ភ្នំពេញ – ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ប្រកាសប្រឡងជ្រើសរើសសិស្ស និស្សិតឱ្យចូលបម្រើការងារក្នុងក្របខណ្ឌ«ក» ចំនួន១១កន្លែងសម្រាប់ឆ្នាំ២០២៣នេះ ដើម្បីបំពេញការងារនៅទីស្តីការក្រសួង និងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍រាជធានី-ខេត្ត។

សម្រាប់ជំនាញដែលត្រូវជ្រើសរើស រួមមាន ១. គីមីវិទ្យា និងទេពកោសល្យគីមីចំណីអាហារ ២. សំណង់ស៊ីវិលរដ្ឋបាលសាធារណៈ ៣. នីតិសាស្ត្រ និងសេដ្ឋកិច្ច ៤. គណនេយ្យ និងគ្រប់គ្រង ៥. ហិរញ្ញវត្ថុ និងធនាគារ និង៦. ភាសាអង់គ្លេស។

លក្ខខណ្ឌនៃការជ្រើសរើសរួមមាន បេក្ខជនទាំងពីរភេទត្រូវមានសញ្ជាតិខ្មែរ និងមានអាយុច្រើនបំផុតត្រឹម ៣៥ឆ្នាំ ករណីមានសញ្ញាបត្របរិញ្ញាបត្រ ឬសមមូល និងមានអាយុច្រើនបំផុតត្រឹម ៤០ឆ្នាំ ករណីមានសញ្ញាបត្របរិញ្ញាបត្រជាន់ខ្ពស់ ឬសមមូល។ ចំពោះបេក្ខជនជានិស្សិតដែលមានសញ្ញាបត្របណ្ឌិតឡើងទៅត្រូវបានលើកលែងលក្ខខណ្ឌអាយុ។ លើសពីនេះ បេក្ខជនទាំងអស់ ត្រូវមានចំណេះដឹងជាបឋមលើជំនាញកុំព្យូទ័រ (Microsoft Word & Excel) ដែលមានវិញ្ញាបនបត្របញ្ជាក់ការសិក្សាត្រឹមត្រូវ។ មិនប្រាសចាកសិទ្ធិខាងផ្លូវរដ្ឋប្បវេណី សិទ្ធិពលរដ្ឋ និងសិទ្ធិខាងនយោបាយ។

បើតាម​ការ​ប្រកាស​របស់ក្រសួង មន្រ្តីដែលនឹងត្រូវជ្រើសរើសទាំង​១១នាក់នោះ ត្រូវ​ទៅបម្រើការងារនៅទីស្តីការក្រសួង ចំនួន ៦កន្លែង, បម្រើការងារនៅតាមមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍រាជធានី ខេត្ត ចំនួន ៥កន្លែង រួមមាន៖ មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍រាជធានីភ្នំពេញ ចំនួន ១កន្លែង, មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកំពត ចំនួន ១កន្លែង, មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តព្រះវិហារ ចំនួន ១កន្លែង, មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តពោធិ៍សាត់ ចំនួន ១កន្លែង និងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តព្រះសីហនុ ចំនួន ១កន្លែង។

ចំពោះ វិញ្ញាសាប្រឡង រួមមាន ទី១. វិញ្ញាសាវប្បធម៌ទូទៅ រយៈពេល ២ម៉ោង ទី២. វិញ្ញាសាភាសាអង់គ្លេសទូទៅ រយៈពេល ១ ម៉ោង និង ៣០នាទី និងទី៣. វិញ្ញាសាជំនាញបច្ចេកទេសទាក់ទងនឹងមុខជំនាញរយៈពេល ២ ម៉ោង។

ចាប់ផ្ដើមទទួលពាក្យចាប់ពីថ្ងៃផ្សាយដំណឹងនេះតទៅចាប់ពីម៉ោង៧:៣០-១១:៣០នាទី និងពេលរសៀលចាប់ពីម៉ោង ១៤:៣០-១៧:០០នាទី ។ ឈប់ទទួលពាក្យនៅថ្ងៃអង្គារ៍ ទី២ ខែមិថុនា ឆ្នាំ២០២៣ ត្រឹមវេលាម៉ោង ១៧: ០០នាទី ជាកាលបរិច្ឆេទចុងក្រោយចាត់ទុកជាការប្រញ៉ាប់។

គួរជម្រាបជូនថា ក្រសួងផ្តល់អាទិភាព និងលើកទឹកចិត្តចំពោះបេក្ខជនជាជនពិការ ដែលមានសមត្ថភាពសមស្របអាចបម្រើការងារបាន។ បេក្ខជនជានារីក្នុងករណីពិន្ទុប្រឡងស្មើគ្នាជាមួយនឹងបេក្ខជនជាបុរស។ បេក្ខជនជាមន្ត្រីជាប់កិច្ចសន្យាដែលបានបម្រើការងារនៅតាមអង្គភាពនីមួយៗក្រោមឱវាទក្រសួង។ បេក្ខជនដែលមានសញ្ញាបត្រភាសាបរទេសយ៉ាងតិចចំនួន២ ភាសា ដូចជា អង់គ្លេសនិងបារាំង ឬ អង់គ្លេសនិងចិន ឬ អង់គ្លេសនិងជប៉ុន អាចប្រើប្រាស់ជាផ្លូវការបាន។ ជាពិសេស បេក្ខជនដែលមានសញ្ញាបត្របណ្ឌិត៕