ថ្លែងក្នុងវេទិកាសារព័ត៌មានប្រចាំឆ្នាំស្តីពីសមភាពយេនឌ័រ ក្រោមប្រធានបទ «តួនាទីរបស់សារព័ត៌មានក្នុងការលើកកម្ពស់សមភាពយេនឌ័រ និងទប់ស្កាត់អំពើហិង្សាលើស្ត្រី» នាព្រឹកថ្ងៃទី៥ ខែធ្នូ ឆ្នាំ២០២៤ នៅសណ្ឋាគារ Raffles Le Royal លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី មានប្រសាសន៍ថា បច្ចុប្បន្ន​នេះ​សមភាព​យេនឌ័រ​នៅ​ក្នុងសង្គម​កម្ពុជា​មានការ​កើនឡើង ក្នុងនោះ​គម្លាតយេនឌ័របានឆ្លាក់ចុះ ពី០.៦៧ ក្នុងឆ្នាំ១៩៩០ មកត្រឹម ០.៤៦ នៅឆ្នាំ២០២៣។

លោកជំទាវកិត្តិបណ្ឌិត អ៊ឹង កន្ថាផាវី បន្ថែមថា តាមរបាយការណ៍អភិវឌ្ឍន៍ធនធានមនុស្សក្នុងតំបន់ ឆ្នាំ២០២៤ របស់កម្មវិធីអភិវឌ្ឍន៍សហប្រជាជាតិ (UNDP) បានបញ្ជាក់ថា កម្ពុជាមានវឌ្ឍនភាពគួរឱ្យកត់សម្គាល់ ក្នុងការលើកកម្ពស់សមភាពយេនឌ័រដោយផ្អែកលើភាគរយស្ត្រីនៅក្នុងរដ្ឋសភា ក្នុងវិស័យការអប់រំ កម្លាំងពលកម្ម ក៏ដូចវិស័យសុខាភិបាល ពាក់ព័ន្ធនឹងអត្រាមរណភាពមាតា ដោយគម្លាតយេនឌ័រ បានឆ្លាក់ចុះ ពី ០.៦៧ ក្នុងឆ្នាំ១៩៩០ មកត្រឹម ០.៤៦ នៅឆ្នាំ២០២៣។ ការណ៍នេះ ធ្វើឱ្យកម្ពុជា ស្ថិតក្នុងចំណាត់ថ្នាក់១១៦ ក្នុងចំណោម១៧០ប្រទេសសម្រាប់សន្ទស្សន៍វិសមភាពយេនឌ័រ ឆ្នាំ២០២៣។

ជាមួយគ្នានេះ បើតាមលោកជំទាវកិត្តិបណ្ឌិត អ្នកសារព័ត៌មាន អ្នកធ្វើការក្នុងប្រព័ន្ធផ្សព្វផ្សាយ មានតួនាទីសំខាន់ក្នុងការលើកកម្ពស់សមភាពយេនឌ័រ បង្កើនភាពអង់អាចដល់ស្រ្តី និងក្មេងស្រី នៅក្នុងវិស័យសេដ្ឋកិច្ច អប់រំ សុខាភិបាល ដើម្បីផ្ដល់ប្រយោជន៍ជូនសង្គមជាតិ។

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានមានប្រសាសន៍ថា បច្ចុប្បន្នស្ថានភាពយេនឌ័រនៅកម្ពុជា មានភាពប្រសើរជាងមុនទាំងនៅក្នុងវិស័យអប់រំ និងទាំងនៅក្នុងវិស័យការងារ។ ឯកឧត្តមបន្តថា ការផ្លាស់ប្ដូរផ្នត់គំនិតពីស្រ្តីបង្វិលចង្រ្កានមិនជុំ ទៅជាស្រ្តីដែលជាឆ្អឹងខ្នងនៃសេដ្ឋកិច្ចជាតិ បានឆ្លុះបញ្ចាំងពីការលើកកម្ពស់យេនឌ័រ និងការផ្ដល់ឱកាសឱ្យស្រ្តីចូលរួមក្នុងសកម្មភាពសង្គម និងសេដ្ឋកិច្ចឱ្យបានច្រើនដូចបុរសដែរ។

ក្រសួងព័ត៌មានបានចូលរួមយ៉ាងសកម្មក្នុងការលុបបំបាត់វិសមភាពយេនឌ័រ និងអំពើហិង្សាលើស្រ្តី និងក្មេងស្រី តាមរយៈការជំរុញ ការបង្កើនការផ្សព្វផ្សាយព័ត៌មាន និងមាតិកាពាក់ព័ន្ធស្រ្តី និងក្មេងស្រី ជាពិសេស បាននិងកំពុងនាំយកទស្សនៈ និងសំឡេង របស់ស្រ្តីនិងក្មេងស្រីទៅកាន់សង្គមជាតិ និងពិភពលោក ដើម្បីផ្ដល់ជាធាតុចូលទៅដល់អ្នកតាក់តែងគោលនយោបាយ និងដៃគូពាក់ព័ន្ធដែលធ្វើការងារលើកកម្ពស់សមភាពយេនឌ័រ រៀបចំគោលនយោបាយ ផែនការយុទ្ធសាស្រ្តចំគោលដៅ ដែលស្រ្តី និងក្មេងស្រីចង់បាន។

គួរ​ជំរាបជូនដែរថា រាជរដ្ឋាភិបាល​នីតិកាលទី៧ នៃរដ្ឋសភា បាន​បន្ត​កំណត់​ការ​លើក​កម្ពស់​សមភាពយេនឌ័រ និង​ការ​បង្កើន​ភាព​អង់អាច​របស់ស្រ្តី និងក្មេង​ស្រី​នៅ​គ្រប់វិស័យ ជាអាទិភាព​ក្នុង​របៀប​វារៈ​គោល​នយោបាយ និង​យុទ្ធសាស្រ្ត​បញ្ចកោណ ដំណាក់កាលទី១ តាមរយៈ​ការ​ពង្រឹង​ភាព​ជាពលរដ្ឋ ក្នុង​សង្គម​ដែលមាន​អារ្យ​ធម៌​ខ្ពស់ ប្រកប​ដោយ​សីលធម៌ សមធម៌ និង​បរិយាបន្ន​ ដែល​ក្នុងនោះ “ស្រ្តី គឺជា​ស្នូល”។ ដោយ​ផ្អែក​លើ​គោល​នយោបាយ​នេះ ក្រសួងកិច្ចការ​នារី ក៏ បានដាក់ចេញនូវផែនការយុទ្ធសាស្រ្ត “នារីរតនៈទី៦” ឆ្នាំ២០២៤-២០២៨ ដោយផ្តោតលើការបញ្ជ្រាបយេនឌ័រ តាមរយៈការធ្វើបរិវត្តកម្មយេនឌ័រ និងកម្មវិធីអាទិភាព ចំនួន៦ រួមមាន ១. ការបង្កើនភាពអង់អាចផ្នែកសេដ្ឋកិច្ចរបស់ស្រ្តី ២. ការលើកកម្ពស់សីលធម៌សង្គម តម្លៃស្រ្តី និងគ្រួសារ ៣. ការលើកកម្ពស់សុខុមាលភាពរបស់ស្រ្តីនិងក្មេងស្រី ៤. កិច្ចការពារផ្លូវច្បាប់សម្រាប់ស្រ្តីនិងក្មេងស្រី ៥. ស្រ្តី ក្នុងភាពជាអ្នកដឹកនាំ និងអភិបាលកិច្ច និង៦. ស្រ្តី និងការប្រែប្រួលអាកាសធាតុ៕