នៅពេលអ្នកកំពុងប្រើជីវិតជានិស្សិតនៅសាកលវិទ្យាល័យ គឺទាមទារឱ្យមានការវិនិយោគពេលវេលារបស់អ្នកជាច្រើន ក្រៅតែពីរៀននៅក្នុងថ្នាក់ និងធ្វើកិច្ចការសាលា អ្នកអាចនឹងមានការងារ ឬសកម្មភាពបន្ថែមជាច្រើនទៀត តួយ៉ាងដូចជា ទំនួលខុសត្រូវក្នុងគ្រួសារ ចុះតាមសហគមន៍  និងរកចំណូលផ្គត់ផ្គង់ការសិក្សាជាដើម។ ទាំងនេះហើយ សុទ្ធសឹងតែជាកាតព្វកិច្ចដែលចាំបាច់ត្រូវមានគន្លឹះក្នុងការដោះស្រាយ ។ សាកលវិទ្យាល័យ AZUSA PACIFIC (APU) ចែករំលែកវិធីសាស្រ្តប្រាំបីចំណុច ដែលជួយជំរុញផលិតភាព នៃការសិក្សា ក៏ដូចជាការងារ ឱ្យមានដំណើរការល្អ។

១. បង្កើតកាលវិភាគ ឬប្រតិទិន ៖ ការអភិវឌ្ឍនូវផលិភាពគឺផ្តើមចេញអំពីការស្គាល់នូវអ្វីដែលអ្នកត្រូវការ និងរយៈពេលប៉ុន្មានដែលអ្នកត្រូវសម្រេចវាឱ្យបាន។ អ្នកអាចប្រើប្រតិទិន ដោយ​អាចជាប្រភេទសរសេរដៃ ឬតាមរយៈបណ្តាញបច្ចេកវិទ្យា ដើម្បីបង្កើតផែនការ និងរៀបចំពេលវេលាឱ្យបានត្រឹមត្រូវ។ អ្នកគួរតែ កំណត់យកសកម្មភាពរៀនជាអទិភាព និងការតាំងចិត្តឱ្យបានខ្ពស់ ហើយត្រូវប្រាកដថា ចំណុចដែលបានដៅនៅក្នុងផែនការ ឆ្លើយតបទៅនឹងអ្វីដែលអ្នកចង់បាន និងជាទីកន្លែងដែលអ្នកចង់ទៅ។

២. រាយនាមសកម្មភាពដែលត្រូវធ្វើ ៖ កំណត់ត្រឹមក្នុងមួយអាទិត្យ មួយខែ ឬក៏ធ្វើកាលវិភាគ ដែលសមល្មមនឹងសមត្ថភាពបច្ចុប្បន្ន ដោយការចំណាយពេលពីរ ទៅបីនាទី ដើម្បីសរសេរនូវអ្វីដែលអ្នកត្រូវធ្វើ និងគណនាអំពីរយៈពេលដែលត្រូវសម្រេចឱ្យបានច្បាស់ ។ វាអាចនឹងលំបាកនៅពេលដែលធ្វើវាជាលើកដំបូង ប៉ុន្តែអ្នកអាចនឹងដឹងអំពីពេលវេលាដើម្បីបញ្ចប់ការងារ ឬសំណេរអ្វីមួយ។

៣. ធ្វើផែនការ និងកំណត់អាទិភាព ៖ ជាដំបូងរៀបចំប្រភេទការងារ ដើម្បីឱ្យដឹងថា តើត្រូវសម្រេចវាដោយរបៀបណា? ការកំណត់ពេល និងសកម្មភាពនៅក្នុងប្រតិទិន គឺជាធាតុ ឬសម្រេចប្រភេទការងារនីមួយៗឱ្យមានដំណើរការរលូន។ ហើយពេលធ្វើផែនការ គួរគិតអំពីពេលវេលាដែលផ្តល់នូវផលិតភាព ឬពេលអំណោយទាន។ ប្រសិនបើពេលព្រឹក គឺជាពេលល្អ សម្រាប់អ្នកក្នុងការបង្កើតបាននូវភាពច្នៃប្រឌិត ដូច្នេះត្រូវយកពេលនោះ ទៅធ្វើកិច្ចការសាលា និងប្រភេទការងារណាដែលត្រូវប្រើប្រាស់ការគិតច្រើន ចំណែកឯពេលថ្ងៃ ឬល្ងាចយើងអាចធ្វើសកម្មភាពនានាដែលមិនទាមទារការគិតដូចជា សម្អាតខោអាវ និងការងារផ្ទះជាដើម នេះគ្រាន់តែជាការឧទាហរណ៍មួយប៉ុណ្ណោះ។

៤. កាត់បន្ថយសកម្មភាពរំខាន ៖ នៅពេលដែលអ្នកមានផែនការរួចរាល់ហើយ វាគឺជាពេលវេលាមួយដែលត្រូវចាប់ផ្តើមអនុវត្តន៍។ ពេលដែលអ្នកកំពុងតែរៀន ឬធ្វើការងារសាលា ការផ្តោតសតិគឺជាសកម្មភាពមួយដែលជំរុញដល់ផលិតភាពដើម្បីសម្រេចបាននូវលទ្ធផលទាំងនោះ។ អ្នកអាចនឹងចង់ទៅរៀននៅក្នុងបរិយាកាសបណ្ណាល័យ ឬក៏កន្លែងមួយស្ងាត់ ដែលមិនមានការបង្កនូវភាពរំខាន។ វិធីមួយទៀតដែលអាចកាត់បន្ថយការរំខាននោះ គឺ បិទសម្លេងរំខានពីទូរស័ព្ទតាមរយៈការជូនដំណឹងនានា ឬក៏ទុកទូរស្ទ័ព្ទឱ្យនៅឆ្ងាយ ប្រសិនបើអ្នកកំពុងមានបញ្ហាជាមួយនឹងការផ្តោត អ្នកអាចកំណត់រយៈពេលប្រមាណ២៥នាទី ឬក៏យូរជាងនេះ ដើម្បីផ្តល់ឱកាសឱ្យខ្លួនឯងបានសម្រាក និងស្តារស្ថានការណ៍ឡើងវិញ។

