ព្រឹត្តិការណ៍រត់ឆ្លងឧបសគ្គ Preah Vihear Temple Run លើកទី៣ ​ដើម្បី​ចូលរួម អបអរសាទរ ខួបលើកទី១៧ នៃការដាក់បញ្ចូលប្រាសាទព្រះវិហារ ក្នុងបញ្ជីបេតិកភណ្ឌពិភពលោក បានប្រារព្ធ​ឡើងកាលពីថ្ងៃទី៦ កក្កដា ដោយ​មានអ្នកចូលរួមរហូត​ដល់ទៅ​ជាង១ពាន់នាក់ មានទាំងជនជាតិខ្មែរ និងភ្ញៀវអន្តរជាតិ៨ជាតិសាសន៍, ពួកគេ​បាន​បង្ហាញពី​ការ​ទទួល​បទពិសោធន៍ថ្មី នៃការ​ឡើងភ្នំព្រះវិហារ ដែល​ពោរពេញ​ដោយ​ធម្មជាតិ និង​តំបន់ប្រាសាទនានា ហើយ​​លើកទឹកចិត្ត​ដល់យុវជន ក៏​ដូចជា​ប្រជាពលរដ្ឋ​ខ្មែរ​គ្រប់រូប គួរ​ទៅ​លេង​ប្រាសាទព្រះវិហារ​ឱ្យ​បាន​ម្តងក្នុង​មួយ​ឆ្នាំ។

កញ្ញា គង់ ច័ន្ទលីមី ជាអ្នកចូលរួម ដែល​នាង​គឺជាប្រជាពលរដ្ឋមានលំនៅឋានក្នុងឃុំស្រអែម ស្រុកជាំក្សាន្ត ខេត្តព្រះវិហារផ្ទាល់ បានសម្តែង​ក្តី​រីករាយដែលបាន​ចូលរួមព្រឹត្តិការណ៍នេះ។ ច័ន្ទលីមី និយាយថា នាងបាន​ចូលរួមកម្មវិធី​នេះម្នាក់ឯង ក្នុង​ការ​រត់ឆ្លង​កាត់ឧបស័គ្គនេះ នាងត្រូវ​ឡើងជណ្ដើរជើងជាង២ពាន់កាំ ធ្វើ​ឱ្យ​នាង​ចង់បោះបង់ ប៉ុន្តែនាងលើកទឹកចិត្តខ្លួនឯងថា អ្នកចូលរួមទាំងអស់អាចធ្វើបាន ដូចនេះនាងក៏អាចធ្វើបានដូចគ្នា។ យ៉ាងណាក៏ដោយ កញ្ញា ច័ន្ទលីមី ចង់ឱ្យមានព្រឹត្តិការណ៍បែបនេះបន្ថែមទៀតឱ្យបានច្រើន ដែលជាចំណែកចូលរួមផ្សព្វផ្សាយដល់ប្រជាពលរដ្ឋខ្មែរ និងអន្តរជាតិបានចូលរួម និងដឹងថា កម្ពុជាមានប្រាសាទដ៏អស្ចារ្យនៅលើកំពូលភ្នំផងដែរ។

មិនខុសពីកញ្ញា ច័ន្ទលីមី លោក សេង សំរឹទ្ធ ជាអ្នកចូលរួមរត់ឆ្លងឧបសគ្គចំងាយ៩គីឡូម៉ែត្រ មកពីរាជធានីភ្នំពេញ បានលើកឡើងថា ការ​ចូលរួមនេះ ព្រោះ​លោកចង់មានបទពិសោធន៍ថ្មីសម្រាប់ខ្លួនឯងក្នុងការរត់ឆ្លងឧបសគ្គ និងជាចូលរួមអបអរសាទរខួប ១៧ឆ្នាំ នៃការចុះបញ្ជីប្រាសាទព្រះវិហារក្នុងបញ្ជីសម្បត្តិបេតិកភណ្ឌពិភពលោក។ ជាមួយគ្នា លោក សំរឹទ្ធ បានតាំងចិត្តថា នឹងចូលរួមនាឱកាសក្រោយៗទៀត និងអាចជ្រើសរើសរយៈចម្ងាយលើសពី៩គីឡូ ដើម្បីស្វែងរកបទពិសោធន៍ថ្មីបន្ថែមទៀត។

ឯកឧត្ដម គីម រិទ្ធី អភិបាលខេត្តព្រះវិហារ មានប្រសាសន៍ថា នេះជាលើកទី៣ ដែលក្រុមការងារ RUN with Sai បានរៀបចំឡើង ដើម្បីអបអរសាទរខួប ១៧ឆ្នាំនៃការចុះប្រាសាទព្រះវិហារក្នុងបញ្ជីបេតិកភណ្ឌពិភពលោក ជាមួយអាជ្ញាធរជាតិព្រះវិហារ និងសហការគាំទ្រដោយក្រសួងវប្បធម៌ និងវិចិត្រសិល្ប: រដ្ឋបាលខេត្តព្រះវិហារ សហភាពសហព័ន្ធយុវជនកម្ពុជា។ ក្នុងនាមជាអភិបាលខេត្តព្រះវិហារ ឯកឧត្តមពិតជាមានក្ដីសោមនស្សរីករាយ ដែលមានព្រឹត្តិការណ៍​នេះកើតឡើងម្ដងទៀតក្នុងឆ្នាំ២០២៥នេះ ព្រោះព្រឹត្តិការណ៍ទាំងមូលបានឃើញប្រជាពលរដ្ឋមកពីគ្រប់ទិសទីទូទាំងប្រទេស និងមានជនជាតិបរទេសដែលបានចូលរួម។ ជាមួយគ្នានេះ ឯកឧត្តមសង្កេតឃើញថា ប៉ុន្មានថ្ងៃមុន និងថ្ងៃនៃកម្មវិធីរត់នេះភ្ញៀវទេសចរមានការកើនឡើងច្រើន ដែលអាចជួយឱ្យសេដ្ឋកិច្ចប្រជាពលរដ្ឋនៅក្នុងតំបន់មានការរីកចម្រើន និងជាការផ្សព្វផ្សាយពីតំបន់ទេសចរណ៍ប្រាសាទព្រះវិហារនេះផងដែរ។

ជាមួយ​គ្នានេះ ឯកឧត្ដម គីម រិទ្ធី ក៏​បានលើកទឹកចិត្តឱ្យប្រជាពលខ្មែរទាំងអស់ចូលរួមក្នុងព្រឹត្តិការណ៍កីឡា RUN with Sai ក៏ដូចជាព្រឹត្តិការណ៍នានាដែលរួមចំណែកដល់ការផ្សព្វផ្សាយទេសចរណ៍កម្ពុជា។ “ប្រសិនជាមានអ្នកដែលចំរៀបចំព្រឹត្តិការណ៍នានាក្នុងខេត្តព្រះវិហារ ជាពិសេសនៅតំបន់ទេសចរណ៍នានា អាចធ្វើការទំនាក់ទំនងទៅកាន់អាជ្ញាធរខេត្តព្រះវិហារ ដោយអាជ្ញាធរពិតជាមានក្ដីរីករាយ ដោយសហការណ៍រៀបចំ និងទទួលស្វាគមន៍យ៉ាងកក់ក្ដៅ”៕