ចូលដល់វ័យក្រោយមធ្យមសិក្សា ឬក្រោយឧត្តមសិក្សា យុវជនភាគច្រើនតែងស្វែងរកឱកាសការងារល្អមួយ ដើម្បីទទួលបានបទពិសោធន៍ ការអភិវឌ្ឍសមត្ថភាព និងប្រាក់ចំណូលផងដែរ។ ទន្ទឹមគ្នានេះ យុវជននៅក្នុងវ័យក្មេងបែបនេះ ត្រូវតែខិតខំធ្វើការដើម្បីបង្កើនសមត្ថភាពឱ្យខ្លាំង យកចិត្តទុកដាក់ និងរៀនចេះពីការងារឱ្យច្រើន។ នេះបើតាមការលើកឡើងរបស់ លោក គីម ដារ៉ា ស្ថាបនិកសាលាបង្វឹក Start Up Community ។

លោក គីម ដារ៉ា បញ្ជាក់បន្ថែមថា ការធ្វើការដើម្បីពង្រឹងសមត្ថភាព មានន័យថា បង្កើនសមត្ថភាពការងារឱ្យខ្លាំង ព្រោះកាលណាយុវជនផ្ដោតលើសមត្ថភាព ខិតខំធ្វើការ រៀនចេះពីការងារច្រើន នឹងនាំឱ្យសមត្ថភាពកើន ការងារកាន់តែសម្បូរ នោះឱកាសទទួលបានបាក់កម្រៃក៏ច្រើនជាងមុនដែរ ។ លោក គីម ដារ៉ា បន្តថា ប្រសិនបើយុវជនធ្វើការដើម្បីតែប្រាក់កម្រៃតែមួយមុខ ហើយចាប់ផ្ដើមគិតថា ធ្វើការដើម្បីឱ្យសមនឹងតម្លៃប្រាក់ខែ នោះនឹងធ្វើឱ្យសមត្ថភាពនៅមានកម្រិត មិនរីកចម្រើន និងមិនលេចធ្លោរ។

ស្ថាបនិកសាលាបង្វឹក Start Up Community  បន្ថែមថា ប្រសិនយុវជនខិតខំធ្វើការឱ្យល្អ ផ្ដោតលើការអភិវឌ្ឍសមត្ថភាព មិនផ្ដោតលើប្រាក់ចំណូល នៅស្ថាប័នល្អ អ្នកដឹកនាំល្អ គេមើលឃើញ នឹងតម្លើងតំណែង ឬតម្លើងប្រាក់ខែឱ្យច្រើនជាងមុនដោយស្វ័យប្រវត្តិ។ ផ្ទុយទៅវិញ បើទោះជាមិនតម្លើងតំណែង ឬតម្លើងប្រាក់ខែ ក៏មិនជាអ្វី ព្រោះយើងនៅតែមានសមត្ថភាពធ្វើការងារល្អនៅស្ថាប័នដទៃទៀត និងទទួលបានប្រាក់ខែខ្ពស់ជាងមុន។ លើសពីនេះ កាលណានឿយណាយជាមួយអាជីពជាអ្នកធ្វើការ ហើយចង់ផ្លាស់ប្ដូរអាជីពទៅជាសហគ្រិន ក៏នៅតែមានឱកាសរីកចម្រើនខ្ពស់ ព្រោះយើងមានសមត្ថភាពខ្លាំង ចេះច្រើន និងឱកាសច្រើន។

«យើងអាចផ្លាស់ប្ដូរស្ថាប័នបាន ប៉ុន្តែសមត្ថភាពប្រសិនបើយើងមិនបណ្ដុះទេ គឺមិនអាចកើនបានឡើយ។»

លោក គីម ដារ៉ា ស្ថាបនិកសាលាបង្វឹក Start Up Community

លោក គីម ដារ៉ា លើកឡើងទៀតថា យុវជនត្រូវពង្រឹងសមត្ថភាព កាលណាសមត្ថភាពកើន អ្វីៗនឹងប្រសើរឡើង ។ ទន្ទឹមគ្នានេះ ធ្វើការអ្វីក៏ដោយត្រូវផ្ដោតលើការរីកចម្រើនរបស់ខ្លួនឯងជាមុន ហើយប្រាក់ចំណូលនឹងមកតាមក្រោយ ។ លើសពីនេះ ប្រសិនជាចំណូលបច្ចុប្បន្នមិនទាន់ល្អ ត្រូវប្រឹងទៅដល់សមត្ថភាពមួយដែលខ្លាំង ដើម្បីទទួលបានតួនាទី និងចំណូលដែលសក្ដិសមនឹងសមត្ថភាពខ្លួន។

ស្ថាបនិកសាលាបង្វឹក Start Up Community បន្ថែមទៀតថា យុវជនធ្វើការប្រាក់ខែក៏យក ប៉ុន្តែអ្វីដែលសំខាន់បំផុត គឺសមត្ថភាពធ្វើឱ្យខ្លួនឯងត្រូវតែរីកចម្រើន។ ស្របគ្នានេះ នៅក្មេងត្រូវជ្រើសរើសកន្លែងការងារ ឬស្ថាប័នណាដែលផ្ដល់ការរីកចម្រើនមុនគេ បើកន្លែងណាមិនផ្ដល់ការរីកចម្រើន មិនផ្ដល់ការអភិវឌ្ឍ ទោះជាទទួលបានប្រាក់ខែច្រើន ប៉ុន្តែគ្មានឱកាសអភិវឌ្ឍសមត្ថភាពខ្លាំងទៅថ្ងៃអនាគត។

លោក គីម ដារ៉ា លើកទឹកចិត្តដល់យុវជនដែលចង់ឱ្យខ្លួនឯងប្រសើរឡើង ចាប់ពីថ្ងៃនេះទៅ ត្រូវតែផ្ដោតលើការអភិវឌ្ឍសមត្ថភាព ព្រោះកាលណាយើងមានសមត្ថភាព យើងក៏មានជម្រើសច្រើន ទោះនៅក្នុងស្ថាប័នដដែលឱកាសឡើងប្រាក់ខែ ឱកាសឡើងតួនាទីមានជានិច្ច។ ម៉្យាងវិញទៀត បើផ្លាស់ប្ដូរស្ថាប័នថ្មីក៏បានប្រាក់ចំណូលខ្ពស់  ឬចង់បើកអាជីវកម្មក៏នៅតែមានសមត្ថភាពធ្វើបានជោគជ័យដែរ៕