៥. យកចិត្តទុកដាក់ចំពោះខ្លួនឯង ៖ កាលដែលមិនបានផ្តោតលើខ្លួនឯង អ្នកអាចសង្កេតបានតាមរយៈសកម្មភាពដូចជា ពេលដែលអ្នកអានសំណេរអ្វីមួយច្រើនដងហើយ ប៉ុន្តែហាក់ពិបាកយល់នូវខ្លឹមសារទាំងនោះ ឬមិនយល់សោះតែម្តង វាបង្ហាញថា អ្នកមិនសូវបានយកចិត្តទុកដាក់ចំពោះខ្លួនឯងនោះទេ។ ដូច្នេះវាដល់ពេលដែលអ្នកត្រូវសម្រាកខ្លះ បន្ទាប់មកសាកល្បងដើរក្នុងរយៈពេលខ្លី ញាំអាហារសម្រន់ ឬនិយាយជាមួយមិត្ត ពីរទៅបីនាទី ដើម្បីទាញថាមពលត្រឡប់មកវិញ។

៦. រៀបប្រភេទការងារ ៖ ពេលដែលអ្នករៀបចំប្រភេទការងារប្រចាំសប្តាហ៍ អ្នកនឹងអាចដឹងបានថា តម្រូវការរបស់អ្នក និងការងារមួយចំនួនបានសម្រេចរួចហើយ។ តែយ៉ាងណាការត្រៀមទុក ឬរៀបប្រភេទការងារឱ្យមានភាពប្រទាក់ក្រឡាគ្នា គឺជាគន្លឹះក្នុងការសម្រួមពេលវេលាទៅធ្វើការងារដទៃ ឬមានពេលសម្រាកបានច្រើន។ ឧទាហរណ៍ថា ពេលដែលអ្នកទៅផ្សារទិញសម្ភារៈ គឺត្រូវគិតអំពីរបស់ដែលចាំបាច់សម្រាប់ប្រើប្រាស់ ជាជាងទៅដល់ហើយទើបនឹករក រួចក៏ទិញបណ្តើរគិតបណ្តើរ ដែលនាំខាតពេល ឬមួយវិញទៀត ដល់ពេលត្រូវការប្រើទើបទៅទិញភ្លាមៗ ក៏មិនមែនហៅថាជាការរៀបចំបានល្អនោះដែរ។

៧. ធ្វើការងារច្រើនក្នុងពេលតែមួយឱ្យត្រូវស្ថានការណ៍ ៖  មតិមួយចំនួនយល់ថា ការធ្វើការងារច្រើនក្នុងពេលតែមួយអាចពិបាកក្នុងការផ្តោត ប៉ុន្តែប្រសិនបើរៀបសកម្មភាពឱ្យត្រូវ គឺនាំឱ្យចំណេញពេលវេលាទៅវិញទេ ឧទារណ៍ថា ពេលដែលអ្នកនិយាយលេងជាមួយម្តាយនៅផ្ទះ អ្នកអាចឆ្លៀតបត់ខោអាវបណ្តើរ ព្រោះសម្មភាពទាំងពីរនេះមិនតម្រូវឱ្យខួរក្បាលគិតច្រើនដូចគ្នានោះទេ។

៨. ថែទាំខ្លួនឯង ៖ មនុស្សចាប់ផ្តើមមានផលិតភាពនៅពេលដែលពួកគេសម្រាកបានគ្រប់គ្រាន់ និងទទួលទានអាហារបានគ្រប់ជីវជាតិ។ ដូច្នេះអនុញ្ញាតិឱ្យខ្លួនឯងគេងឱ្យបានត្រឹមត្រូវស្របទៅនឹងតម្រូវការរាងកាយ និងជ្រើសរើសអាហារល្អៗមុនពេលបរិភោគដើម្បីបំពេញតម្រូវការរាងកាយក្នុងការជំរុញឱ្យមានថាមពល។ មួយវិញទៀត ឆ្លៀតពេលខ្លះដើម្បីធ្វើលំហាត់ប្រាណ និងការគ្រប់គ្រងភាពតាងតឹង ដូចជា ដកដង្ហើមឱ្យវែងៗ ធ្វើយូហ្គា ឬសមាធិជាដើម។ ការចំណាយពេលថែទាំខ្លួនឯងមើលទៅហាក់ត្រូវការតាំងចិត្តខ្ពស់ និងពេលវេលាច្រើន តែយ៉ាងណាវាក៏ផ្តល់នូវសមិទ្ធផលវិជ្ជមានមកកាន់ខ្លួនឯង ដែលធ្វើឱ្យ​មានភាពនឹងធឹង ហើយអាចទទួលបានការផ្តោតច្រើនជាងមុន៕