ភ្នំពេញ- គិតដល់ដំណាច់ឆ្នាំ២០២២ តាមប្រព័ន្ធទិន្នន័យរបស់ក្រសួងអភិវឌ្ឍន៍ជនបទ ប្រជាជនប្រមាណជាង ៨០% ទទួលបានសេវាអនាម័យ និងប្រមាណ ៧៣,៤% ទទួលបានសេវាទឹកស្អាត និងមានស្រុកចំនួន៣៩ ឃុំចំនួន ៤៧២ និងភូមិចំនួន៦០២៨ ដែលបានបញ្ចប់ការបន្ទោបង់ពាសវាលពាស។ នេះបើតាមការលើកឡើងរបស់ ឯកឧត្តម យឹម ជុង រដ្ឋលេខាធិការ ក្រសួងអភិវឌ្ឍន៍ជនបទ ក្នុងពិព័រណ៍សារព័ត៌មានទឹកស្អាត និងអនាម័យក្រោមប្រធានបទ “ពន្លឿនការផ្លាស់ប្តូរ ៖ ទឹកស្អាត និងអនាម័យ ដែលមានភាពធន់នឹងអាកាសធាតុ និងប្រកបដោយបរិយាបន្ន” កាលពីថ្ងៃទី០៧ ខែមេសា ឆ្នាំ២០២៣កន្លងទៅនេះ។

ឯកឧត្តម យឹម ជុង បន្ថែមថា នៅកម្រិតថ្នាក់ខេត្ត មកដល់ពេលនេះ មានខេត្តចំនួន ៤ បានក្លាយជាខេត្តបញ្ចប់ការបន្ទោបង់ពាសវាលពាសកាល (ODF) រួមមានខេត្តស្វាយរៀង ព្រៃវែង កណ្តាល និងខេត្តកំពង់ស្ពឺដែលទើបប្រកាសជាខេត្ត ODF កាលពីថ្ងៃច័ន្ទទី ០៣ ខែមេសា កន្លងទៅនេះ។ ខេត្តកំពង់ឆ្នាំងក៏កំពុងត្រៀមខ្លួនឱ្យក្លាយទៅជាខេត្ត ODF នាពេលខាងមុខឆាប់ៗនេះដែរ។

រដ្ឋលេខាធិការ ក្រសួងអភិវឌ្ឍន៍ជនបទ បញ្ជាក់បន្ថែមថា ក្រសួងអភិវឌ្ឍន៍ជនបទបាននិងកំពុងត្រួតពិនិត្យឡើងវិញ ផែនការសកម្មភាពជាតិស្តីពីការផ្គត់ផ្គង់ទឹក ការសំអាត និងអនាម័យជនបទ ឆ្នាំ២០១៩-២០២៣ និងរៀបចំដាក់ចេញនូវផែនការសកម្មភាពជំហាន៣បន្តទៀត ដើម្បីឈានទៅសម្រេចបានគោលដៅ ១០០% អត្រាគ្រប់ដណ្តប់ទឹកស្អាត ការសំអាត និងអនាម័យ និងឆ្លើយតបនឹងគោលដៅអភិវឌ្ឍន៍ប្រកបដោយចីរភាពកម្ពុជា លេខ ៦.២ នៅឆ្នាំ ២០៣០។

ឯកឧត្តម យឹម ជុង រដ្ឋលេខាធិការ ក្រសួងអភិវឌ្ឍន៍ជនបទ

“យើងដឹងមុនហើយថានឹងជួបការលំបាក និងឧបសគ្គជាច្រើនដើម្បីឈានទៅសម្រេចបានគោលដៅដែលបានកំណត់ ជាពិសេសនៅដំណាក់កាលនៅសេសសល់ ១០-២០% ចុងក្រោយនេះ ដូចជាត្រូវគិតគូរពីប្រជាពលរដ្ឋក្រីក្រ ប្រជាជនដែលងាយរងគ្រោះ ជនដែលមានពិការភាព ប្រជាជនដែលរស់នៅក្នុងតំបន់ប្រឈមនានា និងបញ្ហាប្រែប្រួលអាកាសធាតុជាដើម”

