ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសចូលរួមពិធីប្រគល់រង្វាន់ និងមេដាយដល់សិស្សពូកែ និងពិធីប្រគល់វិញ្ញាបនបត្របញ្ចប់ការសិក្សាដល់សិស្សថ្នាក់ទី១២ នៃសាលារៀនវ៉េស្ទឡាញន៍ និងសាលារៀនណត្សឡាញន៍ កាលពីចុងសប្តាហ៍កន្លងទៅនេះ ឧកញ៉ា ប៉ិច បូឡែន ប្រធានក្រុមប្រឹក្សាភិបាល និងជាអគ្គនាយក ក្រុមហ៊ុនវេសឡាញ អេឌ្យូខេសិនគ្រុប មានប្រសាសន៍លើកទឹកចិត្តដល់សិស្សថ្នាក់ទី១២ ដែលត្រៀមប្រឡងសញ្ញាបត្រនាពេលខាងមុខថា ការប្រឡងបាក់ឌុប មិនមែនជាការកំណត់អនាគតរបស់យើងទេ តែប្រសិនបើយើងទទួលបាននិទ្ទេសល្អនៅក្នុងការប្រឡងនេះ យើងបានឱកាសល្អប្រសើរជាងអ្នកដទៃ។
លោកឧកញ៉ា ប៉ិច បូឡែន មានប្រសាសន៍ថា ការសិក្សាគឺមិនចេះចប់នោះទេ គ្រប់គ្នានៅ តែបន្តការសិក្សា ដូច្នេះយើងមិនគួរចាត់ទុកការប្រឡងបាក់ឌុប ជាការប្រឡងកំណត់អនាគតរបស់យើងទេ តែមិនមែនមានន័យថា មិនចាំបាច់ប្រឹងប្រឡងនោះឡើយ ។ លោកឧកញ៉ាមានប្រសាសន៍ថា ប្រសិនបើយើងខិតខំរៀនទទួលបាននិទ្ទេសល្អ នោះសិស្សានុសិស្សក៏មានឱកាសប្រសើរជាងអ្នកដទៃ និងមានជម្រើសច្រើន។
…ចៃដន្យក្មួយៗចំនួនតូចណាមួយភ្លាត់ភ្លាំងមិនបានជាប់ ដូច្នេះកុំគិតថា វាជាការបញ្ចប់អនាគតយើង កុំគិតអញ្ចឹងឱ្យសោះ ដោយសារតែយើងនឹងបន្តរៀនមហាវិទ្យាល័យបាន យើងនៅមានជម្រើសក្នុងការអភិវឌ្ឍអាជីពមុខរបរជាច្រើនទៀត គ្រាន់តែថា បើសិនជាយើងជាប់ ជាពិសេសបាននិទ្ទេសល្អ យើងមានជម្រើសច្រើន
លោកឧកញ៉ា ប៉ិច បូឡែន អគ្គនាយកក្រុមហ៊ុនវេសឡាញ អេឌ្យូខេសិន
ជាមួយគ្នានេះដែរ លោកឧកញ៉ា ប៉ិច បូឡែន ក្នុងនាមជាអ្នកអប់រំមួយរូប ក៏បានសំណូមពរដល់មាតាបិតា អ្នកអាណាព្យាបាលសិស្សគាំទ្រដល់ការសិក្សារបស់កូនៗ។ លោកឧកញ៉ាមានប្រសាសន៍ថា លទ្ធផលសិក្សាល្អ មិនមែនមកតែពីសាលា ឬគ្រូបង្រៀនទេ ពោលគឺអាណាព្យាបាលក៏ត្រូវចូលរួម ព្រមជាមួយកូនក្មួយទាំងអស់ត្រូវខំប្រឹងប្រែងសិក្សា។ លោកឧកញ៉ាបញ្ជាក់ថា បរិយាកាសនៃការគាំទ្រ ទាំងមជ្ឈដ្ឋានក្រុមគ្រួសារខ្លួនឯង និងសាលារៀន គឺជារឿងសំខាន់ ដោយសារតែយើងមិនអាចគ្រប់គ្រងបរិយាកាសសង្គមខាងក្រៅដែលទាក់ទាញចំណុចអវិជ្ជមានមួយចំនួនបានទេ។
ក្នុងនោះដែរលោកឧកញ៉ា ប៉ិច បូឡែន ក៏បានផ្តាំផ្ញើដល់សិស្សានុសិស្សដែលត្រៀមក្នុងការប្រឡងបាក់ឌុបនាពេលខាងមុខ ត្រូវថែរក្សាសុខភាព សុវត្ថិភាពខ្លួនឯងដែលវាគឺជារឿងសំខាន់ ។ «ប្រឹងប្រែងរៀនម៉ាសមរម្យ កុំសម្រុកបុករហូតដល់ទន់ខ្លួនប៉ះពាល់ដល់សុខភាព អាហ្នឹងវាដាច់ចំណងវិញ អញ្ចឹងតុល្យភាពបន្តិចដើម្បីជួយមើល ហើយខ្ញុំជឿថា ការផ្តល់កម្លាំងចិត្ត ការលើកទឹកចិត្ត ការជ្រោមជ្រែងផ្លូវចិត្តសំខាន់សំខាន់កូនក្មួយនៅពេលនេះ»។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម្រាប់ឆ្នាំសិក្សា២០២២-២០២៣ គ្រោងនឹងប្រព្រឹត្តទៅនៅថ្ងៃទី៦ និងថ្ងៃទី៧ ខែវិច្ឆិកា ឆ្នាំ២០២៣ខាងមុខ៕
