ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងវេទិកាសាធារណៈ ស្តីពីអាទិភាពវិស័យអប់រំ យុវជន និងកីឡា និងថវិកាអប់រំប្រចាំឆ្នាំ២០២៤ កាលពីថ្ងៃទី២៧ ខែមិថុនា ឆ្នាំ២០២៤កន្លងទៅ ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា សម្រាប់គ្រូបង្រៀននៅក្នុងសតវត្សទី២១នេះ ចាំបាច់ត្រូវបន្តការសិក្សាពេញមួយជីវិត ទើបដើរទាន់ភាពរីកចម្រើនរបស់សិស្សក្នុងសម័យបច្ចេកវិទ្យាឌីជីថល។
ឯកឧត្តមបណ្ឌិតសភាចារ្យបញ្ជាក់បន្ថែមថា លោកគ្រូ អ្នកគ្រូ ដែលជាគ្រូបង្រៀន ប្រសិនបើមិនសិក្សាពេញមួយជីវិតទេ នឹងជួបការលំបាកក្នុងការបង្រៀនសិស្សក្នុងបរិបទបច្ចេកវិទ្យាឌីជីថល។ ឯកឧត្តមបណ្ឌិតសភាចារ្យ បន្តថា ក្នុងបរិវត្តកម្ម៤.០ ប្រសិនបើគ្រូមិនសិក្សាស្រាវជ្រាវជាបន្តបន្ទាប់ នឹងតាមមិនទាន់សិស្ស។ ដូច្នេះ សម្រាប់កម្មវិធីសិក្សា និងវិធីសាស្រ្តបង្រៀនត្រូវកែលម្អជាប្រចាំ។
រដ្ឋលេខាធិការក្រសួងអប់រំ បញ្ជាក់បន្ថែមថា កាលពីដើម គ្រូគឺជាប្រភពចំណេះដឹងរបស់សិស្ស បើសិស្សឆ្ងល់សួរគ្រូ ប៉ុន្តែពេលបច្ចុប្បន្ន គ្រូអាចមិនមែនជាប្រភពចំណេះដឹងរបស់សិស្ស ប្រសិនបើគ្រូមិនស្រាវជ្រាវ។ ឯឧត្តមបណ្ឌិតសភាចារ្យ បន្តថា បច្ចុប្បន្ន មានប្រព័ន្ធព័ត៌មានសម្រាប់ស្រាវជ្រាវច្រើន ប្រសិនបើសិស្សចេះស្រាវជ្រាវ សិស្សនឹងចេះជាងគ្រូ។
បើតាមឯកឧត្តមបណ្ឌិតសភាចារ្យ ណាត ប៊ុនរឿន គ្រូបង្រៀនសតវត្សទី២១ ត្រូវចាប់យកគុណប្រយោជន៍នៃយុទ្ធសាស្ត្រអប់រំឌីជីថលសម្រាប់សាលារៀន មកអភិវឌ្ឍសមត្ថភាពជាប្រចាំ ពោលគឺការសិក្សាពេញមួយជីវិត។ ទន្ទឹមគ្នានេះ គ្រូបង្រៀនសតវត្សទី២១ គឺគ្រូបង្រៀនមានចំណេះដឹង ខ្លឹមសារមេរៀនច្បាស់លាស់ មានគរុកោសល្យបង្រៀនខ្ពស់ និងមានបំណិនឌីជីថល។
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំបានធ្វើកំណែទម្រង់គ្រឹះស្ថានបណ្ដុះបណ្ដាលគ្រូ ដោយក្នុងឆ្នាំ២០១៤ ក្រសួងបានរៀបចំផែនការសកម្មភាពបង្រៀន ដើម្បីមានគោលដៅបង្កើនប្រាក់បៀរវត្សគ្រូបង្រៀន លើកទឹកចិត្តសិស្សពូកែធ្វើគ្រូបង្រៀន កែលម្អជីវភាពគ្រូបង្រៀននិងការរស់នៅរបស់គ្រូបង្រៀន និងលើកកម្ពស់គុណវុឌ្ឍិគ្រូបង្រៀន។
រដ្ឋមន្រ្តីក្រសួងអប់រំ បញ្ជាក់បន្ថែមថា ក្រសួងបានរៀបចំឱ្យមានការបង្កើនគុណវុឌ្ឍិគ្រូបង្រៀន មានគោលដៅដើម្បីពង្រឹងគុណភាពអប់រំ។ ក្នុងនោះ គ្រូមត្តេយ្យ ១២+២, គ្រូបឋម ១២+៤ ឬបរិញ្ញាបត្រ+១, គ្រូអនុវិទ្យាល័យ ១២+៤ ឬបរិញ្ញាបត្រ+១, គ្រូវិទ្យាល័យ បរិញ្ញាបត្រ+២ ឬបរិញ្ញាបត្រជាន់ខ្ពស់។ ក្នុងនោះ ក្រសួងអប់រំក៏បានរៀបចំការកែលម្អកម្មវិធីបណ្ដុះបណ្ដាលគ្រូ និងកម្មវិធីបណ្ដុះបណ្ដាលសមត្ថភាពវិជ្ជាជីវៈគ្រូឧទ្ទេសខាងផ្នែកខ្លឹមសារមេរៀន គរុកោសល្យ វិធីសាស្រ្តបង្រៀន និងការប្រើប្រាស់បច្ចេកវិទ្យាក្នុងការបង្រៀន។
គួរជម្រាបជូនថា ចាប់តាំងពីចុងឆ្នាំ២០១៥ តាមរយៈកិច្ចប្រជុំថ្នាក់តំបន់អាស៊ីប៉ាស៊ីហ្វិកសម្រាប់ការអប់រំ ឆ្នាំ២០៣០ ដែលរៀបចំដោយអង្គការយូណេស្កូ ប្រទេសនីមួយៗបានរៀបចំពិនិត្យឡើងវិញ និងធ្វើមូលដ្ឋាននីយកម្មលើគោលនយោបាយ និងផែនការយុទ្ធសាស្ត្ររបស់ខ្លួន ឆ្ពោះទៅរកការអប់រំមានគុណភាព បរិយាបន្ន សមធម៌ និងការសិក្សាពេញមួយជីវិតសម្រាប់ទាំងអស់គ្នា។ ស្ថិតក្នុងបរិបទនេះ ប្រទេសមួយចំនួនក្នុងតំបន់បាននិងកំពុងរៀបចំគោលនយោបាយ និងយុទ្ធសាស្ត្រឆ្លើយតបទៅនឹងការសិក្សាពេញមួយជីវិតនៅកម្រិតផ្សេងៗគ្នា៕