ឯកឧត្តម យឹម ជុង មានប្រសាសន៍ថា ដើម្បីសម្រេចបានគោលដៅគ្របដណ្តប់ទឹកស្អាត ការសំអាត និងអនាម័យជនបទនៅឆ្នាំ២០២៥ ទាមទារឱ្យមានការចូលរួមពីគ្រប់វិស័យ  ស្ថាប័ន ភាគីពាក់ព័ន្ធ គ្រប់កម្រិតទាំងអស់។ គ្រប់វិស័យ ស្ថាប័ន និងអ្នកគ្រប់ៗគ្នាសុទ្ធតែពាក់ព័ន្ធ និងអាចរួមចំណែកលើកកម្ពស់ និងផ្សព្វផ្សាយការងារទឹកស្អាត និងអនាម័យតាមលទ្ធភាពរៀងៗខ្លួន។ តួយ៉ាងដូចជា ការចូលរួមរបស់ស្ថាប័ន វិស័យសារព័ត៌មាន និងយុវជនចូលរួមផ្សព្វផ្សាយអំពីទឹកស្អាត និងអនាម័យតាមរយៈអត្ថបទសរសេរ វីដេអូបទយកការណ៍ ព័ត៌មានខ្លីៗ អត្ថបទគេហទំព័រ និងជាច្រើនប្រភេទទៀត តាមលទ្ធភាព និងជំនាញរៀងៗខ្លួន។

ឯកឧត្តម យឹម ជុង រដ្ឋលេខាធិការ ក្រសួងអភិវឌ្ឍន៍ជនបទ

“ប្អូនៗ និងក្មួយៗយុវជន ក៏ជាកម្លាំងទ័ពមួយដ៏សំខាន់ក្នុងការជម្រុញ ពាំនាំសារ ផ្សព្វផ្សាយនិងធ្វើជាជនគម្រូទឹកស្អាត និងអនាម័យក្នុងសហគមន៍របស់ខ្លួនរស់នៅផងដែរ”

រដ្ឋលេខាធិការ ក្រសួងអភិវឌ្ឍន៍ជនបទ បញ្ជាក់បន្ថែមថា ដើម្បីដោះស្រាយបញ្ហាប្រឈមទាំងនេះ ទាំងផ្នែកផ្គត់ផ្គង់ទឹកស្អាត និងអនាម័យ ក្រសួងបានដាក់ចេញនូវវិធានការមួយចំនួនដូចជា គោលការណ៍ណែនាំស្តីពីការគាំទ្រដល់គ្រួសារក្រីក្រ, គោលការណ៍ណែនាំសម្រាប់ជនមានពិការភាព និងចាស់ជរា, គោលការណ៍ណែនាំសម្រាប់អនុវត្តអនាម័យនៅក្នុងតំបន់ប្រឈម, គោលការណ៍ណែនាំស្តីពីការបញ្ជ្រាបភាពបន្សាំ នៃការប្រែប្រួលអាកាសធាតុ និងការគ្រប់គ្រងហានិភ័យ នៃគ្រោះមហន្តរាយនៅក្នុងផែនការវិនិយោគទឹកស្អាត និងអនាម័យជនបទ, គោលការណ៍ណែនាំស្តីពីការឧបត្ថម្ភធនសម្រាប់ការផ្គត់ផ្គង់ទឹកស្អាតដល់គ្រួសារក្រីក្រនៅតំបន់ជនបទ, គោលការណ៍ណែនាំស្តីពីគុណភាពទឹកផឹកជនបទ និងគោលការណ៍ណែនាំជាច្រើនទៀត ដែលគាំទ្រ និងជម្រុញការងារទឹកស្អាត ការសំអាត និងអនាម័យ។

ឯកឧត្តម យឹម ជុង រដ្ឋលេខាធិការ ក្រសួងអភិវឌ្ឍន៍ជនបទ

“យើងក៏នៅតែបន្តយន្តការក្រុមការងារបច្ចេកទេសទឹកស្អាត ការសំអាត និងអនាម័យ ដែលតភ្ជាប់ពីថ្នាក់ជាតិ ដល់ថ្នាក់ក្រោមជាតិ និងជម្រុញលើកទឹកចិត្ត និងទទូចឱ្យស្ថាប័នពាក់ព័ន្ធបន្តចូលរួមយ៉ាងសកម្មនៅគ្រប់កម្រិតពីថ្នាក់ខេត្ត ស្រុក ឃុំ ភូមិ និងការចូលរួមពីដៃគូអភិវឌ្ឍន៍រហូតសម្រេចបានគោលដៅដែលបានកំណត់”

