ងងុយគេងពេលអានសៀវភៅមិនមែនជាបញ្ហាដែលលើកយកបន្ទោសគ្នាឡើយ ព្រោះវាបណ្តាលមកពីកត្តាច្រើនយ៉ាងដូចជា កង្វះជីវជាតិនៃរបបអាហារ បញ្ហាសុខភាព ខ្វះវិធីអាន ឬអានមិនត្រូវចំណូចចិត្ត និងកត្តារួមផ្សំជាច្រើនផ្សេងទៀត។ នេះជាការលើកឡើងរបស់អ្នកឧកញ៉ាវេជ្ជបណ្ឌិត គួច ម៉េងលី នៅក្នុងកម្មវិធី «អំណានឮៗ» ដែលរៀបចំឡើងដោយអង្គការទស្សនៈពិភពលោកកាលពីពេលថ្មីៗនេះ។

ជាដំណោះស្រាយនៃបញ្ហាងងុយគេងពេលអាន លោកវេជ្ជបណ្ឌិត គួច ម៉េងលី បានផ្តល់ដំបូន្មានថា ចំពោះកូនសិស្សពួកគេគួរតែវិនិយោគពេលវេលាទៅលើការសិក្សាឱ្យបានច្រើន ចំណែកការងារវិញបំពេញឱ្យសមល្មមទៅនឹងកម្លាំងដែលមាន ទន្ទឹមគ្នានោះត្រូវបរិភោគឱ្យបានគ្រប់គ្រាន់ ដោយយកចិត្តទុកដាក់ទៅលើជីវជាតិអាហារទាំង៤មុខមានដូចជា៖ ១. កាបូអ៊ីដ្រាត(carbohydrate) មានដូចជា នំបុ័ង, បាយ និងស្រូវសាលីជាដើម។ ២. ប្រូតេអ៊ីន(Proteins) មានដូចជា សាច់គោ សាច់មាន់ ត្រី ស៊ុត និងសាច់ជ្រូកជាដើម ប៉ុន្តែដើម្បីឱ្យកាន់តែមានប្រសិទ្ធភាពសូមជ្រើសរើសប្រភេទសាច់ដែលស៊ីស្មៅជាអាហារ ព្រោះមិនសូវមានមេរោគ។ ៣.ជីវជាតិដែលត្រូវការច្រើនជាងគេបំផុតគឺ បន្លែ និងផ្លែឈើ ហើយបើខ្វះជីវជាតិទាំងនេះ ទោះខំប្រឹងយ៉ាងណាក៏ពិបាកក្នុងការបន្តទៅមុខណាស់ ហើយថែមទាំងធ្វើឱ្យបាត់បង់ការចងចាំ និងកើតជំងឺញឹកញាប់។ ៤.សារធាតុទឹកដោះគោ ទឹកដោះគោជូរ(Yogurt )។ លោកវេជ្ជបណ្ឌិតបានសង្កត់ធ្ងន់ថា ការបរិភោគអាហារ មិនមែនដើម្បីតែឆ្អែតនោះទេ តែគឺសម្រាប់ទ្រទ្រង់នូវសុខភាពផងដែរ។

លោកវេជ្ជបណ្ឌិតបន្តថា បញ្ហាផ្លូវចិត្តនាំឱ្យការអានសៀវភៅពិបាកនឹងយល់ ព្រោះអារម្មណ៍រវើរវាយស្រងូតស្រងាត់ ចង់យំម្តងម្កាល ពិបាកក្នុងការគិត សម្រាន្តមិនលក់ យល់សប្ដិញឹកញាប់ ងាយអស់កម្លាំង ឆាប់ភ័យ មិនចង់ចេញក្រៅជួបមិត្តភ័ក្តិ បាត់បង់ចំណូលចិត្ត ហើយភារកិច្ចដែលសម្រេចបានគឺយឺតយ៉ាវ ។ ដូច្នេះហើយដើម្បីដោះស្រាយបញ្ហាអំណាន ទាល់តែដោះស្រាយបញ្ហាសុខភាពផ្លូវចិត្ត និងផ្លូវកាយ ឱ្យបានរួចរាល់សិន។ បើគ្រាន់តែជំរុញឱ្យអានសៀវភៅ ដោយមិនមានអ្នកជំនាញចិត្តសាស្រ្ត ឬអ្នកប្រឹក្សា ហើយយកតែអ្នកណែនាំ និងអ្នកបង្រៀនមួយមុខ(Educator and educationist ) គឺមិនអាចទៅរួចនោះឡើយ។

អ្នកឧកញ៉ាវេជ្ជបណ្ឌិត គួច ម៉េងលី

“អានដោយរបស់ចូលចិត្ត ធ្វើអ្វីក៏ដោយចាប់ផ្តើមពីរបស់សាមញ្ញទៅរកភាពស្មុគស្មាញ ហើយអានអ្វីដែលជាព្រលឹងដួងពេជ្រយើង អ្វីទៅដែលជាចំណង់ចំណូលចិត្តយើង ដាក់ទៅជក់ហ្មងអាហ្នឹងហើយឱ្យកូនអានទៅ ធ្វើទៅ”

