គ្រូបច្ចេកទេស​មកពីគ្រឹះស្ថាន TVET ទូទាំង​ប្រទេសសរុប​ចំនួន១៩០នាក់ ត្រូវ​បាន​ក្រសួង​ការងារ និង​បណ្តុះបណ្តាលវិជ្ជាជីវៈ ធ្វើវិក្រឹតការ ឬ Upskilling ទៅលើ “វិធីសាស្រ្ត​បង្រៀន និង​​ការ​ប្រើប្រាស់​ម៉ូឌុល​តាមជំនាញ” រយៈពេល​១០ថ្ងៃ ចាប់ពីថ្ងៃទី២៥ ខែវិច្ឆិកា រហូត​ដល់ថ្ងៃទី៤ ខែធ្នូ ឆ្នាំ២០២៤ ដើម្បីគាំទ្រ​កម្មវិធី​បណ្តុះបណ្តាល​ជំនាញ​បច្ចេកទេស និង​វិជ្ជាជីវៈសម្រាប់​យុវជន​មក​ពី​គ្រួសារ​ក្រីក្រ និង​គ្រួសារ​ងាយរងហានិភ័យ ក៏ដូចជា​ដើម្បី​ធានា​គុណភាព​ប្រព័ន្ធអប់រំ​បណ្តុះបណ្តាល​បច្ចេកទេស និង​វិជ្ជាជីវៈ​នៅកម្ពុជា។

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា តាមរយៈ​វគ្គ​វិក្រឹតការរយៈពេល១០ថ្ងៃនេះ គ្រូឧទ្ទេស និង​សិក្ខា​កាម​ទាំងអស់ ទទួលបាន​នូវ​ជំនាញ​កាន់តែប្រសើរ​ក្នុងការ​រៀបចំផែនការ​បង្រៀន​គ្រប់ម៉ូឌុលស្នូល និង​បង្កើន​ប្រសិទ្ធភាព​ក្នុង​ការ​គ្រប់គ្រងថ្នាក់រៀន និង​រោងជាង​ប្រមុំ ក៏​ដូចជា​ទទួលបានជំនាញ​ប្រាស្រ័យ​ទាក់ទង​តាម​កន្លែង​ការងារ​ជាមួយ​សហគ្រិនប្រកប​ដោយ​ប្រសិទ្ធភាព និង​មូលដ្ឋាន​ច្បាប់ការងារ។

ឯកឧត្តមរដ្ឋមន្រ្តីមានប្រសាសន៍​ដោយសង្កត់ធ្ងន់ថា ការរៀបចំស្តង់ដាកម្មវិធីសិក្សា និងការអភិវឌ្ឍម៉ូឌុលសិក្សាដែលមានមូលដ្ឋានច្បាស់លាស់ក្នុងការពង្រឹងចំណេះដឹង និងជំនាញ, វិន័យ, សីលធម៌, និងឥរិយាបថរបស់សិក្ខាកាម សិស្ស និស្សិត គឺជាកត្តាស្នូលក្នុងបរិបទសកលភាវូបនីយកម្ម គុណភាពនៃ TVET ដើម្បីអភិវឌ្ឍធនធានមនុស្សឆ្ពោះទៅចូលរួមចំណែកអភិវឌ្ឍសង្គម សេដ្ឋកិច្ច។ ក្នុងន័យនេះ គ្រូបច្ចេកទេសគឺជាកម្លាំងចលករដ៏សំខាន់ក្នុងការបណ្តុះបណ្តាលអ្នកជំនាញបច្ចេកទេសប្រកបដោយវិជ្ជាជីវៈ និងប្រកបដោយក្រមសីលធម៌ សម្រាប់បំពេញតម្រូវការទីផ្សារការងារ។ 

