនាទំព័រ ការពិនិត្យអក្ខរាវិរុទ្ធ។ ការអនុវត្តតាមចំណុចទាំងអស់នេះ បើទោះជាស្នាដៃមិនជាប់ចំណាត់ថ្នាក់ណាមួយក្នុងកម្មវិធី ក៏ទទួលយក និងបានខិតខំប្រឹងប្រែងអស់ពីសមត្ថភាព។  

លោក សាន ពិសិទ្ធិ ក៏បានសំណូមពរដល់មហោស្រពអក្សរសិល្ប៍ខ្មែរឱ្យនៅតែបន្តរៀបចំនៅឆ្នាំក្រោយៗទៀត ដើម្បីជាប្រយោជន៍ឱ្យវិស័យអក្សរសិល្ប៍កាន់តែរីកចម្រើន និងជឿនលឿន។ លើសពីនេះ សំណូមពរមហាជនទូទៅឱ្យនៅតែបន្តគាំទ្រដល់មហោស្រពអក្សរសិល្ប៍ខ្មែរ។ ក្នុងនោះ រាល់ស្នាដៃដែលអ្នកនិពន្ធសរសេរចេញទៅ ត្រូវគិតថា ផ្ដល់ប្រយោជន៍ និងជួយដល់សង្គមយើង។

គួរជម្រាបជូនថា នៅក្នុងការប្រកួតអក្សរសិល្ប៍ នៃមហោស្រពអក្សរសិល្ប៍ខ្មែរលើកទី៧ ឆ្នាំ២០២៤ លោក សាន ពិសិទ្ធិ បានជាប់ជ័យលាភីលេខ១ផ្នែករឿងខ្លី និងជាប់ជ័យលាភីលេខ២ ផ្នែកកំណាព្យ ក្នុងនោះជ័យលាភីលេខ១ ផ្នែកកំណាព្យ មិនមានបេក្ខជនរូបណាទទួលបាននោះទេ៕