ឯកឧត្តម Andreas Zurbrugg ឯកអគ្គរដ្ឋទូតរងនៃស្ថានទូតអូស្រ្តាលីប្រចាំប្រទេសកម្ពុជា បានមានប្រសាសន៍ថា មនុស្សគ្រប់រូបមានតួនាទីជំរុញទឹកស្អាត និងអនាម័យ ហើយអាចបង្កើតភាពខុសគ្នានៅក្នុងតំបន់របស់ខ្លួន។ ដូចសព្វថ្ងៃនេះ យើងទទួលស្គាល់ពីសារៈសំខាន់ និងការរួមចំណែករបស់ប្រព័ន្ធផ្សព្វផ្សាយ អ្នកសារព័ត៌មាន និងយុវជនក្នុងការលើកកម្ពស់ទឹកស្អាត និងអនាម័យ។ របៀបដែលអ្នកសារព័ត៌មាន និងយុវជនបង្ហាញពីការសហការ និងការខិតខំប្រឹងប្រែងរួមគ្នារបស់ពួកគេនៅក្នុងព្រឹត្តិការណ៍នេះ គឺពិតជាគំរូដ៏ល្អដែលគួរត្រូវបានលើកទឹកចិត្តឱ្យបន្ត។

ឯកឧត្តម Andreas Zurbrugg បញ្ជាក់បន្ថែមថា ដើម្បីឱ្យកម្ពុជាអាចសម្រេចបានគោលដៅអភិវឌ្ឍប្រកបដោយចីរភាពក្នុងឆ្នាំ២០៣០ គឺជាជំហានមួយដែលយើងត្រូវការការខិតខំប្រឹងប្រែង ការវិនិយោគ និងការចូលរួមពីដៃគូពាក់ព័ន្ធទាំងអស់​។ រាជរដ្ឋាភិបាលអូស្ដា្រលីប្ដេជ្ញាចិត្ត និងបន្តគាំទ្ររាជរដ្ឋាភិបាលកម្ពុជាដើម្បីសម្រេចគោលដៅអភិវឌ្ឍប្រកបដោយចីរភាព ដើម្បីផ្ដល់ទឹកស្អាត និងអនាម័យទៅដល់ប្រជាជនកម្ពុជា ជាពិសេសស្រ្តី ជនមានពិការភាព និងជនងាយរងគ្រោះ។

ឯកឧត្តម Andreas Zurbrugg ឯកអគ្គរដ្ឋទូតរងនៃស្ថានទូតអូស្រ្តាលីប្រចាំប្រទេសកម្ពុជា

“មនុស្សគ្រប់គ្នាអាចធ្វើការផ្លាស់ប្តូរក្នុងវិស័យទឹកស្អាត និងអនាម័យដោយដើរតួជាចំណែករៀងៗខ្លួន និងធ្វើអ្វីដែលអ្នកអាចធ្វើបាន ដូចអ្នកសារព័ត៌មាន និងយុវជនបានបង្ហាញយើងនៅថ្ងៃនេះ”

គួរជម្រាបជូនថា ពិព័រណ៍សារព័ត៌មានទឹកស្អាត និងអនាម័យ មានគោលបំណងបង្ហាញឱ្យឃើញពីតួនាទីដ៏សំខាន់របស់ប្រព័ន្ធផ្សព្វផ្សាយក្នុងការចូលរួមចំណែកលើកកម្ពស់វិស័យទឹកស្អាត និងអនាម័យនៅកម្ពុជា ។ លើសពីនេះ របៀបធ្វើការងាររបស់អ្នកសារព័ត៌មាន និងកិច្ចការរបស់យុវឌីជីថលទឹកស្អាត និងអនាម័យ ។ ព្រមទាំងបង្កើនការយកចិត្តទុកដាក់ពីរដ្ឋាភិបាល ដៃគូអភិវឌ្ឍន៍ វិស័យឯកជន និងភាគីពាក់ព័ន្ធលើពន្លឿនការផ្លាស់ប្តូរ ទឹកស្អាត និងអនាម័យ ដែលមានភាពធន់នឹងអាកាសធាតុ និងប្រកបដោយបរិយាបន្ន និងនៅតាមទីជនបទ និងដើម្បីចូលរួមទាំងអស់គ្នាក្នុងការប្រារព្ធទិវាទឹកពិភពលោកឆ្នាំ២០២៣៕