ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមការចុះផ្សាយរបស់អង្គការយូណេសេហ្វ បានឱ្យដឹងថា ទឹកដោះម្តាយគឺជាវ៉ាក់សាំងដំបូងសម្រាប់ទារក ដែលផ្តល់នូវការការពារដ៏សំខាន់ទប់ទល់នឹងជំងឺជាច្រើន និងជួយឱ្យទារកអាចបន្តទទួលបានសារជាតិចិញ្ចឹមគ្រប់គ្រាន់ និងមានសុខភាពមាំមួន។
អ្នកស្រី ឌី មូល្លិកា ឆ្មបនៅមជ្ឈមណ្ឌលជាតិគាំពារមាតា និងទារក បានលើកឡើងថា ការបំបៅកូនដោយទឹកដោះម្តាយមានសារៈប្រយោជន៍ច្រើនណាស់ ព្រោះនៅក្នុងទឹកដោះម្តាយមានសារធាតុចិញ្ចឹមគ្រប់ទាំងអស់ ហើយក៏មានប្រព័ន្ធការពាររាងកាយខ្ពស់ដែលជួយឱ្យកូនប្រឆាំងជាមួយជំងឺ មួយទៀតធ្វើឱ្យកូនមានភាពឆ្លាតវៃ ហើយក្នុងទឹកដោះម្តាយជួយឱ្យក្រពះពោះវៀនកូនងាយស្រួលក្នុងការបឺតស្រូប។
ម្យ៉ាងទៀតការបំបៅកូនដោយទឹកដោះម្តាយមិនត្រឹមតែជួយកូននោះទេ តែក៏ជួយទាំងម្តាយថែមទៀត ដោយវាជួយម្តាយក្នុងការកាត់បន្ថយមហារីកស្បូន កាត់បន្ថយមហារីកដោះ ជួយក្នុងការពន្យារកំណើត ជួយឱ្យស្បូនកន្រ្តាក់រួចតូចទៅវិញលឿន ហើយជួយឱ្យម្តាយ និងកូនមានភាពស្និទ្ធស្នាល ។ ហើយមួយទៀត ការបំបៅកូនដោយទឹកដោះម្តាយ ក៏ជួយកាត់បន្ថយការចំណាយ ចំណេញលុយកាក់ក្នុងគ្រួសារ។
“សម្រាប់ការបំបៅកូនដោយទឹកដោះ វាមិនមែនជាឧបស័គ្គសម្រាប់អ្នកធ្វើការជាមន្រ្តីរាជការ ឬអ្នកធ្វើការឯកជននោះទេ ។ …ជាក់ស្តែងរូបខ្ញុំ មកធ្វើការពេលខ្លះខ្ញុំយកកូនមក ពេលដែលខ្ញុំអត់បានយកកូនមក ខ្ញុំអាចច្របាច់ទឹកដោះទុកនៅផ្ទះ ដើម្បីឱ្យអ្នកផ្ទះជួយដាក់បំបៅឱ្យបាន”
អ្នកស្រី ឌី មូល្លិកា ឆ្មបនៅមជ្ឈមណ្ឌលជាតិគាំពារមាតា និងទារក
ជាមួយគ្នានេះ អ្នកស្រី ឌី មូល្លិកា ក៏បានអំពាវនាវដល់អ្នកម្តាយគ្រប់រូប បើស្រឡាញ់កូន សូមព្យាយាមឱ្យកូនបៅដោះពីកើត រហូតដល់៦ខែ ហើយបន្តបំបៅដោះរហូតដល់២ឆ្នាំ ព្រោះការបំបៅកូនដោយទឹកដោះវាមានសារៈប្រយោជន៍សំខាន់ណាស់ សម្រាប់កូន ហើយនឹងម្តាយ៕
