ក្ដីព្រួយបារម្ភបង្កបានទៅជាអារម្មណ៍ស្រ្តេស ហើយជារឿយៗវាក៏នាំឱ្យកើតមាននូវអាការៈមួយចំនួនដូចជា ​ភាព​តានតឹង​រ៉ាំរ៉ៃ និងប្រព័ន្ធភាពស៊ាំចុះខ្សោយ។

យោងតាម គេហទំព័រ Saving Advice បានឱ្យដឹងថា ការព្រួយបារម្ភបណ្តាលមកពីការគិតអ្វីមិនស្ថិតក្នុងដែនកំណត់ដែលខ្លួនអាចគ្រប់គ្រងបាន ដូច្នេះនៅពេលមនុស្សចាប់ផ្តើមសង្កេត និងទទួលយកនូវការគិតទាំងឡាយណាដែលពួកគាត់អាចគ្រប់គ្រងបាន នោះស្មើនឹងការសម្រាលបន្ទុកធ្ងន់ៗ ចេញពីខ្លួនបាន ឬក៏ប្រៀបបាននឹងការទម្លាក់អម្រែកចេញពីស្មាដូច្នោះដែរ។ ការចេះបែងចែករបៀបគិត ជួយឱ្យខ្លួនឯងទទួលបាននូវអារម្មណ៍មួយមានសេរីភាព ការសម្រាកទាំងចិត្តនិងកាយ ខួរក្បាលមានសភាពស្រឡះ រួមទាំងកាត់បន្ថយ​ភាពតានតឹង​រ៉ាំរ៉ៃក្នុងកម្រិត​ធ្ងន់ធ្ងរ​។

តើមានវិធីសាស្រ្តបែបណាដែលជួយឱ្យមានរបៀបគិតមួយដែលសមស្រប ? ហើយតើធ្វើយ៉ាងដូចម្តេចដើម្បីដោះស្រាយការថប់បារម្ភ ឬការភ័យព្រួយ ? ភាពសាមញ្ញដែលឆ្លើយតបនឹងសំណួរនេះ លោកអ្នកចាំបាច់សរសេរចុះនៅលើក្រដាសមួយ អំពីការគិតអ្វីដែលស្ថិតក្នុងដែលកំណត់នៃខ្លួនឯង ហើយអ្វីខ្លះដែលគិតហើយប៉ុន្តែមិនអាចធ្វើអ្វីបាន ឬក៏ថា គិតបានត្រឹមតែគិត ។ ដែលជារួមមានន័យថា ការគិតដែលអាចគ្រប់គ្រងបាន និងការគិតដែលមិនអាចគ្រប់គ្រងបាន។

ជាឧទាហរណ៍រឿងដែលលោកអ្នកអាចគ្រប់គ្រងបានមានដូចជា ការក្រោកពីព្រលឹមដើម្បីពង្រឹងសមត្ថភាពតាមរយៈការអប់រំខ្លួនឯង អានសៀវភៅ សរសេរ និងហាត់ប្រាណជាប្រចាំ។ ហើយចំពោះរឿងរ៉ាវដែលមិនអាចគ្រប់គ្រងបាន គឺការប្រតិកម្មដោយអ្នក​ដទៃមកកាន់ខ្លួនអ្នក ឬរឿងរ៉ាវដែលបានកើតក្នុងអតីតកាលនិងក្នុងអនាគត និងការបញ្ចេញមតិដែលផ្ទុយពីអ្នកក្នុងបណ្តាញសង្គម មិនថា នយោបាយ សេដ្ឋកិច្ច ឬអាជីវកម្ម។

ដើម្បីរំដោះខ្លួនពីការគិតដែលនាំឱ្យកើតក្ដីព្រួយបារម្ភ វាពិតជាចាំបាច់ដែលត្រូវគិតឱ្យបានច្រើនដង អំពីអ្វីដែលលោកអ្នកអាចគ្រប់គ្រងបាន ដែលជាកត្តានាំឱ្យចិត្តស្មុគស្មាញប្រែទៅជាភាពស្រស់បស់ ក៏ដូចជា កាត់បន្ថយភាពតានតឹង និងពង្រឹងសុខភាពឱ្យរឹងមាំបន្ថែម ដោយហេតុថា នៅពេលដែលចិត្តរំសាយកង្វល់ វាគឺជាចលករមួយជំរុញឱ្យលោកអ្នកបង្កើតបាននូវក្ដីសុបិននិងគោលដៅ មានគំនិតដោះស្រាយបញ្ហាដែលទាល់ច្រកកន្លងមក រួមទាំងជំរុញនូវការគិតដែលមានភាពច្នៃប្រតិដ្ឋ៕