ក្នុងពិធីប្រគល់សញ្ញាបត្រជូនដល់និស្សិត នៃសាកលវិទ្យាល័យលីកុងវីង នាព្រឹកថ្ងៃទី១៣ មិថុនា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា ធនធានមនុស្សជាទ្រព្យសំខាន់បំផុតសម្រាប់ប្រទេសជាតិ ។ បើតាមប្រសាសន៍សម្តេចធិបតី ធនធានមនុស្សគឺជាកត្តាកំណត់នូវអ្វីៗទាំងអស់ ហើយចំពោះការដឹកនាំកសាងប្រទេស គឺត្រូវការនូវធនធានមនុស្សដែលរស់រវើក ដូច្នេះ ធនធានមនុស្សជាទ្រព្យសំខាន់បំផុត ធ្វើឱ្យប្រទេសអាចអភិវឌ្ឍរីកចម្រើន ប្រកបដោយនិរន្តរភាព និងចីរភាព។

សម្តេចធិបតីមានប្រសាសន៍ដោយបញ្ជាក់បន្ថែមថា បើយើងចង់ឱ្យប្រទេសអភិវឌ្ឍរីកចម្រើនជានិច្ច គឺទាល់តែមានធនធានមនុស្សដែលរស់រវើក ដូច្នេះទើបបានជាក្រសួងអប់រំ យុវជន និងកីឡា ដាក់ចេញនូវគោលនយោបាយរួមជាមួយវិស័យឯកជនជាច្រើន ដើម្បីបណ្តុះបណ្តាលធនធានមនុស្សយើង។ សម្តេចក៏បានរំលេចដែរថា ធនធានមនុស្ស គឺអាចឱ្យប្រទេសយើងមានលទ្ធភាពប្រកួតប្រជែងជាមួយប្រទេសផ្សេងៗនៅក្នុងបរិបទសាកលភាវូពាណិជ្ជកម្ម ហើយធនធានមនុស្សក៏អាចឱ្យប្រទេសយើងចាប់ឱកាស និងកាត់បន្ថយគម្លាតជាមួយប្រទេសផ្សេងៗបាន ខណៈដែលកូនខ្មែរបច្ចុប្បន្ននេះ បានចេញទៅប្រឡងនៅក្រៅប្រទេសខាងបច្ចេកវិទ្យា ក៏ដូចជាវិទ្យាសាស្រ្ត រហូតទទួលបានជ័យលាភីល្អនៅក្នុងតំបន់ និងពិភពលោកថែមទៀត។

ប្រទេសយើងចេញពីសង្រ្គាម យើងយឺតជាងប្រទេសជិតខាងមួយចំនួន ប៉ុន្តែការបញ្ចប់សង្រ្គាម និងអភិវឌ្ឍធនធានមនុស្ស ប្រែក្លាយពីកម្លាំងដែលប្រមូលផ្តុំទៅសមរភូមិ មកជាកម្លាំងប្រមូលផ្តុំដើម្បីបង្កើនសមត្ថភាព… កូនខ្មែរយើងបច្ចុប្បន្នចេញទៅប្រឡងនៅក្រៅខាងបច្ចេកវិទ្យា នៅអាស៊ានយើងបានលេខ១ ទៅលើពិភពលោកយើងបានលេខ២ ឈ្នះប្រទេសជាច្រើន…

សម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា

ជាមួយគ្នានេះ សម្តេចធិបតីក៏បានលើកឡើងអំពីសារៈសំខាន់នៃការអប់រំ ទៅដល់យុវជនកម្ពុជា ដោយក្នុងនោះរួមមាន ទី១. ការរៀនសូត្របង្កើននូវគុណវុឌ្ឍ, ទី២ ការរៀនសូត្រធ្វើយើងមានសមត្ថភាពក្នុងការប្រកួតប្រជែងជាមួយអ្នកដទៃ ទាំងក្នុង និងក្រៅប្រទេស, ទី៣ ការរៀនសូត្រអាចឱ្យយើងចាប់ឱកាសការងារបានច្រើន និង ទី៤ ការរៀនសូត្រ ធ្វើឱ្យយើងមានឯករាជ្យ និងម្ចាស់ការ។

បើតាមប្រសាសន៍របស់សម្តេចធិបតី ហ៊ុន ម៉ាណែត រាជរដ្ឋាភិបាលកម្ពុជាបានដាក់អាទិភាពយ៉ាងធំសម្បើមទៅលើការបណ្តុះបណ្តាលមូលធនមនុស្ស ដោយផ្តោតទៅលើសុខភាព និងការអប់រំ , ហេតុនេះហើយ នៅរយៈពេលចុងក្រោយនេះ ក្រសួងអប់រំបានធ្វើការកែទម្រង់ទាំងប្រព័ន្ធ និងកម្មវិធីសិក្សា ដោយធ្វើយ៉ាងណាឱ្យទាន់សម័យ ព្រមទាំងផ្តោតទៅលើបច្ចេកវិទ្យា ក៏ដូចជាវិទ្យាសាស្រ្តផ្សេងៗ។

ទន្ទឹមនឹងនេះ រាជរដ្ឋាភិបាល ក៏បានបើកឱកាសឱ្យមានការចូលរួមពីវិស័យឯកជនទាំងក្នុង និងក្រៅប្រទេស ហើយលើកទឹកចិត្តឱ្យមានការចាប់ដៃគ្នារវាងសាកលវិទ្យាល័យ ឬគ្រឹះស្ថានអប់រំផ្សេងៗ ជាមួយបណ្តាប្រទេសផ្សេងៗ ដើម្បីចែករំលែកបទពិសោធន៍ និងផ្ទេរចំណេះដឹង ព្រោះសិស្សរបស់យើងមិនមែនរៀនសម្រាប់តែកម្ពុជាទេ ប៉ុន្តែរៀនសម្រាប់កម្ពុជាត្រៀមប្រកួតប្រជែងជាមួយពិភពលោក៕