ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – កីឡាការិនី កាំង មុយនីន បានបង្កើតប្រវិត្តសាស្រ្តថ្មីជូនជាតិកម្ពុជាដោយដណ្ដើមបានមេដាយមាស ២គ្រឿងក្នុងព្រឹត្តិការណ៍កីឡាស៊ីហ្គេម លើវិញ្ញាសាហែលទឹកពាក់ជើងទា (Bi Fins) ចម្ងាយ ៤០០ម៉ែត្រ និងចម្ងាយ ២០០ម៉ែត្រ ។ ក្រោយពីទទួលជយជម្នះកីឡាការិនី កាំង មុយនីន បានលើកឡើងថា កីឡាសំខាន់សម្រាប់សុខភាព ហើយការសិក្សាក៏ត្រូវផ្សាភ្ជាប់ស្មារតីកីឡា ។
កីឡាការិនី កាំង មុយនីន បាននិយាយថា កញ្ញាមិនបានរំពឹងខ្ពស់លើការប្រកួតយកមេដាយមាសផ្នែកកីឡាហែលទឹកវិញ្ញាសាទាំងពីរខាងលើ តែផ្ទុយទៅវិញក្នុងពេលប្រកួតត្រូវតែបញ្ចេញសក្តានុពលប្រកួតប្រជែងឱ្យអស់ពីសមត្ថភាព ។ ទន្ទឹមគ្នានេះ លទ្ធផលប្រកួតកីឡាគឺមិនអាចស្មានទុកជាមុនបាននោះទេ ដោយសារកីឡាការិនីដៃគូប្រកួតទាំងអស់សុទ្ធសឹងតែមានសមត្ថភាពដូចគ្នា ។
ម្ចាស់មេដាយមាសកីឡាហែលទឹកស៊ីហ្គេម កាំង មុយនីន បានបញ្ជាក់បន្ថែមថា ៖
“ ខ្ញុំយល់ថា កីឡាសំខាន់ ! តែឪពុកម្តាយខ្ញុំតាំងពីដើមមកមិនចង់ឱ្យខ្ញុំហាត់កីឡាព្រោះគាត់ចង់ឱ្យយើងផ្តោតលើការសិក្សាច្រើនជាង ! គាត់យល់ថា ការសិក្សាសំខាន់ហើយកីឡាហែលទឹក ឬកីឡាជម្រើសជាតិមិនអាចឱ្យយើងចិញ្ចឹមពេញមួយជីវិតបាននោះទេ ប៉ុន្តែអ្វីដែលខ្ញុំធ្វើនៅពេលនេះ គឺខ្ញុំបង្ហាញពួកគាត់ថា ខ្ញុំអាចធ្វើបាន រហូតដល់ពួកគាត់សប្បាយចិត្តគាំទ្រ… ហើយកីឡានិងការសិក្សាអាចទៅព្រមគ្នាបាន” ។
កីឡាការិនី កាំង មុយនីន បានឈ្នះមេដាយមាសលើវិញ្ញាសាហែលទឹកជើងទាចម្ងាយ ៤០០ម៉ែត្រ ដោយប្រើថិរវេលា ៣ : ៥៩.០១ នាទី ពោលគឺបាននាំមុខកីឡាការិនីលេខ២ របស់ឥណ្ឌូនេស៊ី Az Zahra Raqiel ដែលប្រើពេល ៤ : ០៥.៩៧ នាទី ។ ចំណែកកីឡាការិនីកម្ពុជា ឃឿន ប៊ុនពេជ្រមរកត បានទទួលបានមេដាយសំរឹទ្ធលើវិញ្ញាសាដូចគ្នា ដោយប្រើថិរវេលា ៤ : ០៩.៦២នាទី និងបាននាំមុខកីឡាការិនីសិង្ហបុរី Dawn Tong Eh Koh ព្រមទាំងកីឡាការិនីផ្សេងៗទៀត ។
សូមជម្រាបថា កីឡាការិនី កាំង មុយនីន បានជួយឱ្យសហព័ន្ធខ្មែរកីឡាហែលទឹកអាចបំបែកកំណត់ត្រាប្រវត្តិសាស្រ្តឈ្នះមេដាយមាសជាលើកដំបូង បន្ទាប់ពីពួកគេបានរង់ចាំអស់រយៈពេល ៥០ឆ្នាំ និងជាប្រវត្តិសាស្រ្តលើកទី១ ដែលកម្ពុជារង់ចាំអស់រយៈពេល ៦៤ឆ្នាំ ធ្វើជាម្ចាស់ផ្ទះរៀបចំការប្រកួតកីឡាប្រជាជាតិអាស៊ីអាគ្នេយ៍ ។ សហព័ន្ធខ្មែរកីឡាហែលទឹកបច្ចុប្បន្នដឹកនាំដោយឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ៕