ដោយឡែង លោក ឡេង វីរៈ នាយកប្រតិបត្តិ និងនាយកគ្រប់គ្រងគម្រោងគណនេយ្យភាពសង្គមបន្ថែមថា ដើម្បីជួយសម្រាលបន្ទុកនូវបញ្ហាការងងុយគេងពេលអានសៀវភៅ អ្នកអានគួរតែជ្រើសរើសប្រភេទសៀវភៅដែលវាពាក់ព័ន្ធឬបំពេញបន្ថែមនូវអ្វីដែលយើងកំពុងតែត្រូវការប្រចាំថ្ងៃ។ ហើយរបៀបនៃការជ្រើសយកប្រភេទសៀវភៅឱ្យសមស្របនឹងខ្លួនឯង ដំបូងត្រូវអានអត្ថន័យត្រួសៗ ឱ្យបានច្រើនក្បាលជាមុនសិន សឹមសម្រេចចិត្តថា ជ្រើសយកទិន្នន័យ ឬសៀវភៅណាមួយដែលសមស្របទៅនឹងស្ថានភាពខ្លួនឯង។

លោក ឡេង វីរៈ

“កុំឱ្យគិតថា សៀវភៅនេះល្អ ជាងសៀវភៅនោះ ឬសៀវភៅហ្នឹង អានហើយធ្វើឱ្យមានដូចគេ។ គ្មានសៀវភៅណាធ្វើឱ្យយើងមានហើយ គិតហើយឈប់ក្រអី ខ្ញុំហាក់មិនសូវហ៊ានថាយ៉ាងម៉េចទេ! ប៉ុន្តែអ្វីដែលយើងផ្តោត ការណ៍នោះវានឹងកើតឡើង”

លោក វីរៈ បន្ថែមថា តាមបទពិសោធន៍របស់លោកកន្លងមក រៀងរាល់ពេលអានសៀវភៅ គឺលោកតែងតែភ្ជាប់ជាមួយនឹងការរិះគិត និងការកត់ត្រា។ លោកយល់ឃើញថា ការអានសៀវដើម្បីគ្រាន់តែសម្រាន្តលក់ស្រួលគឺមិនទាន់ហៅថាអាការអានដ៏មានគុណភាពទេ។ លោកបន្តថា ការអានសៀវភៅឱ្យឮៗ គឺជាផ្នែកមួយជួយកាត់បន្ថយអ្នកអានទាំងឡាយកុំឱ្យងងុយគេង ដោយហេតុថា មនុស្សមិនអាចគេងទាំងកំពុងស្រែកអានខ្លាំងនោះឡើយ។

កញ្ញា គីម ឌីណា អ្នកនិពន្ធសៀវភៅ នាងមានយោបល់មិនសូវខុសគ្នាពី លោក វីរៈ ប៉ុន្មានទេ ប៉ុន្តែបានបន្ថែមថា ពេលដែលអានក៏ត្រូវមើលបរិយាកាសដែរ ពីលើសពីនេះ ការជ្រើសរើសពេលវេលា ក៏សំខាន់មួយផ្នែកដែរ ដោយ​ត្រូវដឹងខ្លួនឯងថា ការអានដែលមានផលិតភាពនៅពេលណា? ព្រឹក ថ្ងៃត្រង់ ឬពេលយប់? ជាងនេះទៅទៀត ការអានដោយដាក់គោលដៅ ក៏ជាចំណែកមួយជួយជៀសវាងការងងុយគេងបានមួយផ្នែកដែរ។

ចំពោះ លោក អ៊ុង ប៉េងអាន អ្នកផលិតមាតិកានៅលើបណ្តាញសង្គម Think with PengAnn ចែករំលែកថា ការអានអ្វីដែលមានចិត្តខ្វល់ខ្វាយ ឬក៏ការរំជួលចិត្តដោយសារវាជាគន្លឹះកាត់បន្ថយងុយដេក។ ជាទូទៅលោកតែងអានអ្វីដែលលោកមានបញ្ហាជាក់ស្ដែង ដើម្បីដោះស្រាយចំណុចខ្សោយ និងធ្វើយ៉ាងណាឱ្យឆ្លើយតបនឹងតម្រូវការ។ លោកបន្តថា វាជារឿងធម្មតាទេ ដែលយើងធ្លាប់អាន ហើយក៏បោះបង់សៀវភៅអានមួយខណៈ តែយ៉ាងណាកុំឱ្យចំណុចនេះក្លាយទៅជាហេតុផលមួយមកប្រាប់យើងថា យើងជាមនុស្សដែលមិនចូលចិត្តការអាន តាមពិតអ្នកគ្រាន់តែអានសៀវភៅមិនទាន់ត្រូវតែប៉ុណ្ណោះ៕