ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ដោយសង្កេតឃើញថា ជារៀងរាល់ឆ្នាំ បងប្អូនប្រជាពលរដ្ឋមួយចំនួនមានការទិញទំនិញ និងមានការចរាចរនូវបសុបក្សីជាច្រើន ដែលអាចមានហានិភ័យ នៃការចម្លងវីរុសផ្តាសាយបក្សី, ហើយទន្ទឹមនេះ ក៏អាចមានការជួបជុំពិសារអាហារជុំគ្នាច្រើន ឬក្នុងទ្រង់ទ្រាយធំ និងម្យ៉ាងទៀត មានការពុលចំណីអាហារ ឬពុលស្រា ស ដែលតែងតែសង្កេតឃើញកើតមាននៅតាមតំបន់ ឬទីតាំងមួយចំនួនក្នុងប្រទេសផងនោះ ក្រសួងសុខាភិបាល បានធ្វើការអំពាវនាវដល់ប្រជាពលរដ្ឋទាំងអស់ ចាំបាច់ត្រូវបង្កើននូវការប្រុងប្រយ័ត្នខ្ពស់ ដោយបុគ្គលម្នាក់ៗត្រូវខិតខំថែរក្សាសុខភាពឱ្យបានល្អប្រសើរ និងចៀសវាងការពុលចំណីអាហារនៅគ្រប់កាលៈទេសៈ។
ក្នុងនោះដែរ ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល បានក្រើនរំលឹកដល់បងប្អូនប្រជាពលរដ្ឋគ្រប់រូប ត្រូវបន្តប្រុងប្រយ័ត្នផ្ទាល់ខ្លួនប្រកបដោយស្មារតីទទួលខុសត្រូវខ្ពស់ ក្នុងការការពារសុខភាពពីការចម្លងវីរុសកូវីដ-១៩ ការពារជំងឺផ្តាសាយបក្សី និងជំងឺផ្សេងៗ រួមទាំងបង្ការសុខភាពបណ្តាលមកពីការពុលចំណីអាហារ ឬពុលស្រាស នៅក្នុងការរស់នៅជាប្រចាំថ្ងៃរបស់ខ្លួន ក៏ដូចជានារដូវបុណ្យទាន ជាពិសេសនាឱកាសចូលឆ្នាំថ្មីប្រពៃណីជាតិខ្មែរ ដោយអនុវត្តវិធានការសំខាន់ៗមួយចំនួនដូចជា ៖
– អនុវត្តឱ្យបានខ្ជាប់ខ្ជួននូវវិធានការការពារខ្លួនពីការចម្លងវីរុសកូវីដ១៩ ដោយយថាហេតុ ដោយជ្រើសរើសយកវិធានការ «៣ការពារ និង៣កុំ» មកអនុវត្តទៅតាមស្ថានភាពជាក់ស្តែង ប្រសិនមានការសង្ស័យត្រូវប្រញាប់ធ្វើតេស្តរហ័សដោយខ្លួនឯង និងត្រូវនៅដាច់ដោយឡែក រក្សាសុខភាព និងព្យាបាល ប្រសិនបើមានវិជ្ជមានវីរុសកូវីដ-១៩។
– ត្រូវខ្ទប់មាត់ និងច្រមុះពេលក្អក កណ្តាស់ ដោយប្រើម៉ាស់ ក្រម៉ា កន្សែង ឬក្រដាសអនាម័យ រួចខ្ចប់បោះចោលក្នុងធុងសំរាមបិទជិត និងត្រូវត្រឡប់មកគេហដ្ឋានវិញភ្លាម បើមានរោគសញ្ញាដូចជា គ្រុនក្តៅ ក្អក ឈឺក្បាល ហូរសំបោរ ឈឺបំពង់ក ឬពិបាកដកដង្ហើម ជាដើម ហើយទៅស្វែងរកការពិនិត្យពិគ្រោះជំងឺនៅមណ្ឌលសុខភាព ឬមន្ទីរពេទ្យរដ្ឋ។
