ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្រាប់ឆ្នាំ២០២៥នេះ សង្រ្កាន្តតិចណូ នឹងប្រព្រឹត្តទៅនាថ្ងៃទី២៩ និងថ្ងៃទី៣០ ខែមីនា នៅវិទ្យាស្ថានបច្ចេកវិទ្យាកម្ពុជា ដោយមានកម្មវិធីកម្សាន្តសប្បាយ ក៏ដូចជាកម្មវិធីវប្បធម៌ប្រពៃណីខ្មែរជាច្រើនសម្រាប់សិស្ស និស្សិត និងសាធារណជន។
លោក នឿន និត្រា ប្រធានសមាគមនិស្សិតវិទ្យាស្ថានបច្ចេកវិទ្យាកម្ពុជា និយាយថា នៅឆ្នាំនេះ សង្រ្កាន្តតិចណូ ត្រូវបានរៀបចំឡើងលើសពីការកម្សាន្តសប្បាយ ដោយនឹងនាំយុវជនឱ្យស្គាល់ពីប្រពៃណី វប្បធម៌ និងទំនៀមទម្លាប់របស់ជនជាតិខ្មែរ ក្នុងការប្រារព្ធពិធីបុណ្យចូលឆ្នាំថ្មី។
បើតាមលោក និត្រា សង្រ្កាន្តតិចណូ រយៈពេល២ថ្ងៃ មានកម្មវិធីវប្បធម៌ជាច្រើននឹងប្រព្រឹត្តធ្វើ ដូចជា កម្មវិធីក្រុងពលី និងបួងសួង កម្មវិធីលើកទង់ កម្មវិធីស្រង់ព្រះ កម្មវិធីពូនភ្នំខ្សាច់ និងរាប់បាត្រ ហើយជាពិសេសគឺកម្មវិធីដង្ហែក្បួនទេវតាឆ្នាំថ្មី។ ជាមួយគ្នាក្នុងសង្រ្កាន្តតិចណូ ក៏មានបង្កើតជាតំបន់វប្បធម៌ ដោយមានជាការលេងល្បែងប្រជាប្រិយខ្មែរ ដូចជាចោលឈូង បោះអង្គុញ វាយក្អម ទាញព្រ័ត្រជាដើម ហើយក្នុងបរិវេណនោះ ក៏មានរៀបចំជាឆាកតន្រ្តីតូច ក្នុងការសម្តែងរបាំបុរាណ របាំប្រជាប្រិយ និងការប្រគំតន្រ្តីស្គរដៃ រាំលេងតាមចង្វាក់ប្រពៃណី ពីក្រុមនិស្សិតនៃវិទ្យាស្ថានបច្ចេកវិទ្យាកម្ពុជា។
ក្រៅពីកម្មវិធីបែបប្រពៃណី វប្បធម៌ ក៏មានការរៀបចំជាទីតាំងសម្រាប់បាញ់ធ្នូបុរាណ ដែលនាំមកពីខេត្តសៀមរាប ការលេងល្បែងកម្សាន្តសប្បាយៗដូចជា កញ្ញាធ្លាក់ទឹក គប់ប៉ោងប៉ោងជាដើម ហើយក៏មានជាស្តង់លក់ម្ហូបអាហារ និងវត្ថុអនុស្សាវរីយ៍នានាជាច្រើន ខណៈពេលយប់ក៏មានឆាកតន្រ្តីដ៏ធំមួយ ដោយនឹងមានការចូលរួមពីសំណាក់តារាល្បីៗក្នុងស្រុកជាច្រើនរូប ហើយជាចុងក្រោយ ក៏មានជាការប្រគុំតន្រ្តីអេឡិចត្រូនិក ដែលហៅថា EDM ថែមទៀត។
យ៉ាងណាក៏ដោយ បើតាមការបញ្ជាក់របស់លោក នឿន និត្រា កម្មវិធីសំខាន់ជាងគេក្នុងព្រឹត្តិការណ៍សង្រ្កាន្តតិចណូ លើសពីឆាកតន្រ្តី និងកម្មវិធីដង្ហែរក្បួនទេវតា គឺការសម្តែងរបស់និស្សិតវិស្វករ ក្នុងទម្រង់សិល្បៈរបាំបុរាណ ដូចជារបាំព្រះរាជទ្រព្យជាដើម។ ប្រធានសមាគមនិស្សិតរូបនេះលើកឡើងថា ការសម្តែងរបស់និស្សិតវិស្វករនេះ គឺចង់បង្ហាញថា មិនមែននិស្សិតវិស្វករ គិតតែរឿងរៀនវិស្វករមួយមុខនោះទេ ប៉ុន្តែពួកគាត់នៅតែអាចចូលរួមថែរក្សាវប្បធម៌ និងទំនៀមទម្លាប់បាន។
“គាត់អាចចូលរួមបង្ហាញសមត្ថភាពគាត់ លើសអំពីវិស្វករ ដែលគាត់អាចសម្តែងសិល្បៈបាន នេះជារឿងសំខាន់ដែលទាញអារម្មណ៍របស់យុវជន ពិសេសនិស្សិតជំនាញវិស្វករឱ្យយល់ និងចូលរួមថែរក្សាវប្បធម៌ ប្រពៃណីខ្មែរ”
សង្រ្កាន្តតិចណូ បានផ្តើមធ្វើជាលើកដំបូងកាលពីឆ្នាំ២០១៦ ដោយមានការគាំទ្រពីវិទ្យាស្ថានបច្ចេកវិទ្យាកម្ពុជាផ្ទាល់ ក៏ដូចជាក្រសួងវប្បធម៌ និងវិចិត្រសិល្បៈ សហភាពសហព័ន្ធយុវជនកម្ពុជា និងកាកបាតក្រហមកម្ពុជា ក្នុងគោលបំណងចូលរួមអបអរសាទរពិធីបុណ្យចូលឆ្នាំប្រពៃណីខ្មែរ។ ពីមួយឆ្នាំ ទៅមួយឆ្នាំ សង្រ្កាន្តតិចណូ ទទួលបានការគាំទ្រជាបន្តបន្ទាប់ ហើយកាលពីឆ្នាំទៅ ព្រឹត្តិការណ៍មួយនេះ ទទួលបានការគាំទ្រពីនិស្សិត យុវជន ចូលរួមរហូតដល់ទៅជាង ៥ម៉ឺននាក់។
សម្រាប់លោក នឿន និត្រា ក្តីរំពឹងធំពីការរៀបចំសង្រ្កាន្តតិចណូ គឺចង់ឃើញសាធារណជន ពិសេសយុវជន ចូលរួមឱ្យបានច្រើនកុះករទៅលើសកម្មភាពផ្សេងៗក្នុងកម្មវិធីសង្រ្កាន្ត ដោយមិនត្រឹមតែជាឆាកតន្រ្តី និងពិព័រណ៌នោះទេ តែចង់ឱ្យមានការចូលរួមនៅកម្មវិធីផ្សេងៗទៀត ដើម្បីយល់ដឹងពីកម្មវិធីប្រពៃណី កម្មវិធីសាសនា ដែលជនជាតិខ្មែរបានប្រារព្ធធ្វើពីបុរាណកាលមក និងចូលរួមថែរក្សា៕
