ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – មន្ទីរអប់រំនៃតំបន់ស្វយ័តជនជាតិជាំងក្វាងស៊ី នៃសាធារណរដ្ឋប្រជាមានិតចិន ប្រកាសផ្ដល់អាហារូបករណ៍ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ចំនួន៨កន្លែង សម្រាប់សិស្ស-និស្សិត មន្ត្រីរាជការកម្ពុជា ដើម្បីបន្តការសិក្សានៅសាកលវិទ្យាល័យនានាក្នុងខេត្តក្វាងស៊ី ។
សាកលវិទ្យាល័យដែលអាហារូបរកណ៍ផ្ដល់ឱ្យសិក្សាមាន Guangxi University, Guangxi Normal University, Guangxi University for Nationalities, Guilin University of Technology, Nanning Normal University, Youjiang Medical University for Nationalities, Guilin Medical University និង Yulin Normal University ។
អាហារូបករណ៍នឹងធ្វើការជ្រើសរើសបេក្ខជនតាមរយៈការប្រឡងប្រជែង ដោយការប្រឡងជ្រើសរើសបេក្ខភាពអាហារូបករណ៍នឹងបែងចែកជា២ ដោយវិញ្ញាសាប្រឡងបរិញ្ញាបត្រជាន់ខ្ពស់ មានវប្បធម៌ទូទៅ (៩០នាទី) និងភាសាអង់គ្លេស(៩០នាទី) ។ វិញ្ញាសាប្រឡងថ្នាក់បរិញ្ញាបត្រមាន គណិតវិទ្យា (៩០នាទី) និងភាសាអង់គ្លេស (៩០នាទី) ។
ជាមួយគ្នានេះបេក្ខជនគួរភ្ជាប់ជាមួយឯកសារចាំបាច់ត្រូវបំពេញជាមួយរួមមាន បង្កាន់ដៃទទួលពាក្យប្រឡង១ច្បាប់ ពាក្យសុំអាហារូបករណ៍១ច្បាប់ ជីវប្រវត្តិសង្ខេប១ច្បាប់ រូបថត៤គុណ៦ ចំនួន៤សន្លឹក(ផ្ទៃខាងក្រោយពណ៌ស ថតថ្មី) និងសញ្ញាបត្រមធ្យមសិក្សាទុតិយភូមិថតចម្លង១ច្បាប់ សម្រាប់ថ្នាក់បរិញ្ញាបត្រ និងសញ្ញាបត្រថ្នាក់បរិញ្ញាបត្រថតចម្លង១ច្បាប់ សម្រាប់ថ្នាក់បរិញ្ញាបត្រជាន់ខ្ពស់ ។
គួរបញ្ជាក់ដែរថា បេក្ខជនត្រូវភ្ជាប់ជាមួយច្បាប់ដើមដើម្បីពិនិត្យ និងផ្ទៀងផ្ទាត់ មានលិខិតបញ្ជាក់ពីគ្រឹះស្ថានសិក្សាចំពោះបេក្ខជនជានិស្សិត និងមានបញ្ជាក់ពីអង្គភាពចំពោះបេក្ខជនជាមន្ត្រីរាជការ ។
លក្ខខណ្ឌក្នុងការដាក់ពាក្យរួមមាន មានសញ្ជាតិខ្មែរ មានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃស្មើ និងមានអាយុមិនលើស២២ឆ្នាំ(សម្រាប់ថ្នាក់បរិញ្ញាបត្រ) មានសញ្ញាបត្រថ្នាក់បរិញ្ញាបត្រ និងមានអាយុមិនលើស៣៥ឆ្នាំ (សម្រាប់ថ្នាក់បរិញ្ញាបត្រជាន់ខ្ពស់) ។ ជាបេក្ខជនដែលមិនធ្លាប់ទទួលបានអាហារូបករណ៍របស់សាធារណរដ្ឋប្រជាមានិតចិនពីមុនមក និងមានជំនាញភាសាអង់គ្លេស និងភាសាចិនបានល្អ មានសុខភាពល្អទាំងកាយសម្បទា និងស្មារតី ។
អាហារូបករណ៍ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី២៤ ខែមេសា ឆ្នាំ២០២៣ វេលាម៉ោង៤:០០ល្ងាច នៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍ដែលមានអាសយដ្ឋាន អគារលេខ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ(ខាងកើតស្ថានីយទូរទស្សន៍អប្សរាប្រហែល៥០ម៉ែត្រ )៕