លោក ថៃ ឆេង ម៉ៅ ជាគ្រូបង្រៀនមកពីវិទ្យាស្ថានពហុបច្ចេកទេសខេត្តកំពង់ស្ពឺ មានប្រសាសន៍ថា រយៈពេល១០ថ្ងៃនៃវគ្គវិក្រឹតការគ្រូនេះ លោកមានការយល់ដឹងច្រើនលើការប្រើប្រាស់ម៉ូឌុលតាមជំនាញ និងការតាក់តែងមេរៀនបង្រៀន, ផែនការជំនាញ និងវិធីសាស្រ្តថ្មីៗជាច្រើនលើការបណ្តុះបណ្តាលជំនាញបច្ចេកទេស និងវិជ្ជាជីវៈបានយ៉ាងល្អប្រសើរបន្ថែមលើចំណេះដឹងដែលមានស្រាប់។ ក្នុងនាមជាគ្រូបង្រៀនបច្ចេកទេស តាមរយៈវគ្គវិក្រឹតការមួយនេះ លោកនឹងបន្តចែករំលែក និងការអនុវត្តជាក់ស្តែងនូវជំនាញបច្ចេកទេសដែលនឹងជួយផលិតបាននូវសិក្ខាកាម សិស្ស-និស្សិត និងកម្លាំងពលកម្មជំនាញប្រកបដោយគុណភាព ដើម្បីផ្គត់ផ្គង់ទៅតាមតម្រូវការនៃសេដ្ឋកិច្ច សង្គមរបស់ប្រទេសជាតិ។

ដោយឡែកអ្នកគ្រូ សាន គីមជេន គ្រូបង្រៀននៃវិទ្យាស្ថានពហុបច្ចេកទេសខេត្ត​កំពង់ធំ ក៏បានគូសបញ្ជាក់ដែរថា វគ្គវិក្រឹតការគ្រូបច្ចេកទេសនេះ គឺជាស្ពានសម្រាប់គ្រូបណ្តុះបណ្តាលទាំងអស់ឱ្យស្វែងយល់កាន់តែសុីជម្រៅលើការប្រើប្រាស់ម៉ូឌុលតាមជំនាញ ហើយវគ្គវិក្រឹតការគ្រូបច្ចេកទេសធ្វើឱ្យកាន់តែប្រសើរឡើងនៃសមត្ថភាពជំនាញរបស់គ្រូបណ្តុះបណ្តាលបច្ចេកទេសដែលជាអ្នកចូលរួមយ៉ាងសំខាន់ក្នុងបណ្តុះបណ្តាលយុវជននៅកម្ពុជា។

សូមបញ្ជាក់ថា វគ្គវិក្រឹតការគ្រូបច្ចេកទេសស្តីពី «វិធីសាស្រ្តបង្រៀន និងការប្រើប្រាស់ម៉ូឌុលតាមជំនាញ» ធ្វើឡើងដើម្បីពង្រឹងសមត្ថភាពគ្រូបច្ចេកទេស ក្នុងការអនុវត្តកញ្ចប់ស្តង់ដាបណ្តុះបណ្តាលស្របតាមគុណវុឌ្ឍិជាតិកម្ពុជា ដែលជាឧបករណ៍ទ្រទ្រង់មួយដ៏ចាំបាច់ សម្រាប់ធានាគុណភាពនៅក្នុងប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈនៅកម្ពុជា ដែលមិនត្រឹមតែរួមចំណែកពង្រឹងសមត្ថភាព និងគុណភាពជាចម្បងប៉ុណ្ណោះទេ ប៉ុន្តែ​ក៏នឹងរួមចំណែកលើកកម្ពស់ និងគុណតម្លៃនៃការបណ្តុះបណ្តាលជំនាញវិជ្ជាជីវៈ សំដៅទាក់ទាញយុវជនឱ្យចាប់អារម្មណ៍ និងជ្រើសរើសរៀនវគ្គបណ្តុះបណ្តាលជំនាញបច្ចេកទេសស្របតាមស្តង់ដាជាតិ និងតំបន់៕