– ត្រូវលាងដៃឱ្យបានញឹកញាប់ជាមួយសាប៊ូ និងទឹកស្អាត បន្ទាប់ពីការប៉ះពាល់សត្វ ឬបោចសំអាតសត្វបសុបក្សី ឬវត្ថុផ្សេងៗដែលអាចជាប្រភពចម្លងមេរោគ ព្រមទាំងប្រកាន់ខ្ជាប់នូវការអនុវត្តអនាម័យស្អាត និងចំណីអាហារដែលមានសុវត្ថិភាពល្អ។
– ជៀសវាងប្រជ្រៀតគ្នានៅពេលទិញម្ហូបអាហារ ទិញសាច់ ឬបសុបក្សីរស់ ឬសម្ភារៈនានា ជាពិសេសត្រូវចេះត្រៀមលក្ខណៈទុកជាមុនពីចម្ងាយ ជៀសវាងការកកស្ទះ ឬការកកកុញមនុស្សច្រើននៅតាមទីផ្សារ ឬហាង នៅក្នុងថ្ងៃតែមួយជាដើម។
– ត្រូវចម្អិនម្ហូបអាហារឱ្យបានឆ្អិនល្អ ជាពិសេសសាច់ ឬសត្វស្លាប ស៊ុត និងអាហារសមុទ្រ ជាដើម។ នៅពេលលោកអ្នកទិញម្ហូបអាហារដែលឆ្អិនស្រាប់នៅតាមទីផ្សារ ឬតាមដងផ្លូវ ត្រូវប្រាកដថា អាហារទាំងនោះ មានអនាម័យល្អ និងមានសុវត្ថិភាពសម្រាប់ការបរិភោគ។
– អ្នកដែលមានហានិភ័យខ្ពស់ នៃការចម្លងជំងឺ ដូចជាជនចាស់ជរា ជនដែលមានជំងឺប្រចាំកាយ ស្រ្តីមានផ្ទៃពោះ ជាដើម បើមិនមានការចាំបាច់បំផុតទេនោះ មិនគួរធ្វើដំណើរ ឬចូលរួមការជួបជុំធំៗ តែបើចៀសមិនបាន ចាំបាច់ត្រូវតែមានការអនុវត្តន៍កិច្ចការពារខ្លួនឱ្យបានល្អ និងរក្សាគម្លាតពីគ្នា ព្រមទាំងមានអ្នកជួយមើលការខុសត្រូវឱ្យបានត្រឹមត្រូវ ។
– ដាច់ខាតមិនត្រូវទិញ ឬផលិត ឬបរិភោគស្រា ស ដែលមិនមានប្រភពផលិតច្បាស់លាស់ ហើយមិនគោរពតាមបទដ្ឋានបច្ចេកទេសត្រឹមត្រូវ ឬយកមេតាណុលមកលាយធ្វើជាស្រា ស ដែលបង្កឱ្យមានការពុលរហូតដល់ស្លាប់បាត់បង់ជីវិត ។ សូមចៀសវាងការយកស្រា ស ឬស្រាផ្សេងៗ ទៅលាយជាមួយស្រាផ្សេងទៀត ឬជាមួយភេសជ្ជៈណាមួយទៀត ដែលយើងមិនបានដឹងពីប្រតិកម្មរបស់វា ដែលបង្កឱ្យពុល និងអាចមានគ្រោះថ្នាក់ដល់អាយុជីវិតផងដែរ។
– ចៀសវាងការប្រើគ្រឿងស្រវឹងនៅពេលបើកបរ និងចូលរួមរក្សាសុវត្ថិភាពចរាចរ ចៀសវាងគ្រោះថ្នាក់ចរាចរ ដោយកុំបើកបរលឿនពេក ពាក់ខ្សែក្រវ៉ាត់ ឬពាក់មួកសុវត្ថិភាព និងគោរពច្បាប់ចរាចរ។
– ចៀសវាងការប្រើប្រាស់គ្រឿងញៀនបំផ្លាញសុខភាព និងអនាគតរបស់ខ្លួន។
ជាមួយគ្នានេះ ក្រសួងសុខាភិបាល ក៏បានលើកទឹកចិត្តឱ្យសាធារណជនទូទៅ អនុវត្តតាមដំបូន្មានសាមញ្ញខាងលើ ដើម្បីការពារសុខភាពលោកអ្នក និងក្រុមគ្រួសារ និងសូមជូនពរបងប្អូនប្រជាពលរដ្ឋទាំងអស់ ជួបនូវសុខភាពល្អ ជៀសផុតនូវជំងឺកូវីដ១៩ និងជំងឺដង្កាត់ផ្សេងៗ ព្រមទាំងសប្បាយរីករាយនាឱកាសសែនដូនតា និងពិធីចូលឆ្នាំថ្មីប្រពៃណីជាតិខ្មែរខាងមុខ៕
