ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការប្រើប្រាស់ស្មាតហ្វូន និងបណ្ដាញសង្គម បានផ្សារភ្ជាប់ទៅនឹងការថយចុះនៃលទ្ធផលសិក្សា និងការកើនឡើងបញ្ហាផ្លូវចិត្ត, នេះបើតាមលោក Janathan Haidt អ្នកនិពន្ធសៀវភៅ «The Anxious Generation – ជំនាន់នៃភាពថប់បារម្ភ»។
បើតាមលោក Haidt មនុស្សពេញវ័យ គួរផ្ដាច់ខ្លួនពីបច្ចេកវិទ្យាមួយថ្ងៃ ក្នុងមួយសប្ដាហ៍ ដើម្បីបន្សាបជាតិពុលឌីជីថល ចំណែកកុមារ ត្រូវទៅសាលាដោយមិនមានទូរស័ព្ទ (phone-free schools)។
លោកបានលើកឡើងថា ស្ទើរតែគ្រប់សេចក្ដីពិតទាំងអស់ ដែលយើងមានរៀនពីមនុស្សជំនាន់មុន អំពីរបៀបរស់នៅ ដែលធ្វើឱ្យជីវិតប្រសើរឡើង និងក្លាយជាមនុស្សប្រសើរជាងមុន គឺ មិនត្រូវវិនិច្ឆ័យអ្វីលឿនពេក មិនត្រូវឆាប់ខឹង ហើយឆាប់លើកលែងទោស ប្រសិនបើអ្នកខឹង ឬស្អប់នរណាម្នាក់ ប៉ុន្តែជីវិតនៅលើវេទិកាអនឡាញ ប្រព័ន្ធបណ្ដាញសង្គម និងតាមទូរស័ព្ទ ដែលយើងកំពុងជួបរាល់ថ្ងៃ គឺមានលក្ខណៈផ្ទុយពីអ្វី ដែលយើងបានរៀនពីគតិបណ្ឌិតមនុស្សសម័យបុរាណ។
សៀវភៅ The Anxious Generation របស់លោក បានជំរុញឱ្យសិស្សមិនយកទូរស័ព្ទទៅសាលា ឬទុកទូរស័ព្ទទំនើប នៅក្រៅសាលារៀន ដែលនេះគឺជាគំនិត បាននិងកំពុងអនុវត្តនៅទូទាំងពិភពលោក ចាប់តាំងពីសៀវភៅរបស់លោក បានបោះពុម្ពកាលពីឆ្នាំមុន។ យ៉ាងណាក៏ដោយ បើតាមលោក Haidt បានលើកឡើងថា បច្ចុប្បន្ន មិនត្រឹមតែក្មេងជំទង់ប៉ុណ្ណោះទេ ដែលកំពុងតែជួបបញ្ហា ដោយសារញៀនបច្ចេកវិទ្យា។ មនុស្សពេញវ័យ ក៏កំពុងតែជួបបញ្ហា ដោយសារការញៀននឹងបណ្ដាញសង្គម និងបច្ចេកវិទ្យាដែរ។
លោក Haidt បានណែនាំថា ដើម្បីដោះស្រាយបញ្ហានៃការរីករាលដាលបញ្ហាផ្លូវចិត្ត ដែលបណ្ដាលមកពីប្រើប្រាស់បច្ចេកវិទ្យាឌីជីថលច្រើនលើសកម្រិត។ មនុស្សត្រូវផ្លាស់ប្ដូរទម្លាប់រស់នៅប្រចាំថ្ងៃ ហើយរឿងទី១ គឺត្រូវបិទការជូនដំណឹង និងព័ត៌មានដែលមិនចាំបាច់ បន្ទាប់មកទៀត ផ្ដោតអារម្មណ៍ទៅលើរឿងដែលសំខាន់ក្នុងជីវិតឡើងវិញ។ លោក បន្តថា ដើម្បីសម្រេចបាននូវចំណុចនេះ គឺបង្កើត «ថ្ងៃឈប់សម្រាកឌីជីថល – Digital Sabbath», មួយថ្ងៃក្នុងមួយសប្ដាហ៍ មិននៅជាមួយបច្ចេកវិទ្យា ឬកាត់បន្ថយការប្រើប្រាស់បច្ចេកវិទ្យាឌីជីថល។
អ្នកជំនាញរូបនេះ បានបញ្ជាក់ថា ទម្លាប់នេះ ពិតជាអាចសម្រេចបាន ប្រសិនបើអ្នកមានដៃគូ ដើម្បីអនុវត្តជាមួយ ឬក៏មានមិត្តភក្តិ ២ ឬ៣នាក់ ដែលចង់កែប្រែទម្លាប់ជាមួយគ្នា។ ការព្យាយាមកាត់បន្ថយការចំណាយពេលជាមួយបច្ចេកវិទ្យា ឌីជីថល នឹងធ្វើឱ្យអ្នក មានពេលវេលា កាន់តែច្រើនសន្ទនាជាមួយ អ្នកដទៃ ហើយអាចញ៉ាំអាហារតាមសម្រួល ដោយមិនប្រញាប់ទៅមើល ឬចង់ដឹងដំណឹងអ្វីមួយនោះទេ៕
