ក្រសួងប្រៃសណីយ៍ និងទូរគមនាគមន៍ រកឃើញក្រុមហ៊ុន/ស្ថាប័នចំនួន៦ ជាប់ពានរង្វាន់ឌីជីថលកម្ពុជាឆ្នាំ២០២៤ ក្រោមប្រធានបទ “គាំទ្រដល់ពលរដ្ឋកម្ពុជាក្នុងការប្រើប្រាស់បច្ចេកវិទ្យាឌីជីថលដើម្បីអនាគតកាន់តែល្អ” កាលពីពេលកន្លងទៅថ្មីៗនេះ។

ក្រុមហ៊ុនជ័យលាភីទាំង៦ ក្នុងចំណោម៦៤ក្រុមហ៊ុនដែលដាក់ពាក្យប្រកួត រួមមាន​ ទី១. ស្ថាប័នឯកជនល្អបំផុតប្រចាំឆ្នាំ (Private Sector of the Year) បានទៅលើ ក្រុមហ៊ុន Wing Inter Logistics Technologies Co., Ltd សម្រាប់ផលិតផល Wingagri, ទី២. បរិយាបន្នឌីជីថលល្អបំផុតប្រចាំឆ្នាំ (Best Digital Inclusion of the Year) បានទៅលើ ក្រុមហ៊ុន Solar Green Energy (Cambodia) Co., Ltd សម្រាប់ផលិតផល Solar Smart Irrigation System, Solar Irrigation Station, ទី៣. មាតិកាឌីជីថលល្អបំផុតប្រចាំឆ្នាំ (Best Digital Content of the Year) បានទៅលើ ក្រុមហ៊ុន 606 Digital សម្រាប់ផលិតផល Sampi TV។

ទី៤.ពានរង្វាន់រដ្ឋមន្ត្រីសម្រាប់ធុរកិច្ចថ្មីឌីជីថលល្អបំផុតប្រចាំឆ្នាំ (Minister Startup of the Year) បានទៅលើ ក្រុមហ៊ុន Jalat Logistics សម្រាប់ផលិតផល Jalat Logistics, ទី៥.ការស្រាវជ្រាវនិងនវានុវត្តន៍ឌីជីថលល្អបំផុតប្រចាំឆ្នាំ (Best Digital Research and Innovation of the Year) បានទៅលើ បណ្ឌិត្យសភា​បច្ចេកវិទ្យា​ឌីជីថលកម្ពុជា (CADT) សម្រាប់ផលិតផល Machine Translation for Khmer Braille និងទី៦. ពានរង្វាន់កិត្តិយសស្រ្តីឆ្នើមបច្ចេកវិទ្យាប្រចាំឆ្នាំ (Women in Tech of the Year) បានទៅលើ លោកស្រី រស់ ពេជ្រហេមី មកពីក្រុមហ៊ុនមេនូឡាយហ្វ៍ ខេមបូឌា។

ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ មានប្រសាសន៍ថា កម្មវិធីពានរង្វាន់ឌីជីថលកម្ពុជា ធ្វើឡើងក្នុងគោលបំណងជំរុញការធ្វើបរិវត្តកម្មឌីជីថលប្រកបដោយបរិយាបន្ន ដោយលើកកម្ពស់ការប្រើប្រាស់បច្ចេកវិទ្យា​និងនវានុវត្តន៍ឌីជីថលនៅកម្ពុជា តាមរយៈការផ្តល់ពានរង្វាន់ដល់ក្រសួងស្ថាប័ន ក្រុមហ៊ុនឯកជន និងសហគ្រិន។

រដ្ឋមន្ត្រីក្រសួងប្រៃសណីយ៍ ក៏បានថ្លែងកោតសរសើរដល់ភាគីពាក់ព័ន្ធទាំងអស់ ដែលបានខិតខំប្រឹងសហការយ៉ាងជិតស្និទ្ធក្នុងការជួយជ្រោមជ្រែងឱ្យសម្រេចបានជោគជ័យក្នុងការរៀបចំកម្មវិធីនេះ ជាពិសេសថ្នាក់ដឹកនាំនិងអង្គភាពក្រោមឱវាទរបស់ ក.ប.ទ. ក្រុមហ៊ុនឧបត្ថម្ភកម្មវិធី ក្រុមការងាររៀបចំកម្មវិធី ព្រមទាំងភាគីពាក់ព័ន្ធជាច្រើនទៀត។

គួរជម្រាបថា សម្រាប់រង្វាន់ជ័យលាភីផ្នែកស្ថាប័នឯកជនល្អបំផុតប្រចាំឆ្នាំ ផ្នែកបរិយាបន្នឌីជីថលល្អបំផុតប្រចាំឆ្នាំ និងផ្នែកមាតិកាឌីជីថលល្អបំផុតប្រចាំឆ្នាំ ទទួលបានប្រាក់រង្វាន់ចំនួន ២៥០០ដុល្លារ។ ចំណែក ពានរង្វាន់រដ្ឋមន្ត្រីសម្រាប់ធុរកិច្ចថ្មីឌីជីថលល្អបំផុតប្រចាំឆ្នាំ ទទួលបានប្រាក់រង្វាន់ ១៥០០០ដុល្លារ និងផ្នែកការស្រាវជ្រាវនិងនវានុវត្តន៍ឌីជីថលល្អបំផុតប្រចាំឆ្នាំ ទទួលបានប្រាក់រង្វាន់ ៧៥០០ដុល្លារ៕